Voedelsekerheid is in die weegskaal, aldus 'n verslag van die Verenigde Nasies oor die stand van bestuiwers wêreldwyd. Die bevolkingsgetalle van verskillende spesies, soos bye, skoenlappers, sekere soorte vlermuise en voëls, is aan die afneem. Jan en San Alleman, maar veral boere, sal moet hand bysit om te keer dat bestuiwers uitsterf. Hanri Wondergem het met 'n entomoloog, prof. Erik Holm hieroor gepraat.

Watter spesie kan die verste langafstandvlugte op ons planeet onderneem? Die jongste navorsing van 'n Amerikaanse Universiteit sê dit is 'n naaldekoker. En die rede hiervoor lê, volgens wetenskaplikes, in hulle gene. Hanri Wondergem het ons wetenskapkorrespondent, George Claassen, hieroor uitgevra.

Die rolprent MAD MAX: FURY ROAD, wat met ses Oscars weggestap het, spog nie net met een nie, maar met twee Suid-Afrikaanse aktrises in die rolverdeling. Antoinette Kellerman het saam met Charlize Theron ses weke lank aan die fliek in Namibië verfilm. En al is Kellerman se rol meestal beperk tot geluide maak terwyl sy aan 'n trok tydens 'n jaagtoneel hang, sê sy in 'n onderhoud met Anna-Marie Jansen Van Vuuren dat dit 'n ongelooflike ervaring was.

Die Barclays Afrika-groep het Sondag 'n waarskuwing aan aandeelgouers gerig om die groep se aandele met omsigtigheid te verhandel. Barclays PLC het vanoggend (1 Maart) 'n verklaring uitgereik waarin hulle aankondig dat hulle 62% van hulle aandeelhouding in die Barclays Afrika-groep gaan verkoop. Die aankondiging beëindig maande van bespiegeling. Amelia Morgenrood, 'n portefeuljebestuurder by PSG Makelaars in Pretoria, het in 'n onderhoud met Mètzi van der Merwe voor die aankondiging, reeds vermoed dat Barclays sy belange in Afrika sal afskaal.

Die bekende skrywer en uitgewer, Leon Rousseau, is Woensdagaand dood, kort voor sy 86ste verjaarsdag. Hy was die laaste drie dae van sy lewe in 'n koma. Sy redakteur van die afgelope ses jaar by NB-uitgewers, Simone Hough, sê dit was vir haar 'n eer om saam met so 'n bekwame mens te kon werk.

Afrikaanse rillers is so skaars soos hoendertande. Volgens verskeie mense in die rolprentbdryf word hierdie genre nog nie doeltreffend genoeg ontgin nie, en is daar verskillende menings oor die gereedheid van die mark vir hierdie soort rolprente. Marlinee Fouche het die première van die jongste riller op die silwerdoek, Die Ontwaking, bygewoon. Sy het ondersoek ingestel oor hierdie genre se plek in die Afrikaanse vermaaklikheidswereld.

Die balju van Pretoria het beslag gelê op bates van die Padongelukkefonds se kantoor in Menlyn. Dit volg nadat die fonds nie sekere verpligtinge kon nakom nie. Die finansiële hoof van die fonds, Yolande van Biljon, het aan Izak du Plessis gesê hulle is in 'n geldelike verknorsing.

Anita Visser praat met Hugo Pienaar, seniorekonoom van die Buro vir Ekonomiese Navorsing oor sy verwagtings van die begroting.

Anita Visser praat met verskeie politieke partyverteenwoordigers oor hulle verwagtings van die begroting.

Homeopatiese medisyne het geen invloed op minstens 68 kliniese gesondheidstoestande nie. Dis die bevinding van 'n omvattende studie deur die Australiese Nasionale Gesondheid- en Mediese Navorsingsraad. Boonop waarsku Duitse wetenskaplikes nou ook teen gesondheidsdienste en siekefondse wat homeopatie steun. Ivor Price praat hieroor met ons wetenskapkorrespondent, George Claassen.