Die Sunday Times Sondagkoerant het in gister se uitgawe erken dat hy vals berigte geplaas het oor moorde in Cato Manor by Durban, 'n geheime ondersoekeenheid in die Inkomstediens, en die deportasie van Zimbabwiërs. Die koerant het om verskoning gevra en ingestem om die prysgeld terug te gee wat met toekennings vir die berigte gewen is. Ons praat nou verder hieroor met die veteraan-joernalis, skrywer en politieke kommentator Max du Preez..

Die rolprent "Kanarie" het die afgelope week drie internasionale toekennings ingepalm. In Chicago is dit aangewys as die beste fiksie-speelfilm, terwyl dit onderskeidelik as "Beste internasionale film" en "Beste speelfilm" by Atlanta se LGBT-rolprentfees "OUT" in die VSA bekroon is. "Kanarie" se storie is gegrond op die komponis Charl-Johan Lingenfelder se eie ervaring in die Suid-Afrikaanse weermagkoor. Lingenfelder het aan Anna-Marie Jansen van Vuuren gesê dat hy deur die musiek vlerke aan sy karakters wou gee.

Die SAUK se finansiële bestuurshoof, Yolande van Biljon, was gister deel van die SAUK-direksie wat sy 2017/2018 finansiële state aan die Parlement voorgelê het. Vandag vergader die openbare uitsaaier se topbestuur met verskeie vakbonde - onder meer BEMAWU, om die uitsaaier se finansiële herstrukturering te bespreek. Die SAUK sê op sy beurt die huidige salarisrekening is onvolhoubaar hoog. Vir die jongste hieroor, praat Anita Visser met die finansiele bestuurshoof, Yolande van Biljon...

Voorvalle van kinder-ontvoerings, soms met noodlottige gevolge, was die afgelope tyd gereeld in die nuus. 'n Onlangse skool-uitstappie na Johannesburg het byna deel geword van die statistiek. Marlinee Fouche het twee hoërskool leerlinge raakgeloop wat beweer dat daar 'n poging aangewend is om hulle te ontvoer. As hulle NIE kop gehou het nie, kon hulle moontlik vandag vermis gewees het. Die meisies, onderskeidelik 15 en 17 jaar oud, was saam met 'n skoolgroep by die Westgate winkelsentrum in die Gautengse Wesrand, toe 'n man in sy middel-twintigs een van hulle aan die arm beet gekry het...

Die wêreld se eerste lewer-oorplanting van 'n MIV-positiewe ma na haar kind, wat nie die virus het nie, is in Suid-Afrika uitgevoer. Daar is regoor die wereld daaroor berig. Die medici het die operasie duidelik nie sonder wroeging gedoen nie en ook binne die konteks van 'n desperate situasie - trouens hulle het die besluit beskryf as 'n Salomo-besluit. Anita Visser het met Prof Anton van Niekerk - die hoof van die Sentrum vir Toegepaste Etiek aan die Universiteit van Stellenbosch - gepraat.

Die Gautengse polisie het Dinsdag 'n saak van poging tot moord geopen ná 'n skietvoorval in Westbury, wes van Johannesburg. Dit het gebeur enkele ure na die minister van Polisie, Bheki Cele, se besoek aan die buurt waartydens hy belowe het dat die polisie se taktiese reaksie-span ontplooi sal word om sulke voorvalle te voorkom. Die gemeenskap betoog reeds twee weke lank oor bende- en dwelmverwante misdaad in die gebied. Anita Visser het met rolspelers in dienbuurt gepraat.

In Julie vanjaar het die voorsitter van die Sernick Groep en die Vrystaatse 2016 Boer van die Jaar, Nic Serfontein, 'n pleidooi aan President Cyril Ramaphosa gerig om kommersiële boere te betrek by sy planne vir grondhervorming. Die gevolg was dat Ramaphosa hom betrek het by 'n paneel van net tien raadgewers oor hervorming. In sy ope brief aan Ramaphosa wat goeie vrug vir hom gedra het, skryf Serfontein: "My motivering vir die skrywe van die brief is nie vrees om my plaas te verloor nie, maar dat ek oor die afgelope drie jaar eerstehands ervaar het watter hel opkomende boere deurgaan weens die feit dat hulle oor die afgelope 24 jaar deur die regering versaak is." Nic was ook vanoggend Monitor se ateljeegas.....

Dit was oud-president Bill Clinton se huldeblyk aan die bokser Mohammed Ali, waarby Ton Vosloo aanklank gevind het: "He decided that not his race nor the expectation of others, would strip him of his power to tell his own story." En dis presies wat Naspers se gewese grootbaas gedoen het met sy boek, Oor Grense. Anita Visser het met hom gepraat.

Ons hoofstorie vanoggend is die betogings en geweld wat die afgelope ruk in verskeie woonbuurte in die Wes-Kaap, Oos-Kaap, Gauteng en Noord-Kaap plaasvind onder die vaandel, SHUTDOWN. Dit is daarop gemik om bedrywighede in sekere woonbuurte tot stilstand te dwing uit verset teen onder meer bendegeweld en dwelmmisbruik in die gebiede. Ons het vroeer gehoor dat dat paaie in en om die Westbury-woonbuurt reeds gesluit is weens geweld wat sedert vroeg vanoggend daar uitgebreek het. Buitebande word gebrand en na verneem word het die polisie reeds op betogers gevuur. Ons gaste is Shahim Ismael, 'n gemeenskapsleier, Tilly Michaels van die plaaslike polisiëringsforum en 'n anti-dwelm aktivis Eldoradopark, Dereleen James. Hier is deel een van die onderhoud....

Deel 2 van die storie oor betogings in Westbury in Johannesburg waar inwoners betoog teen bendegeweld en dwelmmisbruik in die gebiede. Ons het vroeer gehoor dat paaie in en om die Westbury-woonbuurt reeds gesluit is weens geweld wat sedert vroeg vanoggend daar uitgebreek het. Hier is Deel 2 van die onderhoud....