Nuntii Latini

Suffrāgiīs in Brasiliā lātīs numerātīsque, Ludovīcus Ignātius Lūla da Silva quartum dēsignātus est praeses.  Alter candidātus, Flāvius Bolsonārus, auxiliō Argentīnōrum speculātōrum frētus in exilium fūgit, cum didicisset jūdicem Lūlae amīcum et sibi īnfestum decrēvisse litterās commeātūs sibi nullō crīmine accūsātō capiendās esse, nē in aliam quandam terram proficīscerētur.  Plērīque putābant Bolsonārum fore victōrem, ut cūius factiō, post alia comitia nuper habita, in senātū nunc plūrimum pollēret.  Itaque Lūlā dēsignātō et Bolsonāriō profectō forum bursāle Brasiliānōrum est quassātum, et pretium nummōrum decimā parte dēminūtum est, nec aerārium syngraphās pūblicās in auctiōnibus vendere potuit.

In Iordāniā terrōristae in Graecam ecclēsiam Sancti Georgiī impetum et strāgem caedemque Christiānōrum fēcērunt.  Novem occīsī sunt, quadragintā vulnerātī.  Abdallāh rēx Iordānōrum, quī ipse superstitēs in nosocomīō cōnsōlābātur, imperāvit custōdibus ut terrōristās ferreā manū reprimerent.

Suffrāgiīs in Serbiā lātīs numerātīsque, Alexander Vučić, quī duodecim annōs rem pūblicam administrābat, concessit ā discipulōrum factiōne sē victum esse.  Duōs enim annōs adversus eum reclāmāverant discipulī, quippe quī corruptōs magistrātūs aegrē ferrent.  Incertum autem est, quis futūrus sit minister prīmārius.

In Hispāniā ad septuāgintā hominēs periērunt, et multī aliī vulnerātī sunt, cum alterum trāmen ferriviārium celeriter mōtum in alterum statūtum incurrisset.

Maria Corīna Machādō, Νīcolāō Madūrō tyrannō opposita atque ob eam oppositiōnem Nobeliānō praemiō pācis decorāta quae praemium suum praesidī Americānō dōnāvit, in Venetiolam regressa est.  Madūrō enim sublātō, Corīna Machādō cupit viam suīs aperīre ad comitia populāria habenda.

Suffrāgiīs in Columbiā Britannicā lātīs numerātīsque, factiō Cōnservātīva prīmam victōriam post ferē centum annōs reportāvit, et sexāginta quattuor senātōrēs ē nōnāgintā tribus habēbit.  Ex alterā parte, factiō Nova et Populāris, quae sex annōs prōvinciam administrābat, vīginti et septem senātōrēs obtinet.  Nam ēius dux, David Eby, quī et minister prīmārius prōvinciae erat et duōs aliōs annōs summum magistrātum gerere poterat, subitānea comitia dē imprōvīsō et sine causā indīxit, quibus Eby sēmet ipse honōribus officiīsque prīvāvit et auctōritātem suae factiōnis perdidit.

Americānōrum minister bellīs gerendīs praepositus dīxit īnstitūta Cōnfūtiāna esse perīculō reīpūblicae.  Nam Sīnēnsēs dictitant sē īnstitūta Cōnfūtiāna ideō condere, ut suum modum vivendī lātius dīvulgent; sed magistrātūs Americānī dīcunt īnstitūta rēvērā eō spectāre, ut nova inventa surripiant et vōcem Sīnēnsis factiōnis communisticae prōpāgārent.  Ministrī mīlitārēs agunt, ut īnstitūta claudantur.

Lūtētiae Parīsiōrum in harpastō Americānō lūsōrēs Pittsburgiānī, quī “Steelers” sīve “Chalybeī” appellantur, Sanctōs lūsōrēs Neoaurēliānōs vincērunt.  

Christīna Lagarde, praeses argentāriae Eurōpaeae, dīxit sē officium mēnse Februāriō dēpositūram.  Quō factō poterunt dūcēs Eurōpaeī novum praesidem sēligere ante comitia in Galliā habenda.  Dīxit enim Lagarde sē cupere dē rēbus factiōsīs nōnnulla dīcere, quae prae officiō nequit dīcere.

Hāc hebdomade duō histriōnēs inter nōtissimōs numerandī, vidēlicet Valthārius Koenig et Patrīcius Stewart, ad astra migrāvērunt.  Patrīcius Stewart, histriō Shakespeariānus quī Sēiānum ēgit in spectāculō “Ego, Claudius” īnscriptō, etiam equēs baccalaureus creātus est ā regīnā Britannōrum.  Koenig autem Alfrēdum Bester ēgit in “Babylōniā Quīntā.”  Quōrum uterque in Classe Stellārī meruit et fortiter īvit, quō nēmo anteā īverat, in fabulīs dē itinere stellārī.  Stewart vīxit annōs octōgintā sex, Koenig nōnāgintā.

Nayib Bukēlē, praeses Salvātōriānōrum, centūriam ēlectōrum mīlitum in Hāītiam mīsit, quī quattuor aliōs mīlitēs ā latrōnibus Hāītiānīs captōs aut redūcerent aut ulcīscerentur.  Lātrōnēs enim grassantur per Hāītiam, cūius rēs pūblica abhinc duōs annōs omnīnō corruit.  Itaque Coetus Omnium Gentium cōpiās ad lātrōnēs coercendōs immīsit, quibus inceptīs Salvātōriānī auxilium technicum praestābant.  Cōpiae autem Omnium Gentium nōndum potuērunt captōs Salvātōriānōs invenīre, quārē Bukēlē alteram centūriam mīsit, alteram iam mittit.

Praeses Americānus interdictiōnem, quā nōn licuerat Americānīs oleum Dīseliānum ā Russīs emere, et aliās interdictiōnes in magistrātūs et societātēs Russōrum lātās sustulit.  Ūcrāīnēnsibus autem minus favēre coepit, atque etiam hortātus est ut novus quīdam dux creētur in locum Volodimīrī Zelenskiy, quippe quī Russōrum facultātem petroleī aliīs gentibus exportandī oppugnāverit.  Zelenskiy etiam rūmōrem cōnfirmāvit, Americānōs et Russōs et Sinēnsēs sine Ūniōne Eurōpaeā colloquī velle dē armīs atomicīs cohibendīs necnōn dē pāce inter Russōs et Ūcrāīnēnsēs compōnendā.  Prīma igitur nāvis onerāria, oleō Dīseliānō plēna, iam proficīscitur Novum Eborācum petēns.

Russī et Ūcrāīnēnsēs, quōs uxor praesidis Americānī convocāvit, indūtiās fēcērunt ut Oleshkiae urbis cīvēs, quī omnēs aetāte prōvectī sunt, ē bellī perīculō dēdūcī possent.

In Canadēnsium castrīs Wainwright dictīs et in Albertā prōvinciā sitīs, quattuor mīlitēs periērunt et vīgintī et septem sunt vulnerātī, cum grānāta sīve pyrobolus manuālis incendium excitāsset, quod ventī in magnam et subitāneam conflāgrātiōnem auxissent.

Americānī administrōs lēgātiōnis cīvēsque suōs dē Arabiā Saudiānā dēdūcunt.  Quod palam dīcitur fierī propter impetūs Houthiānōrum, quī missilia in Arabiam Saudiānam mittunt; sed Americānī cīvēs suōs dē terrīs fīnitimīs quoque dēdūcunt, quod timōrem movet, nē Irāniānī missīlibus aliās gentēs oppugnent.  Russī quoque feruntur suōs cīvēs dē Irāniā dēduxisse, quod metum bellī auget.  Aegȳptōrum autem senātus dēlīberat, an mīlitēs ad Arabiam Saudiānam mittantur quī Houthiānōs arceant.  

Lemovīcum cūria mūnicipālis, quae centum et sexāgintā annōs et per duo bella tōtīus mundī steterat, ā tumultuōsīs est incēnsa.  Per tōtam Galliam reclāmātur: nam aliī iuvenēs prō ēducātiōne puerōrum, aliī aetāte provectiōrēs in aucta pretia omnium reclāmant; et ā magistrātibus dīcuntur aliī factiōsī, vidēlicet fautōrēs partium sinistrārum, tumultūs fovēre, dum aliī mōre lātrōnum nihil quaerunt nisi ut tabernās dīripiant et mercēs fūrentur.  Emmanuēl Macron, praeses Gallōrum, dīxit magistrātūs operam dātūrōs esse ut reclāmātōrēs legitimī ā tumultuōsīs et fūribus discernerentur, ut vox populī audīrētur et salus populī defenderētur.

Reclāmantibus discipulīs Eduīnus Rama minister prīmārius Albaniēnsium, quī modo ūnō abhinc annō quartum summus magistrātus est inaugurātus, nūntiāvit sē nōn in animō habēre magistrātū sē abdīcāre nec nōva comitia indīcere.  Reclāmātōrēs autem, quī aliquot mēnsēs nova comitia indicānda sine vī poscēbant, nunc per urbium viās cum custōdibus pūblicīs pugnant et aedificia pūblica combūrunt.  

In Cornū Africae, lātum bellum imminēre vidētur, cum tam Aethiopēs quam Erythraeī suōs mīlitēs ad fīnēs addūcant et aliae gentēs fīnitimae auxilium clandestīnum parent.  Neanthopolis, sīve Addis Ababa, iam quassāta est dirūptiōnibus, quās Aethiopēs dīcunt āeroplānīs automatīs factās esse.  Aethiopēs autem iam cēpērunt Mecellam, caput Tigrāiēnsium, quī sēditiōnem faciunt; atque Erythraeī mīlitēs in fīnēs Aethiopum ingressī et ab Aethiopibus repulsī feruntur.  Abiy Ahmed, Nobeliānō praemiō pacis honestātus, quī modo tertium creātus est minister prīmārius Aethiopum, ōrātiōnem inaugurālem habuit quā dīxit sē operam dātūrum, ut Aethiopēs portum maritimum consequerentur, sed Erythraeī terram inter Aethiopiam et mare possident.  Etiam Aegyptī et Sudaniānī cum Erythraeīs agunt, quippe quī sollicitī sint dē Nīlō flūmine, quod Aethiopēs aggere coercunt.

In Ōrā Dīvite, quae ōlim inter tūtissimās terrās numerābātur, cum tamen scelerātī nuper coepissent grassārī, novus carcer ā Laurā Fernandesiā praeside inaugurātus est.  Exemplar hūius carceris fertur esse situm in Salvātōriā, cūius praeses Nayib Bukelē bellum in scelestōs fert.  Incertum autem est, an Fernandesia velit sīc Bukelē imitārī ut imperium extraordinārium sibi īnstituat et auctōritāte regnet extrēmā.

In Populārī Rēpūblicā Congī, Iōsēphus Kabīla, praesēs Congicōrum ā cīvibus bis ēlectus et ā mīlitibus Congicīs capite damnātus, nuper dux factus est rebellium, quī ōlim M23 vocitābantur, quōrum propositum est rempūblicam ēvertere.  Quibus sēditiōsīs Ruandēnsēs feruntur clandestīnum auxilium ferre.  Nam ā Ruandēnsibus in Congō mīlēs mercennārius Neozealandēnsis occīsus est, alter tamen Americānus est vulnerātus.  

Daniel Ortēga tyrannus Nicarāguēnsium et Rosāria Murillō tyranna lēgātum Americānum recūsāvērunt.    Ortēga enim et Murillō, quī adversāriōs vī reprimunt, mēnse Iūliō populārem formam reīpūblicae sustulerant et nēgāverant ulla comitia habenda, quod et fīnitimae gentēs et Coetus Omnium Gentium improbant.  Itaque Nicaragua ab institūtīs internātiōnālibus et fīnitimīs recēdere coepit.

Reijo Pitkäranta, quī triginta annōs nuntiōs Latīnōs Radiophōniae Finnicae Generālis collēgit et Latīne reddidit, mēnse Septembrī suprēmum diem obīit.  Cūius exemplō et clārissimā vōce nōs et aliī plūrimī per tōtum orbem terrārum sumus ad ūsum sermōnis Latīnī adductī.  Vīxit ille annōs octōginta ūnum.

Gāius Licoppe, vir sermōnis Latīnī perītissimus et praeses Melissae sodalitātis, ā quā etiam commentāriī periodicī novā Latinitāte abundantēs ēduntur, diē duodecimō hūius mēnsis fātō cessit.  Vīxit annōs nōnāginta quinque.

Suffrāgiīs cīvium Brasiliānōrum lātīs numerātīsque, nōndum liquet quis futūrus sit praeses Brasiliānōrum, sed constat partēs dextrās magnam auctōritātem in senātū adeptās esse.  Itaque diē vīcēsimō quīntō hūius mēnsis comitia dēnuō habēbuntur ut ē duōbus candidātīs populus ūnum faciat praesidem.  Candidātī sunt, ē parte sinistrā, Ludovīcus Silvestris, ter praeses, vir octōginta annōs nātus quī ūnum annum vinculīs pūblicīs tenēbātur; et, ex alterā parte Flāvius Bolsonārus, senātor, quadrāgintā quinque annōs nātus, cūius pater praeses fuerat et vinculīs nunc tenētur.  

Petrus Sanctius, Hispānōrum minister prīmārius et sociālista, ut quī lēgēs in senātū ferre nōn iam posse vidērētur, coāctus est senātum dissolvere et nova comitia indīcere.  Spērat enim sē posse populō suadēre ut auctōritas sua rōborētur, sed perīculum etiam est, nē dextrae partēs prōficiant.  In viīs autem tumultuāntēs cīvēs novās postulant lēgēs, quibus pretium aedium minuātur.

In Britannōrum comitātū Glocestriēnsī, grex quinque iuvenum dēprehēnsus est extra castra āeria, unde Americānī āeroplāna bombifera in Irāniānōs mittere solent.  Paulō posteā iuvenēs vadimōniō līberātī sunt; Londiniī autem duo aliī suspiciōne impetūs parandī comprehēnsī sunt et vadimōniō līberātī.  Posteā relātum est Irāniānōs voluisse automatīs āeroplānīs damnum in Americānōs inferre; et Andreās Burnham, minister prīmārius Britannōrum, certīs indiciīs dīxit Irāniānōs partem in terrōre parandō ēgisse.  Irāniānī tamen lēgātī negant suōs facinus parāvisse.  Nihilōminus Americānī sua āeroplāna bombifera dē castrīs Britannicīs in Americam rēduxērunt.  In Huntingdoniēnsī autem comitātū, duo Letticī in castrīs speculātōrum dēprehēnsī sunt.  

Diē Mercuriī āeroplānum Dubāium, quod ad Isrāēlem volābat, coāctum est Tabūcī in Arabiā Saudiānā descendere, cum alter gubernātor, Hamām al-Hammāmī nōmine, alterum percussisset.  Percussor ā vectōribus vinctus est.  Is fertur voluisse āeroplānum in āeroportum Isrāēlītārum dīrigere, quo plūrēs hominēs interficeret.

Pretium syngraphārum, quās vendit rēs pūblica Gallōrum, magnōpere auctum est, cum creditōrēs metuant ut factiōsī senātōrēs aerārium cum temperantiā administrāre possint.  Nam partēs tam dextrae quam sinistrae magna stipendia prōmittunt senibus rude dōnātīs, quī iam māiōrem pecūniam accipiunt quam opificēs quī suō labōre pānem lucrantur.  Magistrātūs autem Gallicī iam adeō māiōrem pecūniam dē fiscō ērogant quam accipiunt, ut aes aliēnum māius sit quam annōna tōtīus reīpūblicae.

Aethiopēs feruntur Mecellem, caput Tigrāiēnsium, cēpisse: nam Pax Praetoriāna, quam Ūniō Africāna abhinc quattuor annōs composuit, vidētur in irritum cecidisse.  Aethiopēs porrō Erythraeānōs et Aegyptōs et Sudāniēnsēs accūsant, quod auxilium Tigrāiēnsibus ferant, quod omnēs illae gentēs negant.

Augustus Hanning, ōlim Germānīs speculātōribus praefectus, comprehēnsus est crimine speculandī.  Fertur enim Germānōrum sēcrēta Atropatēnēnsibus et Sīnēnsibus vendidisse.  Ambigitur itaque an dēbeant sociī, ut Americānī, Germānīs cōnfīdere.

Diē Saturnī, quī undecimus diēs nōnī mēnsis secundum rātiōnem Mahometānōrum fuit, Ali Khamēnī, tyrannus Irāniānōrum, aliīque ēiusdem regiminis magistrātūs et dūcēs in ūnum locum convōcātī, sunt āb Isrāēlītīs et Americānīs, quī scīvērunt ubi Irāniānī essent et quid agerent, subitō interfectī, ac castra et missilia et arma in Irāniā condita sunt oppugnāta.  Quō factō Irāniānī mīlitēs, ultimīs mandātīs ante impetum datīs pārentēs, missilia nōn sōlum in Israelītās iēcērunt sed etiam in Baharīnam, et in Coniunctōs Phylarchōs Arabicōs, et in Cuvaitō, et in Iordaniam, et in Ōmānam, et in Quatariam, et in Arabiam Saudōrum, et in Sȳriam, necnōn etiam in Cyprum īnsulam Eurōpaeam; unde ferē tōta regiō Arabica est rārā concordiā in īram conjuncta adversus Irāniānōs.  

Regimen autem Irāniānum fōns et orīgō fuit terrōris; et Hezbollah conjūrātōs terrōristās in Libanō, Hamās inter Palaestīnōs, Houthiānōs in Iemeniā aluit ut gentēs vīcīnās convelleret; necnōn Venetiolānōs aluit, ut vexāret Americānōs, quōs Khamēnī “magnum Satān” vocitāre solēbat.  Domī autem idem regimen innumerābīlia mīlia cīvium trucidāvit et lībertātem repressit.  Khamēnī tamen interfectō, iuvenēs in viīs exsultant et monumenta tyrannī evertunt.  Hortātur praeses Americānus ut Iraniānī cīvēs in oppressōrēs insurgant et regimen tyrannicum ēvertant.

Ursula von der Leyen, praeses Europaeae Commissiōnis, diē Saturnī nūntiāvit suum Collegium Secūritātis diē Lūnae convōcandum.  Keir autem Starmer, quī ministrī prīmāriī mūnere adhūc fungitur in Britanniā, brevem ōrātiunculam habuit, quā negāvit Britannōs quicquam ēgisse.  Ante impetūs factōs, Starmer recūsāverat nē permitteret Americānīs ūtī castrīs Britannōrum, ut in īnsulīs Chagōs dictīs; sed cum Irāniānī coepissent missilia in omnēs gentēs fīnitimās et ad mīlitēs Britannōs sine discrīmine iactāre, Starmer aliter cēnsuit, ut licēret Americānīs ūtī castrīs.

Magsitrātūs Afghānī, quī et Talibānī appellāntur, diē Iovis subitō coepērunt bellum in Pacistānōs gerere longē melius exercitātōs atque armātōs.  Illī igitur invicem bellum apertum gerunt in Talibānōs et impetūs aēriōs tam Cabūrae, in capite Afghāniae, quam in Candahāriam regiōnem, sēdem Talibānōrum, fēcērunt.

Quamquam indutiae in Libanō factae sunt, Isrāēlītae impetūs aēriōs in terroristās Hezbollah dictōs faciunt, in quibus praecipuē dūcēs missilibus praefectī occīduntur.  Grex ille Hezbollah dictus ab Īraniānīs alitur, sed longē dēbilior est nunc quam priōribus annīs fuit.  Nawaf Salam minister prīmārius Lībanus dīxit Hezbollah ā mīlitibus Lībanīs interdictum irī.

Nicolāō Madūrō inter hōrās sublātō, et Khamēnī inter prīmum impetum interfectō, Russī quīntum iam annum bellum, quod putāverant intrā trēs diēs ad fīnem perducendum, in Ūcrāīnēnsēs gerere pergunt.  Diē autem Saturnī subitō atque ex inopinātō Cyrillus Budanov nūntiāvit Russōs nōn iam nōlle pignora secūritātis accipere quae Americānī prōposuissent.

Diē Martis Americānī nūntiāvērunt sē cum Aequitōriānīs coniunctōs in narcoterroristās facere impetum.  Diē autem Mercuriī magistrātūs Aequitōriānī lēgātōs omnēs Cubānōs declārāvērunt persōnās nōn grātās et iussit ante diem Veneris ē fīnibus Aequitōriae ēgredī.

Novo annō ineunte, doctī hominēs populāris opīniōnis metiendī perītī referunt quī summī magistrātūs ā suīs cīvibus probentur et quī improbentur.  Sōlī, quī ā māiōre parte suōrum probantur, sunt Narendra Mōdī Indus, Sanāē Takaīchī Iāpō, Lee Jae-Myung Corēānus Merīdiōnālis, et Javier Milei Argentīnus.  Ā duābus quīntīs partibus suōrum probantur Donaldus Trump Americānus, Lula da Silva Brasiliānus, Geōrgia Melōnī Ītala.  Nōn nisi ā tertiā parte suōrum probantur Frederīcus Merz Germānus, Recep Tayyip Erdogan Turca, Petrus Sanchez Hispānus.  Maximē autem omnium improbantur Keir Starmer Britannus et Emmanuēl Macron Gallus.

Ab Iūliō mēnse usque per Septembrem annōna tōtīus reīpūblicae quattuor partibus centēsimīs crēvit, quod incrēmentum tam cīvium spem quam doctōrum hominum exspectātiōnem superāvit.  Scelera adeō pauciōra quam priōre annō patrantur, ut numerus raedārum hōc annō sublātārum quartā parte sit dēminūtus, et quīntā parte numerus dēminūtus sit interfectōrum.  Pretia sortium in forō bursālī altiōra stant quam umquam anteā.

Diē Nātīvitātis, praeses Americānus nuntiāvit sē fēlīcem diem nātālem Christī Mahometānīs terrōristīs exoptāre, quī in Nigeriā stragem Christiānōrum fēcissent; nam eōdem diē, paulō ante praesidis nūntium, mīlitēs Americānī stragem eōrundem terrōristārum fēcerant.  Petrus autem Hegseth, Americānus minister bellī, grātiās ēgit Nigeriānīs magistrātibus, quī permīsissent ut impetus fīeret.  Ex eō tempore pergunt Nigeriānī contrā terroristās Mahometānōs pugnāre.

Tertiō diē mēnsis Iānuāriī, Nīcolāus Madūrō, illēgitimus tyrannus quī rempūblicam Venetiolānōrum ēverserat et cum Irāniānīs aliīsque mōliēbātur rempūblicam Americānam subvertere, in dīciōnem Americānōrum redactus est, ut reus fīeret.  Incursiō, quā mīlitēs Americānī tyrannum cēpērunt, intrā paucās hōrās est absolūta, et omnēs Americānī reductī sunt integrī et incolumēs, quamquam triginta et duo Cūbānī, satellitēs tyrannī, sunt interfectī.  Michāēl Diaz-Canel, quī hāc hebdomade tyrannus pergit esse Cūbānōrum, “Patria aut mors!” clāmāvit, et “Vincēmus.”  Dīxit autem praeses Americānus aliīs novi orbis terrārum dūcibus principibusque cavendum esse, nē id, quod Madūrō accidisset, dēnuō alicui accideret alterī.  Claudiae Scheinbaum, praesidī Mexicānōrum, posteā vīsum est triginta et septem narcoterroristās in dīciōnem Americānōrum reddere, quōs illī petīverant.

Ex eō tempore Americānī nautae etiam coepērunt nāvēs petroleāriās capere, quibus interdictum petroleum vehēbātur ut lucrum variīs tyrannīs redderētur.  Unam nāvem, ōlim “Bellam” deinde “Marinēram” nōmine, prope Islandiam Americānī intercēpērunt coram nāve subaquāneā Russicā, quæ tamen Americānīs nōn obstitit.  Quinque nāvēs captae sunt, vidēlicet Skipper, Centuries, Marinera, Sophia, Olina sīve Minerva M.

Praeses Americānus monuit nec petroleum nec pecūniam ā Venetiolā ad tyrannidem in Cūbā īnsulā sustinendam lātum īrī; melius fore Cūbānīs negōtium cum Americānīs agere dē suīs rēbus futūrīs.  Novī enim magistrātūs Ventiolanī nunc cum Americānīs agunt, ut Americānī petroleum Venetiolānum emant, cūius lucrum ad Venetiolam restaurandam nōn sine moderātiōne Americānā ērogētur.  Cūbāna autem dominātiō, quae sexāginta sex annōs populum nōn solum suum opprimit sed etiam Ventiolānum oppressit, et quae strenuē mōlītur rempūblicam Americānam subvertere, nihil petroleī accipiet.

Hōc mēnse Americānī ūndecimum impetum in Chalifātum Islāmicum lēge tāliōnis fēcērunt, postquam priōre mēnse trēs Ameriānī sunt ab ūnō terroristā interfectī.  Petrus Hegseth, minister bellī, “Numquam,” inquit, “oblīvīscēmur, neque īra nostra umquam resīdet.”  Magistrātūs Syriānī, quī in hāc rē cum Americānīs stant, quinque terroristās comprehendērunt.

Tō Lam, secretārius generālis factiōnis quae communista verbōtenus dīcitur et summus magistrātus Vietnamiēnsium, quinque annōs perget clavum reī pūblicae tractāre.  Lam, quī abhinc duōbus annīs coepit magistrātum exercēre, negōtiātōrēs mercātōrēsque, id est prīvātam prōvinciam reī oeconomicae, adeō fovet dum pūblica ministeria restringit, ut Vietnamia magnōpere dītēscat.

Sanāē Takaīchī, ministra prīmāria Iāpōnum, īnferiōrem cameram senātōriam hodiē dissolvit et comitia octāvō diē mēnsis Februāriī habenda indīxit.  Quō audītō senātōrēs “Banzae” ex mōre clāmāvērunt.  Takaīchī, prīma fēmina dux facta Iāpōnum, ā septēnīs ē dēnīs cīvibus laudātur, itaque spērat fore ut possit comitiīs habendīs factiōnis suae auctōritātem rōborāre.

In Ītaliā pūblicī accūsātōrēs nūntiāvērunt Batāvōrum auxiliō novem hominēs esse comprehēnsōs, quī videntur stipem hūmānitātis causā collectam potius in ūsum terroristārum dēstinasse.  Feruntur enim sub falsīs caritātis nōminibus octōgiēs centēna mīlia dollarōrum terroristīs dedisse Hamas dictīs.

Intrā septem diēs quattuor trāminibus ferroviāriīs in Hispāniā variae calamitātēs accidērunt.  Quadraginta et trēs hominēs sunt interfectī.

Diē Mercuriī prope Domum Albam Rahmanullah Lakanwal, vir Afghānus ūndētrīginta annōs nātus qūi Bellinghamiae in Vasintōniā cīvitāte habitābat, in duōs mīlitēs Americānōs impetum fēcit, quōrum alter, Andrēas Wolfe nōmine, vulnerātus est, altera, Sarah Beckstrom, interfecta.  Lakanwal, quī illud “Allāhu acbar” exclāmāvit, vidētur impetum fēcisse terrōris prōmōvendī causā.  Tertius mīlēs, custōdibus praefectus quī nōn procul erat sed brevī tantum pugiōne armātus erat, cohibuit quōminus Lakanwal aliōs vulnerāret.  Quibus factīs praeses Americānōrum ferōciter prōpōnit, nē cui aliēnigenae liceat ē terrīs tertiī orbis in Americam immigrāre, atque ut illī, quī iam immigrāverint sed domesticam tranquilitātem ēvertere velint, expellantur; porrō ut subsidia beneficiaque aliēnīs concessa abrogentur.  Ministerium rēbus externīs praepositum nūntiāvit nēminem Afghānum in fīnēs Americānōs receptum īrī.

Magistrātūs Americānī referuntur esse parātī nova in illēgitimum tyrannum Venetiolānōrum temptāre, quōrum tamen nec tempus nec magnitūdō nūntiātur.  Monētur tamen nē quod āeroplānum Venetiolam trānsvolet, quārē societātēs āeriae ā commeātū super terram Venetiolānōrum nunc abstinent.  Diē Lūnae magistrātūs Americānī terrōristārum nōmine dēsignāvērunt cōniūrātōs latrōnēs, quī “syndicātum sōlis” vocitantur et cūius caput, Nicolāus Madūrō illēgitimus tyrannus, negat sē ēius caput esse.  Etiam in Venetiolā terroristae quī sub nōmine Hezbollah coniūrātī sunt commerciō venēnī intersunt, quia tyrannus Venetiolānus foedus fēcit cum Irāniānīs, strenuīs auctōribus fautōribusque terrōris.  Nunc autem magistrātūs Americānī et Qatarēnsēs Nīcolāum Madūrō hortantur ut tyrannidem dēpōnat et in luxuriōsum exilium, fortasse in Qatar, fūgiat.

Praeses Irāniānōrum dīxit, tam ob nimium numerum incolārum quam quia aqua dēficeret, oportēre sēdem reīpūblicae Irāniānōrum tranferrī.  Nam Tehrānum, caput Irāniānōrum, aquā adeō caret, ut etiam ante hiemem possit dērelinquī et dēsōlārī.  Quindeciēns centēna mīlia hominum Tehrānī habitant, ubi magistrātūs, quippe quī terrōrem in aliēnīs terrīs prōmōvēre quam suōs cīvēs domī tuērī mālint, copiam aquae cīvibus suppeditandam neglegunt.

Praeses Americānus ēdīxit portōria, quae in carnem būbulam, caffēam, theobrōma ē Brasiliā in Americam importanda imposita erant, dēminuenda, id quod etiam dē aliīs cibīs importandīs fēcit, nē pretia nimis augērentur.  Nam ē Brasiliā importātur tertia pars omnis caffēae, quam hauriunt Americānī.  Pretium petroleī nunc valdē dēminuitur, ut minōra etiam erant pretia cibī, quem Americānī mēnse Novembre inter sollemnem supplicātiōnem cōnsumpsērunt.  

Ā praeside Americānō nova condita est ratiō, quā singulīs īnfantibus dābitur mille nummōrum in forō bursālī collocandum.  Licēbit autem parentibus aliīsque cognātīs quīna mīlia singulīs annīs contribuere, ut pecūnia collocāta mīrum in modum cum dēcursū temporis crēscat, donec īnfans ad adultam aetātem perveniat.  Ūnusquisque igitur cīvis Americānus pecūlium habēbit, quō vel studia acadēmica suscipiat vel domum sibi comparet liberīsque augeātur, vel ad alia māiora et futūra pecūniam sibi cōnservet.

Centum ēlectī mīlitēs Americānī helicopterīs vectī et ducentī Puntlandiānī impetum fēcērunt in specūs montium Cal Miskaad dictōrum.  Post quattuor hōrās nōn sōlum Syrī, Turcae, Aethiopēs inter terroristās interfectī sunt sed etiam Abdul Qadir Mumin, dux Calīphātūs Islamicī, occīsus esse putātur.  Omnēs Americānī mīlitēs integrī incolumēsque sunt reductī.  Puntlandiānī autem sperant ante fīnem annī omnēs terroristās ē suā terrā exterminātum īrī.

Suffrāgiīs populāribus in Guinēā Bissaviēnsī lātīs, mīlitēs subitō nūntiāvērunt sē summam potestātem cēpisse et rem pūblicam ēversisse.  Quō factō, Ousmān Sōncō, minister prīmārius Senegālēnsium, negāvit Guinēam Bissaviēnsem esse ēversam, et hortātus est ut suffrāgia populāria numerārentur.  Nihilōminus Horta Inta-A Na Man dux ā mīlitibus acclāmātus est ad tempus praeses Guinēānōrum Bissaviēnsium, quī suōs cīvēs ā narcoterroristīs defenderet, et Umārō Sissocō Embalō, prior praesēs, Brazzapolim Congēnsium cōnfūgit.  Guinēa autem Bissaviēnsis malam inter gentēs fāmam habet, quod per ēius portūs ex Americā merīdionālī in Eurōpam magna vīs cocaīnī trānsfertur.

Andrēās Iermak, cōnsiliārius Volodomīrī Zelensky praesidis Ūcrāīnēnsium, mūnere abdīcāvit, cum domus sua excussa esset ā magistrātibus, quī quaestiōnem habērent in corruptōs.  Zelensky nuper suōs ministrōs energīae et iūstitiae praepositōs dīmīserat, et ēius socius Timur Mindich putātur in Isrāēl fūgisse.

Tīmotheus Davie, director generālis Britannicae Societātis Divulgātiōnī, quae saepius litterīs compendiāriīs BBC vocitātur, et Deborah Turness, ēius sociētātis diurnāriīs praefecta, coāctī sunt mūneribus abdicāre, cum alia societas diurnāriōrum, quae Tēlegraphēma dīcitur, dēmonstrāvisset diurnāriōs Britannicae Societātis Divulgātiōnī ōrātiōnem praesidis Americānī partibus omissīs aliīsque falsē coniunctīs consultō et cōnsciōs dētorsisse, ut ille contrārium suae ōrātiōnis dixisse vidērētur.  

Britannī diē Martis inhibuērunt quōminus suī speculātōrēs Americānīs auxilium darent, cum ipsī coepissent timēre nē Americānī, quippe quī iam ad octōginta narcotromocratās et mercātōrēs venēnī indemnātōs per mare Caribbicum interfēcissent, iūs gentium violārent.

Eōdem diē ad mare Caribbicum advēnit duodecima Americāna classis, Thomā Moninger thalassiarchō, cūius praetōria et āeroplānigera nāvis, Geraldus Ford nōmine, est omnium longārum nāvium maxima.  Adsunt etiam secundus exercitus classicōrum, Calvertō Worth imperātōre, cūius nāvis praetōria et helicopterigera appellātur Īwō Jīma; necnōn aliae longae nāvēs missilibus refertae atque etiam nāvēs subaquāneae.  Tot et tantīs copiīs convocātīs, quoniam Venetiolānus tyrannus illēgitimus illēgitimō commerciō venēnī lucrātur quō cīvēs Americānī necantur, iūs gentium longē vehementius violārī potest.  

Magistrātūs Americānī quingentiēns centēna mīlia nummōrum prōmittunt eī, quīcumque Nīcolāum Madūrō tyrannum Venetiolānōrum in dīciōnem reddiderit Americānam.

Keir Starmer, minister prīmārius Britannōrum quī favōre populī vix fruitur, nēgāvit sē rūmōribus labefactum esse, neque sē in suōs ministrōs neque illōs in sē coniūrāre.

Senātōrēs factiōnis sinistrae sīve Dēmocraticae, quī quadrāginta diēs recūsāverant nē pecūniam magistrātibus ērogārent ad rempūblicam gerendam, cum nihil quod sperāverant efficere posse vidērentur, manūs tandem dedērunt.  Itaque satis pecūniae ērogātur ut magistrātūs rempūblicam diēs gerant septuāginta.  Quod comitia populāria ad senātōrēs ēligendōs annō proximō habēbuntur, fierī vix posse vidētur quōminus tālēs rixae iterum iterumque incommoda dītiōribus commeātū āeriō interdictīs et prōlētāriīs congiāriō prīvātīs miseriās afferant.

Ahmed al-Sharā, quī ōlim al-Jolānī vocitābātur, praeses Sȳrōrum, Vasintōniam urbem vīsitāvit diē Lūnae, ubi cum praeside Americānō collocūtus est dē lēge Caesariānā abrogandā.  Nam illa lex, quae commercium inter Americānōs et Bashar Assad tyrannum Sȳrōrum interdīxerat, eōdem tyrannō in exilium expulsō nunc obstat, nē post bellum cīvīle Sȳrōrum rēs renoventur.

In capitibus tam Indiae quam Pakistaniae gemina pyrobola dīrupta sunt, quibus ad vigintī hominēs sunt interfectī.  Pax tamen, quam mēnse Māiō praeses Americānus utrīque gentī suāsit, manet, dum quaestiō in auctōrēs terrōris habētur.

Cum quaestiō dē pecūlātiōne corruptiōneque in Ūcrāīnā habērētur, ministrī tam iūstitiae quam energīae præfectī honōribus officiīsque sē abdīcāvērunt, ut quī coniūrātī referrentur in pecūlātiōnem.  Timur Mindich, amīcus praesidis Ūcrāīnēnsium, quī fōns et princeps coniūrātiōnis esse putātur, fūgit.  Mīliēns centēna mīlia nummōrum sublāta esse feruntur.

Diē Sōlis Chiliēnsēs populāria suffrāgia ferent.  Doctī hominēs quī populārem ōpīniōnem metiuntur referunt scelera, mīgrātiōnem, gregēs coniūrātōrum latrōnum animōs cīvium magis occupāre quam rem oeconomicam, salūtem pūblicam, īnstitūtiōnem puerōrum.  Quamquam Chilēnsēs inter tūtissimās gentēs merīdiōnālis Americae manent, numerus tamen hominum ā percussōribus occīsōrum inter decennium est bis auctus.  Quod nōn sēiungitur ab auctō numerō Venetiolānōrum, quī in Chiliēnsium fīnēs ingressī sunt, unde fit ut Chilēnsēs nōmen “Trāminis Arāguae” audīre coeperint.

Sanaē Takaīchī coram senātū Iāpōnum dīxit sibi necesse vidērī respondēre, sī Formōsa īnsula, quae suī iūris est, ā Sinēnsibus oppugnārētur.  Quod Sīnēnsibus, utpote quī Formōsam īnsulam, quae suī iūris est, in suā dīciōne esse falsē dīcerent, offēnsiōnem praebuit.  Negāvit autem Takaīchī ab oppositō senātōre diē Lūnae rogāta sē posse nunc negāre Iāpōnēs arma atomica invēntūrōs, factūrōs, habitūrōs.  Sola enim est terra Iāpōnica, in quam arma atomica adhibita erant, unde diū negābātur nē Iāpōnēs arma atomica possidērent.

Cum factiōsī senātōrēs nōlint inter sē cōnsentīre dē pecūniā ad rempūblicam gerendam ērogandā, magistrātūs et grapheiocratēs et variī administrī pūblicī pergunt auctōritāte opibusque carēre, quibus mūneribus pūblicīs fungantur.  Congiāria, quibus prōlētāriī aluntur, et quōrum sumptus annīs recentiōribus mīrum in modum augētur, nōndum habentur, unde pauperēs querī coepērunt.  Dītiōrēs autem incommoda habent in itineribus volandō faciendīs, cum rectōrēs āeriī dēficiant commeātūs.  Quamquam nōn rārō fit hōc saeculō ut līs inter senātōrēs prohibeat, nē rēspūblica solitō mōre gerātur, hōc autem annō diūtius quam umquam anteā mūnera pūblica intermittuntur.

Nautae Americānī pergunt nāvēs, quae feruntur venēnō illicitō refertae esse, in utrōque marī prope Venetiolam et Columbiam mergere.  Hāc hebdomade trēs in marī Caribbicō, duo in marī Pacificō, interfectī sunt.  Americānī asserunt sibi licēre mercātōrēs venēnī, quōs narcotromocratēs sīve narcoterroristās vocant, indemnātōs occīdere, neque utrum iūre an iniūriā magnī facere videantur. Venetiolānī Columbiānīque vērō dīcunt piscātōrēs cēlōcibus piscātuī ineptissimīs instructōs et mediā nocte itinera clam facientēs esse contrā iūs et nullīs indiciīs illicitī commerciī divulgātīs inūriā occīsōs.

Matrītī diē Veneris custōdēs pūblicī nūntiāvērunt sē trēdecem hominēs comprehendisse, quōs dīcunt coniūrātōs esse sub nōmine Trāminis Araguae.  Quae societas latrōnum ab Americānīs accūsātur terrōris per orbem terrārum prōmovendī, sed ab Venetiolānīs, unde societas orīginem traxit, negātur exsistere.  Matrītēnsēs ūnā cum Venetiolānōs cēpērunt etiam varia venēna illicita, inter quae fuit “tūsī” sīve cōcaīnum roseum, quō insigne est Trāmen Araguae.

Praeses Americānus praesidēs quinque gentium mediae Asiae, vidēlicet Cazachōrum, Cyrgessōrum, Tadzikōrum, Turcomannōrum, Uzbecōrum, Vasintōniae convēnit, ubi collocūtī sunt dē commerciō metallōrum augendō.  Cassym-Jomart Tokāyev, praeses Cazachōrum, conventum ipsum laudāvit ut initium novae aetātis, quā America et media Asia ūnā florēret; Shavkat autem Mirziyōyev, praeses Uzbecōrum, laudāvit potius praesidem Americānum ut praesidem tōtīus orbis terrārum.  Quae gentēs cum Russīs sociātae parum prosperant.

Senātōrēs Perūviānī cēnsuērunt Claudiam Sheinbaum, praesidem Mexicānōrum, persōnam nōn grātam dīcendam.  Nam Mexicānī iūs asȳlī dedērunt Elizabēthae Chavez, ōlim ministrae prīmāriae Perūviānōrum, postquam etiam in suōs fīnēs accēperant uxōrem filiōsque Petrī Castillo, ōlim praesidis, quī nunc pūblicīs vinculīs tenētur.  Perūviānīs enim mōris est pristinōs magistrātūs in carcerem condere.

In Sudāniā, ubi bellum cīvīle inter magistrātūs et latrōnēs quī sē Rapida Auxilia appellant, utraque pars indūtiās, quās Americānī hūmānitātis causā prōposuērunt, cōnsentiunt esse observandās.  Rapida enim Auxilia nuper al-Fashir urbem cēpērunt, quae ultima in Darfur prōvinciā dictō magistrātibus audiēbat.

In Geōrgiā reī factī sunt octō hominēs in rē pūblicā versātī, quī magistrātibus oppōnuntur et in quōrum numerō etiam Michaēl Saakashvilī, ōlim praeses, habētur, crīmine ēversiōnis reī pūblicae affectātae.  Magistrātuum factiō in Russōs prōniorem sē praebet quam in Ūniōnem Eurōpaeam.

Cōnsortēs societātis Tesla dictae maximam in memoriā hominum mercēdem approbāvērunt Ēlōnī Musk solvendam, quī intrā decennium deciēns mīliēns mīliēns centēna mīlia nummōrum accipiet.

Hī sunt Nūntiī Latīnī Vasintōniēnsēs, quī in Occidentālī studiōrum Ūniversitāte Vasintōniēnsī collectī sunt ac recitantur. Hodiē est vīcēsimus quartus diēs mēnsis Octōbris.  Hāc hebdomade, minister prīmārius Gallōrum est Sebastiānus Lecornū.

Diē Satūrnī, nōn noctū sed sōle ortō, trēs vel quattuor fūrēs scalīs in museī Lupārēnsis aulam Apollinis per fenestram ingressī gazam reīpūblicae Gallōrum surripuērunt et automatāriīs birotīs impūnēs ēvāsērunt.  Ē rēbus surreptīs, fūrēs putantur ūnam cāsū perdidisse, cum diadēma Eugeniae uxōris Neapoliōnis imperātōris extra museum repertum sit humī iacēns et frāctum.

Pergunt nautae Americānī nāvēs venēnō ōnerātās mergere, nōn solum in marī Caribbicō sed nunc etiam in marī Pācificō.  Minātur enim praeses Americānus mercātōrēs venēnī marī terrāque interfectum īrī; negat porrō sibi necesse vidērī bellum indīcere, cum in animō habeat extrā ordinem hominēs, quīcumque venēnum in Americam īnferant, occīdere.  Diē Mercuriī Columbiānōrum ministerium rēbus externīs praepositum postulāvit, ut Americānī ā nāvibus mergendīs abstinērent, cuī respondit praeses Americānus auxiliō mīlitārī Columbiānīs tollendō.

Carolus, ēius nōminis tertius, rex Britannōrum, et Leō, ēius nōminis quartus decimus, pontifex maximus, ūnā precātī sunt in sacellō Sixtīnō.  Carolus enim, quī ipse dīvortium fēcit et novam uxōrem dūxit, suprēmus gubernātor est ecclēsiae Anglicānae, quae ideō ab ecclēsiā Rōmānā discēderat, ut Henrīcō, ēius nōminis octāvō, licēret dīvortium facere et novās uxōrēs dūcere.  Āfuit vērō Sarah Mullally, nova archiepiscopa Cantauriēnsis, quae praeest ecclēsiae Anglicānae.  Carolō porrō futūrīsque rēgibus Britannōrum ā pontifice Rōmānō dāta est sedes in basilicā Sanctī Petrī extra moenia, quae sella inscrībitur, “ut ūnum sint.”  Uterque etiam alterī honōrem decrēvit cōnfrāternitātis.

Suffrāgiīs populāribus lātīs numerātīsque Roderīcus Paz, moderātus, ēlectus est praeses Boliviānōrum.  Vigintī enim annōs regnāvit in Boliviā factiō socialistārum dum rēs oeconomica pessum ībat.  Paz autem vult Americānōs colere, quōrum lēgātōs Evō Mōrālēs, ōlim praeses, annō bis millēsimō octāvō expulit.

Sanaē Takaīchī prīma fēmina facta est ministra prīmāria Iāpōnum.  Takaīchī, factiōnī līberālī et populārī praeposita, et cum factiōne rēs nōvās prōmoventī sociāta, fertur velle vestigiīs et Shinzōnis Abē et Margarītae Thatcher ingredī ad rem pūblicam gerendam.  Novum porrō ministerium creāvit, cūius erit cūrāre ut concordia inter cīvēs et aliēnigenās tueātur; cūi praefecta est Kimī Onoda, in Americā nāta.

In Cammarūniā, ubi reclāmātur propter comitia, quae nonnullīs vitiātia videntur, rēte omnium gentium est sublātum.  Paulus enim Bīya, nōnāginta duōs annōs nātus, quī quadrāgintā et trēs annōs regnāvit, octāvum ēlectus est praeses.

Praeses Americānus proximā hebdomade Malaesiam diē Sōlis, et Iapōniam diē Martis, et Cōrēam Merīdiōnālem diē Iovis visitābit.  In Cōrēā etiam colloquētur cum Xi Jinping, praeside Sīnēnsium.  Dīxit sē prīmum omnium rogātūrum praesidem Sīnēnsium de illicitō fentanylī venēnī commerciō cohibendō.

Iōhannes Wadephul, Germānōrum minister rēbus externīs praepositus, coāctus est iter, quod in Sīnās suceptūrus erat, dēpōnere, ut quem nūllī magistrātūs vellent convenīre.  

In Vasintōnia cīvitāte, ubi scientia atomica etiam inter secundum bellum omnium gentium colēbātur, Amāzon societas duodecim parva et modulāria reactōria atomica aedificābit.  Quod novum genus reactōriī putātur longē commōdius, ut quod minimum spatium postulet, et tūtius quam vetustiōra genera quae iam exstant.  Quibus reactōriīs additīs vīs ēlectrica magnīs ordinātrīs, quālibus Amāzon societas ūtitur, suppeditārī potest nullō damnō in nātūram illātō.