Hewige kritiek word oor 'n wye internasionale front uitgespreek oor die Amerikaanse president, Donald Trump, se aankondiging dat Amerika hom aan die Parys-ooreenkoms oor klimaatsverandering onttrek. Trump se besluit volg ná verlede week se vergaderings met Europese leiers. Trump het op 'n mediakonferensie gesê dit 'n swak ooreenkoms is vir Amerikaners en hy staan by sy verkiesingsbelofte om werkers eerste te stel. Anita Visser praat met Theo Bekker, 'n politieke ontleder verbonde aan die Noordwes Universiteit.

Sedert verlede naweek is die land behoorlik aan die gons oor e-posse van die Gupta-familie wat uitgelek het, en steeds stuksgewys openbaar gemaak word. Die familie word reeds beskuldig van 'n staatskaping en is berug daarvoor dat hulle hand om die blaas met president Zuma is. Dit blyk dat NOG e-posse uitgelek sal word en dat dit gaan bewys tot watter mate die Gupta-familie mag het oor die regering. Tussen 'n 100 000 en 200 000 e-posse en ander dokumente is glo in die besit van die Daily Maverick se ondersoek-eenheid SCORPIO, en amaBhungane, die sentrum vir ondersoekende joernalistiek. Ons praat nou hieroor met die veteraan-joernalis Stefaans Brummer, 'n mede-besturende vennoot by AmaBhungane.

Die teorie dat Afrika die wieg van die mensdom is, is weer bevestig. So beskryf kenners die eerste, suksesvolle poging om antieke mummies uit Egipte se DNS te ontsyfer en met díe van moderne Egiptenare te vergelyk. Hanri Wondergem het by ons wetenskapskorrespondent, George Claassen, uitgevind hoe dit gedoen word en hoe dit ook lig werp op migrasiepatrone.

Die wêreld staan op die punt van die vierde nywerheidsrewolusie, maar Suid-Afrika is vasgevang in die tweede nywerheidsrewolusie. Dit is die mening van Dirk de Vos, 'n beleggingskenner by QED Solutions. Metzi van der Merwe het met hom gepraat.

In 'n poging om erdwurms, en die waarde wat hulle by die ekosisteem voeg, meer toeganklik en verstaanbaar te maak, het honderd spesies nou nuwe name. Twee wetenskaplikes het die eenvoudiger Engelse name gekies. Hanri Wondergem het met dr. Adrian Armstrong, een van die wetenskaplikes verbonde aan Ezemvelo KZN Wildlife, oor díe projek gesels.

Die volgende bydrae bevat dalk besonderhede wat sensitiewe luisteraars kan ontstel. Prostitusie in Springs, aan die ooste van Gauteng, gaan onversteurd voort ten spyte van die onwettigheid van die bedryf. Vroeër die week het die polisie 'n Nigeriese-burger, Edozi Obi, in hegtenis geneem vir die beweerde ontvoering van jong meisies vir prostitusie. Dae later kon baie sekswerkers waaronder meestal tieners nog op straat gesien word waar hulle seks verkoop het. Malixole Gwatyu doen verslag.

Staatskaping en die familienaam Gupta loop soos goue drade deur elke parlementêre ondersoek en hofsake waarin regeringslui betrek word. Dit het gister weer duidelik geword toe die minister van openbare ondernemings, Lynne Brown, verantwoording moes doen oor haar besluit om Brian Molefe weer as uitvoerende hoof van Eskom aan te stel. Izak du Plessis het aan Pieter-Louis Myburgh, skrywer van die boek THE GUPTA REPUBLIC: A STORY OF STATE CAPTURE, gevra wat staatskaping presies is en hoe die Guptas daarby betrokke is.

Groen-energie was die sleutelwoord by vanjaar se Africa Utility Week-uitstalling in Kaapstad. By die toekenningsgeleentheid wat die uitstalling afgesluit het, is vroue vereer vir hulle bydrae tot die energie- en waterbedryf. Suid-Afrika het ook tydens die toekennings uitgeblink met vier pryse. Dianke Nel het meer besonderhede.

Noorweë het pas spesiale noodmaatreëls ingestel om sy saadbankbergingsfasiliteit verder te beveilig teen enige iets wat dalk die saad binne kan beskadig. Dit volg nadat klimaatsverandering die ys romdom die bergingsfasiliteit, wat in Svalbard geleë is, laat smelt het. Die water het in die fasiliteit ingeloop maar gelukkig is niks beskadig nie. 'n Plantkundige van Cape Nature, Rupert Koopman, sê as mense die woord klimaatsverandering hoor dan wil hulle nie verder luister nie. Koopman waarsku egter dat wat in Noorweë gebeur het, ook hier op eie bodem op die oomblik met ons eie fynbosspesies plaasvind.

'n Span van die Universiteit Stellenbosch en die Tygerberg Akademiese Hospitaal het onlangs 'n tweede penis-oorplanting suksesvol voltooi. Die ontvanger is 'n 40-jarige man wat sy penis 17 jaar gelede weens komplikasies met ʼn tradisionele besnydenis verloor het. Professor Andre van der Merwe, die hoof van die Afdeling Urologie aan die US se Fakulteit Geneeskunde en Gesondheidswetenskappe het die marathon-operasie van nege en 'n half uur gelei. Dianke Nel het meer by prof. Van der Merwe oor die operasie gaan uitvind.