Die ANC, DA en EFF praat oor hulle fokuspunte om stemme te werf in die munisipale verkiesings in die Wes-Kaap.

Vanjaar is plaaslike verkiesing. Wat beteken dit vir die Wes-Kaap, die enigste DA beheerde provinsie in SA?

Elf maande nadat hy as rektor en vise-kanselier van die Universiteit Stellenbosch begin het, slaan prof. Wim de Villiers nou byna daagliks vure dood oor verskeie brandpunte wat op die kampus woed. Oor die afgelope naweek alleen is nóg 'n dringende interdik teen die universiteit beteken oor sy taalbeleid – en dit te midde van betogings oor die uitsluiting van swart studente, en vroueregte. Maar Slim Wim – soos sy ondersteuners hom noem – veg moedig voort, terwyl sy kritici reken dat Slinkse Wim die dryfveer agter die groot veranderings is. Prof. De Villiers praat hieroor vanaf die RSG verhoog by die Woordfees.

Rekordtemperature is gemeet in die Arktiese gebied in die noordelike halfrond. 'n Klimaatkenner, Professor Francois Engelbrecht van die WNNR sê dit het verreikende gevolge - en slegs 'n bindende internasionale klimaatsooreenkoms sal die saak dalk kan beredder.

Ondanks die swak ekonomie is daar 'n toenemende aanvraag na duurder en beter organiese kos van gebruikers wat dit kan bekostig. Baie kleinboere wat hierdie tipe kos produseer, is vroue. Hulle het dit ten doel om kos sonder onnatuurlike bestandele te verskaf. Darren Taylor doen verslag oor 'n vroueboer wat besig is om naam te maak met haar organiese hoendervleis.

Die plaaslike regeringsvereniging SALGA het aan die parlementêre begrotingskomitee (appropriations committee) gesê dat munisipaliteite 115-miljard rand vir dienste skuld. SALGA het die komitee voorgelig oor hoe die 2016-begroting munisipaliteite raak. Die vereniging wil hê die parlement moet hulle help met die stigting van 'n nasionale invorderingsagentskap. Zalene Marrington doen verslag.

Die minimum daaglikse loon vir plaaswerkers, en werkers in die bosbousektor het gister inwerking getree. Die werkers wat nege ure per dag werk, word R128,26 betaal. Alhoewel 'n arbeidsontleder meen dit is nie genoeg nie, sê 'n boer dat sy arbeidsrekening bly styg in moeilike ekonomiese tye. Mètzi van der Merwe het met twee plaaswerkers oor hulle omstandighede gepraat.

Voedelsekerheid is in die weegskaal, aldus 'n verslag van die Verenigde Nasies oor die stand van bestuiwers wêreldwyd. Die bevolkingsgetalle van verskillende spesies, soos bye, skoenlappers, sekere soorte vlermuise en voëls, is aan die afneem. Jan en San Alleman, maar veral boere, sal moet hand bysit om te keer dat bestuiwers uitsterf. Hanri Wondergem het met 'n entomoloog, prof. Erik Holm hieroor gepraat.

Watter spesie kan die verste langafstandvlugte op ons planeet onderneem? Die jongste navorsing van 'n Amerikaanse Universiteit sê dit is 'n naaldekoker. En die rede hiervoor lê, volgens wetenskaplikes, in hulle gene. Hanri Wondergem het ons wetenskapkorrespondent, George Claassen, hieroor uitgevra.

Die rolprent MAD MAX: FURY ROAD, wat met ses Oscars weggestap het, spog nie net met een nie, maar met twee Suid-Afrikaanse aktrises in die rolverdeling. Antoinette Kellerman het saam met Charlize Theron ses weke lank aan die fliek in Namibië verfilm. En al is Kellerman se rol meestal beperk tot geluide maak terwyl sy aan 'n trok tydens 'n jaagtoneel hang, sê sy in 'n onderhoud met Anna-Marie Jansen Van Vuuren dat dit 'n ongelooflike ervaring was.