Marek Moszczynski, sem var ákærður fyrir þrjú manndráp og tíu manndrápstilraunir með því að kveikja í húsi á Bræðraborgarstíg, var í dag metinn ósakhæfur. Héraðsdómur úrskurðaði að hann skuli sæta öryggisvistun á viðeigandi stofnun.

Guðlaugur Þór Þórðarson utanríkisráðherra hefur kvartað til yfirkjörstjórnar Sjálfstæðisflokksins í Reykjavík og telur að Áslaug Arna Sigurbjörnsdóttir dómsmálaráðherra hafi brotið prófkjörsreglur.

Dómur Hæstaréttar í tryggingamáli manns sem hlaut varanlega örorku eftir fall af reiðhjóli gæti haft víðtæk áhrif á tryggingafélögin og Sjúkratryggingar Íslands.

Þingmaður Pírata gagnrýnir harðlega þær aðgerðir Vinnumálastofnunar, og þar með stjórnvalda, að svipta hátt í 400 manns atvinnuleysisbótum fyrir að hafna boðum um störf. Félagsmálaráðherra segir aðgerðir stjórnvalda hafa gripið langflesta í faraldrinum.

Stífluð gömul borhola sem ekki hefur bært á sér í þrjátíu ár breyttist í goshver í fyrradag og hefur síðan gosið mörgum sinnum á klukkustund í hátt í þrjátíu metra.

Ráða þarf um 25 nýja lögreglumenn á höfuðborgarsvæðinu vegna styttingar vinnuvikunnar. Alls er gert ráð fyrir að ráða verði 75 nýja lögreglumenn á öllu landinu. Gert ráð fyrir að á ársgrundvelli verið varið um 900 milljónum króna vegna styttingar vaktavinnutímans hjá lögreglu, Landhelgisgæslunni og fangavörðum. Ekki er enn ljóst hvaða upphæðir koma í hlut hvers lögregluembættis. Arnar Páll Hauksson segir frá og talar við Höllu Bergþóru Björnsdóttur. Heyrist í Sonju Ýr Þorbergsdóttur og Helgu Sigurðardóttur.

Nýlega dæmdi Landsréttur í hrunmáli sem varðar ábyrgð stjórnenda gamla Landsbankans. Málið varpar ljósi á ýmislegt annað, meðal annars eignarhald stærstu eigenda bankans, feðganna Björgólfs Guðmundssonar og Björgólfs Thors Björgólfssonar. Sá þáttur kemur líka við sögu í hópmáli hluthafa í gamla Landsbankanum gegn Björgólfi Thor. Einnig að endurskoðunarfyrirtækið PriceWatherhouseCoopers greiddi þrotabúi Landsbankans 1,1milljarð króna gegn því að búið félli frá málsókn sem í alþjóðlegu samhengi er nokkuð einstök niðurstaða. Sigrún Davíðsdóttir sagði frá.