On Tottaama Konngol

Hannde e alarba, ñannde 24, 9ɓuru, en yewtan fii pellital ngal Mali, Niger e Burkina Faso ƴetti fii yaltugol e nduu Suudu Ñaawirdu Adunayankooru Mawndu noddirteendu CPI. Ɗee leyɗe tati Sahel hollitii e altine faltiinde ndee, sortagol ɗe e mayru. Hiɓe ɓe tuumiri ndu  wonugol aala wonaaɗo e huutoreede fii ɓittugol leyɗe goɗɗe, alaa wonuɗo e juuɗe leyɗe falaaɗe ardaade aduna on. E bi’ol ɓee hooreeɓe leyɗe AES, hino jeya e dalullaaji hirjinɗi ɓe fii yaltugol CPI. Faale maɓɓe hettugol jeytaare maɓɓe timmunde, Ɓe anndinnii kadi faale maɓɓe sincugol suudu ñaawirdu Sahel, toppitotoondu fitinaaji ɓurɗi e hulɓinaade.

Ko holno yiiruɗon ngol yaltugol Mali Burkina Faso e Niger e nduu Suudu Ñaawirdu Adunaaru CPI?

Ko honno ngol yaltugol ɗee leyɗe haani yaarude?

Taw si dalullaaji ɗi ɓe holli ɗin no yono ko yaltinaɓe ka CPI?

E miijo mon, holko ngal pellital leyɗe AES ko faati e yaltugol CPI waawi battinnde?

E ndee yewtere men hannde talaata ñannde 23, 9ɓuru en kaalan ko faati e goodal Dawla Palestine. Emmanuel Makron hooreejo Faransi lawɗinii hanki e altine e jonnde Dental Adunaaru ONU, jaɓugol goodal e jeytaare dawla Palestine. Ngal pellital Faransi tawtugol feere nde leyɗe goɗɗe ƴetti ngam dartinde hare ɓooyuɗe hakkunde Israyel e Palestine feññinaama ñallal ɓawto nde leyɗe wano Beretaaniya Mawndi, Kanada e Australiya holli wonnde ɗe jaɓii kanje kadi qirragol goodal dawla Palestine. Ɗum semmbinii limoore leyɗe wonanɓe goodal dawla Palestine. Ko timmi leyɗe 145 no daranii hannde ndee feere nde ɓe holli wonnde ko kayre pet waawi senndidirde leyɗe ɗiɗi ɗee, Israyel e Palestine, jam duumiiɗo wona Moyen-Orient.

Ko holno yiiruɗon pellital Faransi jaɓude goodal Palestine?

Ko holɗum jeytaare dawla Palestine waawi jibinande ɓiɓɓe leydi ndii?

Taw si jaɓugol goodal Palestine no waawi artirde jam Moyen Orient?

Hannde 22 lewru 9ɓuru, njeewtaten ko e alhaali coftal-ɓalli. Ko hannde mbuuñaari ballon d’or rokkirte. Tottatee ndiin mbuuñaari ko fettiyaŋke ɓurɗo waɗde ko faayodini e nder hitaande wootere. Hol jogorɗo suɓeede wonde oon fettiyaŋke hikka? Hol jogorɗe suutde ndee baloore kaŋŋe? 

Innde keɓoowo ndii mbuuñaari, ko kikiiɗe hannde feññintee to Paris. Inɗe fijooɓe ɗiɗo no ɓuri lollude e fijooɓe 30 toɗɗaaɓe waawde suutde baloore kaŋŋe ndee ballonre. Ɓeen ɗiɗo ko Ousmane Dembélé e Lamine Yamal. Hol oon e ɓeen ɗiɗo jogori lomtaade Rodri, ƴettunooɗo ndii mbuuñaari rawane. Ɓiɓɓe Afrik tato ina tawee e doggol ɓeen capanɗe tato fooɗondirooɓe ndii mbuuñaari: ko Ginenaajo Serhou Guirassy, Egyptnaajo Mohamed SALAH e ɓiy Maroc Achraf HAKIMI.

Holko saabii gila Georges Weah suuti ballon d’or e hitaande 1996, hay ɓiɗɗo Afrik gooto goɗɗo waawaani suutde ndii mbuuñaari?

On Tottaama Konngol Hannde e nder ndee yeewtere udditiinde, on kollii miijooji mon e ko faati e kabaaruuji ɗi njiɗɗon artude e mum e nder ndee yontere

Altine ñannde 18, 9ɓuru yewtere men no nawra en Gine. Ko hannde orngal woote referendum fampaangal ñannde 31 lewru faltiindu timmata e nder leydi ndii. E nder ko fawi jonnte ɗiɗi, ardiiɓe e bambuɓe walla jinnganooɓe pelle dawro yiilike e nder ca’e e koɗoli gine ngam noddude ɓiɓɓe leydi ndii e yo wootu “eyo” hino jaɓi ngal downgal kesal Gine, maɗun yo wootu “Oo’o” alanaa sariya oo mawɗo keso, walla wuren, wota yaltu ka mun ñannde 21 lewru ndu wonuɗen e mun ngam yaade e nokku to wootete ɗon. Enee ko holno yiiruɗon no orngal woote ko faatii e jaɓugol maa salagol dosngal kesal gine feƴƴiri? Fuɗɗanndema e mottondire yuɓɓinaaɗe, konnguɗi hollaaɗi, wonndude e jewte lumɗiyankooɓe anndinɗe wota gooto e wonduɓe e maɓɓe wootu nden ñannde. Wano Aladji Cellu Dallen DIALLO hooreejo fedde UFDG e Pr Alfa Konnde ardiiɗo RPG Arc- en Ciel nodii bambuɓe ɓe hedaade to galle nden ñannde wota gooto yahu wallingol kartal mun hay si tawi ko wootogol oo’o.

Hannde e alarba, ñannde 17, 9ɓuru, en kaalan ko yowitii e alhaali dawro Caad. Duuɓi ɗiɗi caggal woote referandom, ardiiɓe leydi ndin no heblanaade kadi heyɗitinngol kuule goɗɗe sariya mawɗo leydi ndii. Sarɗinkooɓe ɓen wootii e keewal ndee yontere, eɓɓore sariya MPS, fedde laamuyanjoore Caad ko faati e ɓeydugol happu laamu hooreejo leydi ndii. Itta e duuɓi 5 watta duuɓi 7 heyɗintinteeɗi fannii ontigi no yiɗi. Ndee eɓɓoore sariya no haanaa hewtineede to Senat, ɗoo e ñannde 13 darotoondu ñalaande happaade fii wootugol ndee.  Nde tawi suudu Sarɗinkooru ndun e Senat no wondi walla no caggal fedde laamuyankoore nden ɗum no holli wonndema waylugol sariya mawɗo Caad laatoto fii kala lumndo ngon no liddii waylugol oo sariya. Saɓu e bi’ol maɓɓe, ko ngam warude demokarsi laamu ngun woni. Si ɗum arii laataade, fi demokrasi yewtataake hannde kadi Caad. 

Hannde 16 lewru 9ɓuru, kaalaten ko e alhaali dental leyɗeele Sahel woni AES. Timmii hannde duuɓi ɗiɗi gila ardiiɓe Mali, Burkina Faso e Niijeer ndarni ngal dental leyɗeele Sahel. Ɗum wonnoo ko ñande 16 9ɓuru hitaaande 2023. Faandaare maɓɓe wonnoo,  ko haɓde e caɗeele teskaaɗe e nder ɗee leyɗeele tati teeŋti e rafi ndeenaagu jaaliingu e nder sahel.

Duuɓi ɗiɗi hannde gila ɗee leyɗe tati sahel mbaɗi fedde wootere, holko mbaawɗen jaggude e laatinanɗe mayre, ko yowitii e haɓugol e kuliyaŋkaaku e nder Sahel?

E miijooji mon, holno ngal Dental fewndori hannde to bannge dawro e ɓamtaare leyɗeele tati jokkondirɗe ɗee?

Mbele AES waawi timminde faandaare ko nde tafanaa?

Hannde alkamisa, 15 lewru 9ɓuru, yeewtere men ina nawa en to Burkina Faso. Guwernema oo fellitii ustude limoore balɗe bi’aaɗe wonnde golle ngalaa kono gollooɓe ɓee njoɓete hay so ɓe ngollaaki e ɗeen ñalaaɗe no wi’e e ɗemngal farayse chômé et payé walla jours fériés. 

Gollooɓe Burkina Faso ina njogii balɗe sappo e joyi hitaande kala ɗe ɓe ngollotaako tawa eɓe njoɓe. Ko ɗeen,  ardiiɓe leydi ndii pelliti ustude balɗe nayi, hara gollooɓe ɓeen keddore balɗe sappo e goo ɗe ɓe gollataa e nder hitaande ndee. E bi’ol hooreeɓe laamu faddewu nguu faandaare ndee ko ngam waawude ɓamtude faggudu Burkina Faso. Sabu e bi’ol maɓɓe kala ñallal ngal gollaaka, guwernema oo, ina waasa ko abbii e miliyaaruuji nayi kaalisi seefa. So tawii pellital maɓɓe ngal laatiima, leydi ndii dañat miliyar 17 kaalisi Sefaa. Ko ɗuum anndini jaagorɗo kalfinaaɗo faggudu leydi ndii.

Holno njiyruɗon ngal pellital ardiiɓe Burkina Faso?

Mbele ndee feere ɓamtat faggudu leydi ndii hono no hooreeɓe ɓee kolliri nih?

On Tottaama Konngol Hannde e nder ndee yeewtere udditiinde, on kollii miijooji mon e ko faati e kabaaruuji ɗi njiɗɗon artude e mum e nder ndee yontere

Hannde 11 lewru 9ɓuru, yeewtere men ndee ina nawa en to Mali. Kaalaten ko ko yowitii e pehe kese ɗe kuliyankooɓe ngoni e huutoraade toon, e oo sahaa jooni. Yontere faltiinde ndee, fedde kuliyaŋkooɓe JNIM, jokkondirɓe kuliyaŋkooɓe al-Qaïda nganndiniino wonnde ɓe mbaɗii uddere e nder saareeji ɗiɗi e nder Mali hono Nioro e Kaye. Ɓe kaɗi yah-ngarta oo ngam falaade naatugol kuɓɓam iwoojam to Senegal e Mauritanie.

Wiyaama wonnde kamiyonji cumaama to Sikasso, fuɗnaange-worgo Mali, hay otooji sosiyete DiarraTranport ndartinaama, kaɗaa gollude. Kono laamu faddewu Mali kañum yeddii ndee uddere nde kuliyaŋkooɓe ɓee mbaɗii to Nioro e Kaye. Hooreeɓe leydi ndii mbaɗii ɓatakuru ndu ɓe nganndini e nder mum wonnde ɓe bonnii daakorɗe keewɗe ɗe ɓee kuliyankooɓe kuutortonoo, kadi ɓe pawii junngo e dow kuliyaŋkooɓe heewɓe. Guwernama o hollii wonnde konu leydi ndii ɓeydii darnde mum. Ɓe noddii ɓiɓɓe saareeji ɗiɗi ɗii njokkata yah-ngarta maɓɓe.

Enee Ko holno faamirɗon oo alhaali ?

Ko holno njiyruɗon ndee feere hesere nde kuliyaŋkooɓe ɓee ngoni e huutoraade jooni to Mali