నవీన కవిత

నవీన కవిత

By Naveen ChennaSociety & CulturePhilosophy
Download on the App Store

నవీన కవిత episodes

  • ధూళి రేణువులు

    మాట మీద నిలబడలేని వాడు మనిషికాదంటారు

    మంచి కన్నా చెడే ఎక్కువ జరుగుతుంది అనుకున్ననాడు

    మనసు మార్చుకోవడంలో తప్పులేదు

    మాట మీద నిలబడి మూటకట్టుకొని పోయేదేమీ లేదు

    ఇక్కడ ఎవరూ దేవుళ్లు కారు

    రేపేం జరుగుతుందో ఊహించలేరు

    పరిస్థితులకు తగ్గట్టు మారే తీరు

    తప్పంటే ఎలా మాష్టారు??


    మంచైనా చెడైనా మొఖం మీదే చెప్పాలంటారు

    సరే అని ఉన్నదున్నట్టు మాట్లాడితే

    దున్నపోతులా మీద పడిపోతారు

    మనుషులు కదా మాటంటే పడలేరు


    మంచి అనిపించుకోవాలని ఒకడి వెంట వెళ్లటం కన్నా

    వీలు లేదని అని ఊరుకోవడమే మేలు

    నీ పనులు పక్కన పెట్టి నిన్ను తీసుకెళ్లే స్నేహితులు

    నీకు అవసరమున్న నాడు ఒక్కడు కూడా రాడు

    మొహమాటానికి పోతే ఏదో అయ్యిందని ఊరికే అనలేదు పెద్దలు


    ఇక్కడ నిజాలు మాట్లాడే వారికి అవార్డులేం ఇవ్వరు

    మంచి చేసే వారిని తీసుకెళ్లి ముఖ్యమంత్రిని చెయ్యరు

    ఈ అనంత విశ్వంలో ధూళిరేణువులే అందరూ

    ఎవరి కలల ప్రపంచానికి వారే రాజులు


    ఎవరికి వారే ఈదుతున్న భవసాగరాలు

    తీరం చేరే దారి కోసం వెతికే వారే ప్రతీ ఒక్కరు

    కాళ్లు చేతులు ఆడించకుంటే మునిగిపోతారు

    నువ్వు అలిసిపోతే నిన్ను వదిలేసి పోతారు


    Please check out my YouTube channel:

    www.youtube.com/c/NS360

    2 min
  • నువ్వు నేను ప్రేమ

    నింగివి నువ్వు నేలను నేను

    దూరంగా ఉంటే కలిసిపోయినట్టే ఉంటాం

    దగ్గరయ్యేకొద్దీ పెరుగుతుంది మన ఇద్దరి మధ్యన దూరం

    జాబిలి నువ్వు సూరీడు నేను

    ఒకేచోట ఇరువరం ఎప్పుడూ కలిసిలేం

    నన్ను చూడగానే అవుతావు నువు మాయం

    మంచువు నువ్వు మంటను నేను

    దగ్గరకు రానీయవు నన్నెప్పుడూ

    కరిగిపోతావేమో అని భయమేమో నీకు నా ప్రేమలో


    తీరం నీవు అలను నేను

    నిన్ను తాకాలనే తపనతో ఎగిసిపడుతున్నా

    నీ కోపం చూసి మళ్లీ వెనక్కి వస్తున్న


    అంటీ ముట్టనట్టే ఉంటావు నాతో

    తామరాకు మీద నీటి బొట్టులా

    కలిసిపోయాం అని చనువు తీసుకునేలోపే

    జారిపోతావు మెల్లగా


    ఇక నాతో కాదు అని నా మానాన నేనుంటే

    తిరిగి తిరిగి నావైపే వస్తావు తూనీగలా

    ఓర చూపుతో కుట్టిపోతావు తేనెటీగలా

    విడిగా ఉండటం కూడా వరమే ప్రేమలో

    అని తెలిసింది నీ వల్ల


    వింతగా ఉంది నీతో ఈ ప్రణయం

    దారీ తెన్నూ తెలియని ప్రయాణం

    నీ తలపుతో మొదలయ్యే ఉదయం

    కలలో కూడా వదలదు నీ వదనం


    నువ్వు నాతో ఉన్నా లేకపోయినా

    నేను ఎక్కడ ఉన్నా ఏం చేస్తున్నా

    ఎన్ని రోజులు ఇలా గడిచిపోయినా

    నా పేరు వినగానే నీ పెదవిపై పూచే చిరునవ్వులా

    నేను ఎప్పటికీ నీతోనే ఉంటా

    నిన్ను ఆరాధించటం తప్ప ఇంకేమి తెలియని నేను

    నువ్వు పిలిచేదాక నీకు దూరంగానే ఉంటా

    నీ పిలుపు కోసం ఎదురుచూస్తుంటా

    నిన్ను మరిచిపోయి మనలేను కనుక

    నిన్ను మరిచిపోవడం మర్చిపోయా

    ఇక చేసేదేమీ లేక


    Please check out my YouTube channel:

    www.youtube.com/c/NS360

    2 min
  • మూర్ఖ

    అమావాస్య రోజున వెన్నెల కోసం ఎదురుచూసేవు

    కాల రాత్రిలో జాబిలి తోడు కోరేవు

    చుక్కలెన్ని ఉన్నా చాలవా నీకు??

    హద్దులన్నవి లేవు నీ కోరికలకు

    నడి ఎడారిలో నీవు నదుల జాడలు వెతికేవు

    మండుటెండలో సైతం నీ నడకను ఆపవు

    ఒయాసిస్సులో నీరు సరిపోదా నీకు?

    ఎండమావుల వెనక ఎందుకు పరిగెడతావు??


    ముసురుకమ్మినవేళ ముడుచుకొని పడుకుంటావు

    గ్రహణమేమో అని నీ గది దాటి బయటకి రావు

    తొలకరి చినుకలకి పరవశించి ఆడేను నెమలి

    వరదొస్తే బురదవుతుందనే నిన్ను ఏమనాలి?


    మోడుబారిన మాను కింద నీడలేదని వగచేవు

    రాలిపోయిన ఆకులన్ని ఏరి అతికిస్తానంటావు

    ఎన్ని శిశిరాలు,వసంతాలు దాటితే నువ్వు ఇంతదూరం వచ్చావు?

    ప్రకృతి నియమాలు మరిచి ఏమిటీ పిల్ల చేష్టలు??


    వయసు పెరిగే కొద్దీ మళ్లీ మొదటికే వస్తావు

    కాలంతో పాటే నేర్చుకో కొన్ని పాఠాలు

    ఆశ నిరాశల మధ్య ఊగిసలాడే బ్రతుకు నీది

    కాస్త సాధ్యాసాధ్యాలను కూడా ఆలోచిస్తే మంచిది


    Please check out my YouTube channel:

    www.youtube.com/c/NS360

    2 min
  • అఆఇఈ

    అవసరం నిన్ను నడిపిస్తుంది

    ఆలోచన నీకు దారిచూపుతుంది


    ఇరుకైన నీ ఇంటినుండి


    ఈ నగరాన నీ అడుగు పడింది


    అవకాశం పని ఇస్తుంది


    ఆ అనుభవం నీకు అక్కరొస్తుంది


    ఇల్లు ఇల్లాలు పిల్లలు ఇలా 


    ఈ లోకాన నీకంటూ ఒక తోడు దొరుకుతుంది


    అవమానం ఎదురైతే కానీ


    అది నీలో కసిని పెంచుతుంది


    ఆరాటం దానిని కొనసాగిస్తుంది


    ఇనుముని కొలిమిలో కాల్చితేనే గొడ్డలవుతుంది


    ఈరోజు నువ్వు పడ్డ బాధే నిన్ను పైకి లేపుతుంది


    అనుమానం అడ్డుపడుతుంది

    ఆరంభంలోనే నిన్ను ఆపేస్తుంది


    ఇంతదాకా వచ్చాక ఇంక ఆలోచించడానికి ఏముంది


    ఈపూట ఓపికపడితే ఇన్నాళ్ల నీ శ్రమకు ఫలితముంటుంది


    అతిగా భయపడితే పతనం అక్కడే మొదలవుతుంది


    ఆవేదనలో బ్రతుకు ముగిసిపోతుంది


    ఇది నీకు నచ్చినా నచ్చకపోయినా జరిగితీరుతుంది


    ఈ పొద్దు గడిచాక నీకు అర్థమవుతుంది


    Please check out my YouTube channel:

    www.youtube.com/c/NS360

    2 min
  • మనసు

    చెప్తే వినదు

    ఆపితే ఆగదు


    నిద్ర పోనివ్వదు


    నిన్ను నీలా ఉండనివ్వదు


    మహా చిలిపిదీ మనసు


    మనిషంటే దానికి అలుసు



    దక్కని దానికోసం దుఃఖమెందుకు


    అంటే అస్సలు ఒప్పుకోదు


    చూసిన ప్రతీది కావాలంటుంది


    నచ్చిందల్లా తెచ్చివ్వమంటుంది


    మహాముదురు ఈ మనసు


    మనిషిని వాడుకోవటం దానికి బాగా తెలుసు



    మంచీ చెడులని ఎంచదు


    కట్టుబాట్లను కానదు


    తీరం చేరేదాక ఆగదు


    తీరా చేరాక సేద తీరదు


    పసిపాపలాంటిదీ మనసు


    పాపం పుణ్యం తెలియదు



    పరులు సుఖపడుతుంటే చూసి ఓర్వదు


    పనికి ఫలితం రాకుంటే నిదుర పోనివ్వదు


    స్థాయికి మించి ఆలోచనలు చేసే మనసు


    సాధించేదాక ఓపిక వహించదు



    శృతిమించి ప్రేమిస్తే చులకనగా చూస్తారు


    అతిగా విలువుస్తే అలుసైపోతావు


    మనసుని అదుపు చేసుకోకపోతే


    నిన్ను మతిలేని వాడంటారు


    మహా సున్నితమైనది మనసు


    మాట పడేదాకా తెచ్చుకోకు



    మనిషిని పశువుని వేరు చేసేది మనసు


    కానీ దానికి లొంగిపోకు


    మితిమీరి దాన్ని సుఖపెట్టకు


    నిజం నీడలో నడువు అపుడే విలువ నీకు


    Please check out my YouTube channel:

    www.youtube.com/c/NS360

    2 min
  • నిజాలు

    కొన్ని నిజాలు నీటిలోని చేపలు

    మనోసంద్రాన మాత్రమే మనగలవు

    బయటికొస్తే బ్రతకలేవు

    కొన్ని అభిప్రాయాలు మూగ జీవులు

    ఎంత అరిచినా ఎవ్వరూ పట్టించుకోరు

    వెల్లడించని మాటలు వ్యక్తపరచని భావాలు

    మనసుని స్థిరంగా ఉండనీయవు

    కాలిలో ముల్లులా కంటిలో నలుసులా

    అంత సులువుగా బయటికి రావు


    నవ్వుతూ మాట్లాడే వారందరూ నీ వారు కాదు

    నీకు తెలిసిన వారిలో సగం మంది మహానటులు

    నిన్ను తనలా ఎప్పటికీ భావించరు

    వింటున్నారు కదా అని చెప్పకు నీ బాధలు


    ప్రతీ మనిషిలో కొన్ని చీకటి కోణాలు

    తెలివి తక్కువ వాళ్లు బయటపడతారు

    తెలుసుకున్న వాళ్లు వెలుగువైపు నడుస్తారు

    తెలివైన వాళ్లు తప్పించుకు తిరుగుతారు

    మహముదుర్లు కొందరు మహానుభావులు

    ముంచుతూ కూడా మంచివారిగా చలామణి కాగల సమర్థులు


    పరులకు నువ్వెలా పనికొస్తావు?? అదే నీ విలువ!!అడగకుండా సలహాలిచ్చేవాడు ఎదుటివాడికి లోకువ

    అనుభవం ద్వారా తెలియవచ్చేదే అసలైన సత్యం

    నేను చెప్పేది నీకు నచ్చితే నిజం లేకపోతే వేదాంతం


    Please check out my YouTube channel:

    www.youtube.com/c/NS360

    2 min
  • మరమనిషి

    ఓ మధ్య తరగతి మనిషీ

    సమాజంలో నువ్వొక మరమనిషి

    నీ కంటూ లేదు సొంత ఆలోచన

    ఎన్నో సిద్ధాంతాలు రుద్దారు నీ పైన

    ప్రోగ్రామ్ చేయబడ్డాయి నీ నమ్మకాలు

    తరతరాలుగా లేదు ఏ అప్డేటు

    ఛాందస వాదులు చెప్పిందే రైటూ

    కాదన్న వాడితో వాదిస్తావు డే అండ్ నైటు


    నీ చిప్పు ఎప్పుడో దొబ్బింది

    వాడెన్ని లత్కోరు పనులు చేసినా లేదు నీకు ఇబ్బంది

    అడగాలి అన్న సోయి మరిచి

    పొగుడుతున్నావ్ వాడిని భలే భలే


    ఆశ చూపించి నాకిస్తాడు నేలని

    తెచ్చి నెత్తిన పెట్టుకున్నావ్ వాడి కాలిని

    తొక్కితే పత్తా లేకుండా పోతావు

    నేనెంత మొత్తుకున్నా నా మాటలు నీకు వినబడవు


    ఆ పిచ్చోడు మళ్ళీ వచ్చాడా అంతా అస్సామే

    ఇప్పటికైనా అర్థం చేసుకోరా నా సామే

    నీకు ఎక్కేదేకా చెప్పేంత ఓపిక లేదు నాకు

    నీకో దండంరా బాబు ఇక నా వైపు రాకు


    ఐనా ఇంత పిచ్చిగా ఎలా నమ్ముతారో ఒకడ్ని జనాలు

    పూర్తిగా మునిగిపోయారు ఇక మనం చెప్పేది వినరు

    బావిలో కప్పల్లా ఆ రొచ్చులోనే ఉంటారు

    మంచి చెప్పబోతే నీకేం తెలుసని బెకబెకమంటారు

    బహుశా పిచ్చోడి చేతిలో రాయంటే ఇదే కాబోలు


    Please check out my YouTube channel:

    www.youtube.com/c/NS360

    2 min
  • చెలిమి

    చూస్తుండగానే గడిచి పోయింది కాలం

    బాల్యానికి దూరంగా బ్రతుకు ప్రయాణం

    ఆడిన ఆటలు పాడిన పాటలు

    అల్లరి చేష్టలు ఆకతాయి పనులు

    తిరిగిన వీధులు తరగతి గదులు

    తిట్లు కొట్లాటలు అలకలు అపార్థాలు

    తలుచుకుంటే అవి ఇప్పుడు మధురజ్ఞాపకాలు

    ప్రతిరోజూ మేము మాట్లాడుకోము

    ఎవరి పనిలో వారుంటాము

    వీలు చూసుకుని కలుసుకుంటాము

    యోగ క్షేమాలు తెలుసుకుంటాము

    కబుర్లు చెప్పుకుంటాము

    సరదాగా నవ్వుకుంటాము


    ఎన్నేళ్ళు గడిచినా విడిపోని స్నేహితులం

    మూలాలు మర్చిపోలేని మనుషులం మేం

    మనం ఎదిగితే చూడాలి అనుకునే చాలా వారు అరుదు

    అలాంటి వారు దొరికితే అస్సలు వదులుకోకూడదు


    ఏదో కోరి చేసే స్నేహం నిలువదు ఎంతో కాలం

    అవసరం తీరిందా అట్నుంచి అటే మాయం

    నిజమైన స్నేహితుడు ఒకడుంటే చాలు

    కసిరినా విసిరినా నిన్నొదిలిపోడు


    చెలిమికి వయసుతో పని లేదు

    నీ పొరుగు వారు నీతో పనిచేసేవారు

    వారు ఎవరైనా ఎపుడైనా ఎక్కడైనా ఎలా అయినా

    నీ మనసు తెలిసిన వారు నీకు దగ్గరవుతారు


    Please check out my YouTube channel:

    www.youtube.com/c/NS360

    2 min
  • స్వాంతన

    ఏదో ఒక వెలితి వెంటాడుతూనే ఉంటుంది

    ఒకదాని తరువాత ఇంకొకటి

    కావాలని కోరుతుంది కాలమనే రాకాసి

    సాధించడం సంపాదించడం

    రేపటి కోసం దాచడం

    ఇంతేనా జీవితం??

    కాదు కాదు ఇంకేదో ఉందనిపిస్తుంది

    ఎవరూ నీ జీవితాన్ని కొనలేరు

    ఎవరికో ఊడిగం చేయడానికి నిన్ను కనలేదు

    ఇంతకాలం పరిగెత్తింది చాలు

    ఇకనైనా చేసుకో నీకోసం నువ్వు వీలు


    నులివెచ్చని రవి కిరణాలు

    తొలకరి మట్టి వాసనలు

    సముద్ర తీరాలు

    సంధ్యా సాయంత్రాలు

    ఆ తారా చంద్రుల అందాలు

    అనుభవించడానికే పుట్టించాడు నిన్ను ఆ భగవంతుడు


    పరుగుని ఆపిన క్షణం

    బరువుని దింపిన క్షణం

    కలిగిన ఉపశమనం

    మనసుకు ఎంతో సుఖం

    వారానికో రోజు నీకోసం కేటాయించు

    నీకు నచ్చిందే చేస్తూ ఆనందించు


    వయసు పెరగనీయకు మనసుకు

    పసితనపు స్వచ్ఛతను పోగొట్టుకోకు

    బాల్యం అంతా రంగులమయం

    చిన్న చిన్న విషయాలకే అంతులేని ఆనందం

    మూతినెందుకు అలా ముడుచుకొని ఉంటావు

    మనసారా నవ్వితే నీ సొమ్మేం పోదు


    Please check out my YouTube channel:

    www.youtube.com/c/NS360

    2 min
  • ఉద్దీపన

    ఈ లోకం ఒక యుద్ధభూమి

    ఓడిపోతే విమర్శల సునామీ

    అంతా ఒక గొర్రెల మంద

    పరాకుగా ఉంటే నీ పని గోవింద

    ఒడిసి పట్టుకో ప్రతి అవకాశాన్ని

    కనిపెట్టుకొని ఉండు చుట్టూ ఉన్నవారిని

    నీ బలాన్ని మించిన కల కను

    నీ దారికి అడ్డం రానీయకు ఏ బలహీనతను

    నీ మనస్సు చెప్పిందే విను

    ఇక వినకు ఎవ్వరి మాటను


    దూరమెంతైనా దారి లేకున్నా

    జాలి పడదు కాలం నీ పైన

    నీలో ఎంతో ఉందని నువ్వనుకున్నా

    నీ ముఖంపై అది కనపడదురా కన్నా


    తెలివే నీకు పెట్టుబడి

    తెగువ చూపించు నీ కలకు కట్టుబడి

    ఆ కలే నిజమై ఎదురొచ్చేను నిన్ను ఇష్టపడి

    తగిలే ప్రతిగాయం విజయానికి సోపానం

    ఎదురయ్యే ప్రమాదం గమ్యానికి ద్వారం


    మండే కొద్దీ వెలుగునిచ్చే సూరీడులా

    పగిలే కొద్ది పదును పెరిగే గాజులా

    నరికే కొద్ది ఎదిగే చెట్టులా

    ఈరోజు బికారిలా ఉన్న నువ్వే తిరిగొస్తావు

    ఒకరోజు మహారాజులా


    నీ కలే నీ బలం

    వదలకు నీ ఆశయం

    శ్రమించు నిరంతరం

    కాదా విజయం నీకు దాసోహం


    Please check out my YouTube channel:

    www.youtube.com/c/NS360

    2 min

About నవీన కవిత

From the publisher's feed

మొదలైంది కవితా ప్రవాహం. అది వెలుతుంది చాలా దూరం. వీలైతే వినండి. నచ్చితే ప్రోత్సహించండి.