Lokaviðvörun til yfirvalda er yfirskrift nýrrar loftslagsskýrslu Milliríkjanefndar Sameinuðu þjóðanna. Þetta er þriðji hluti sjöttu skýrslunnar um loftslagsbreytingar og snýr hann að því til hvaða aðgerða sé hægt að grípa til að halda hnattrænni hlýnun í skefjum. Skýrslan er yfirgripsmikil, telur hátt í 3.700 blaðsíður og er hugsuð sem leiðarvísir í aðgerðum gegn loftslagsbreytingum. Bjarni Rúnarsson ræddi við Brynhildur Davíðsdóttir, varaformaður loftslagsráðs og prófessor í umhverfis- og auðlindafræði við Háskóla Íslands

Gauti Jóhannesson, fráfarandi forseti sveitarstjórnar í Múlaþingi er ósáttur líkt og margir sveitarstjórnarmenn við að skipulagsvald haf- og strandsvæða sé ekki hjá sveitarfélögunum. Lagaumhverfið hefði mátt vera skýrara í kringum fiskeldi í fjörðunum, lögin um haf- og strandsvæði hafi verið sett fyrst og fremst til að bregðast við fiskeldi og hann vonar að áður en beislun vindorku fer lengra verði lagaumhverfið komið á betri rekspöl en reyndin varð með haf- og strandsvæðin. Rúnar Snær Reynisson ræddi við Gauta.

Ný og mjög vísindalega kenning er komin fram um af hverju byggð Norrænna manna lagðist af á Grænlandi á 15. öld. Ekki var það kuldinn og ekki var það vankunnátta við veiðar heldur óbærilegir þurrkar. Þarna er komið nýtt svar við gamalli gátu eins og Gísli Kristjánsson, fréttaritari í Osló, rekur hér.

Helstu atriði frétta:

Forseti Úkraínu fór ófögum orðum um framferði innrásarhers Rússa þegar hann ávarpaði öryggisráð Sameinuðu þjóðanna í dag. Annaðhvort ætti að reka Rússa úr ráðinu eða leggja það niður.

Þingmenn stjórnarandstöðunnar kröfðust þess að Sigurður Ingi Jóhannsson innviðaráðherra mætti til þings og gerði grein fyrir ummælum sínum um framkvæmdastjóra Bændasamtakanna í seinustu viku.

Öllum íbúum Shanghai, fjölmennustu borgar Kína, hefur verið skipað að halda sig heima til að stöðva útbreiðslu kórónuveirunnar. Rúmlega þrettán þúsund smit greindust þar í gær.

Ungur Akureyringur sem er sjálfboðaliði með hópi fólks við landamæri Úkraínu safnar fyrir bíl til að hjálpa fólki í neyð. Hann er vongóður um að Íslendingar leggi söfnuninni lið.

Spegillinn 5. apríl 2022.

Umsjónarmaður: Bjarni Rúnarsson.

Tæknimaður: Jón Þór Helgason.

Stjórn fréttaútsendingar: Margrét Júlía Ingimarsdóttir.