On Tottaama Konngol

Hannde e alarba, 22, 10ɓuru, en kaalan ko yowitii e alhaali sokugol hooreejo kiɗɗo leydi Faransi Nicolas Sarkozi. O naɓaama hanki e talaata e kaso hertorngo cellal nokku ɗo o heddotoo duuɓi jowi. Ɗum ko e battane jukkoore nde suudu sariya ndun fawi mo e piilol Liibiya e ñaawoore taƴaane ñannde 25 lewru 9ɓuru faltiindu. Ko go’o on nii e nder taatiika leyɗe Erop yo hooreejo leydi kiɗɗo soke.

Oo alhaali Nicolas Sarkozi jibinii haalullaaji ɗuuɗuɗi. Hay si woɓɓe no yaadi e jukkoore fawaande ndee e dow oo hooreejo kiɗɗo, hino woodi ɓe ngol sokugol Nicolas Sarkozi ŋalɗini, nde tawi ko huunde nde meeɗaaka yi’eede e nder Faransi. Hiɓe holli wonde ngol sokugol oo hooreejo kiɗɗo ko alhaali humondirɗo e baŋŋe dawro.  Hiɗen anndi baŋŋe Afrik kan, yi’aama ka hooreejo kiɗɗo leydi naadaa kaso.

Ko honɗum woni miijo mon e ngol sokugol oo hooreejo leydi kiɗɗo?

Ko holɗum waɗata haa hooreejo leydi kiɗɗo naadee kaso?

taw ko ɓayri himo jogii caɗeele e baŋŋe sariya, kaa ko sabu caɗeele humondirɗe e baŋŋe dawro?

Ko holno faamirɗon ngol sokugol Nicolas Sarkozi hooreejo Faransi kiɗɗo ?

Hannde e alarba, ñannde 21, 10ɓuru, en yiiloray hella Mali, kaalen ko yowitii e pellite walla sariyaaji ɗi kuliyankooɓe JNIN ƴetti liddu doginooɓe oto wonndude e yiilotooɓe e dow laawi Mali. Caggal nde ɓee kuliyankooɓe sakkii, aljuma faltiinde,  kamiyonje ronndiiɗe kuɓam naataynooɗe Sikasso, ɓe yaltini kadi widiyo holluɗo konunkooɓe ɗiɗo e siwiljo ɓe ɓe ciwlii. Ɓee kuliyankooɓe bamii kadi pellital gonngal faade e  yiilotooɓe e nder dendaangal leydi Mali. Oo sariya ko wi’uɗo wonnde kala debbo yiilotooɗo Mali haanaa naatude walla jooɗaade e nder oto tawa muuraaki walla buumaaki. Ɓe haanaa kadi jooɗodude e worɓe ɓen. Ko e julle ɓaawooje ɗen ɓe haani wonde. 

Ko honno yiiruɗon ɗii sariyaaji ɗi JNIN woni e ƴettude e oo ɗoo wakati Mali?

Tawu si ɗum no holli wonnde ɓee kuliyankooɓe dañii cemmbe e nder Mali?

Ko honno faamirɗon deƴƴere ardiiɓe Mali ko yowitii e sariyaaji ɗi JNIN fawi e hoore malinaaɓe?

Yewtere men hannde altine ñannde 20, 10ɓuru, no nawra en Koddiwaar kaalen ko faati e pellital ngal jaagorɗo halfinaaɗo geɗe nder leydi anndini fii mun e aljuma yatuɗo. Pellital haɗungal yuɓɓinngol kala seppoo, mitting walla tumnbondiral ko jeydaa e orngal suɓngooji hooreyaaku wonungal e waɗude Koddiwaar gila yontere. Ardiiɓe koddiwaar ƴettii ngal pellital ɓawto nde kawtal pelle lumndiyankooje PPA CI e PDCI yuɓɓini seppo ngo yimɓe ko timmi 710 fawaa junngo.

Ko ngam falaade bone ɗe seppeeji ɗin jiɓbinta nde ndi yuɓɓinaa kala addi laamu ngun ɓamude ngal pellital.Kono pelle lumdiyankooje wonndude e pelle ngendiyankooje goɗɗe no ŋiñi ɗum.  E bi’ol arɗiiɓe pelle ɗen ko liddu pelle lumdiyankoole ɗen laamu ngun ƴettani ngal pellital, ko ngam ɓiƴuɗe ɓe.

Ko holno faamirɗon ngal pellital ko faati e haɗugol e nder lebbi ɗiɗi kala seppo e tumbondire politik ɗe jeydaa e orngal suɓngooji Koddiwaar? 

E miijo mon, ko holɗum ɗum waawi battinnde e alhaali dawro Koddiwar

Toɓɓe ɗe ɓurɗon artude e ndee yeewtere ko e alhaali liɓugol laamu Ange Rajoelina to Madagascar. On ngaddii kadi jiyanɗe mon e ɓeen konuŋkooɓe heɓtuɓe nguu laamu, so maa ɓe mbaaw timminde podooje maɓɓe.

On ngartii kadi e alhaali Hamas e Israel wonndude e koyɗe jam ɗe hooreejo Amerik, Donald Trump, woni e dogde ngam artirde jam e kisal e nder Gaza, ko noon ne kadi e kabaaru jowitiiɗo e suɓngo lefol laamu Kamerun.

Hannde, 16 lewru 10ɓuru, yeewtere men no nawra en Madagascar. Kaalen ko yowitii e fodaaje ɗe konunkooɓe liɓuɓe laamu Andry Rajoelina waɗani biɓɓe Madagascar, weltorɓe ndee ciwlere laamu. Kolonel Mikael Randrianirina (Rand-ja-nirin) ardiiɗo nguu konu CAPSAT, ciwliingu laamu, waɗat woondoore mun aljuma  janngo. O fodii joɗɗingol guwernaman mo siwileeɓe e konunkooɓe tawetee. Himo holli kadi wonnde ko ko lebbi 18 haa duuɓi ɗiɗi ɓe ardotoo Madagascar, ɓe yuɓɓina suɓngooji hooreyaaku leydi ɓe watta laamu ngun e juuɗe siwileeɓe.

Ko holno taskorɗon ɗee fodaaje ɓee konunkooɓe liɓuɓe laamu Madagascar?

Taw si ɓee konunkooɓe hunnay aadi ndi ɓe ƴettani ɓiɓɓe leydi ndii? Sabu hino anndaa wonnde e nder leyɗe keewɗe ko wano nii konunkooɓe ardi e laamu, kono hannde alaa leydi ka konunkooɓe laamiiɓe ɓee jaɓi jonnitugol laamu ngun e nder ɓuttu.

Holko saabii konunkooɓe ardotooɓe leyɗeele ɗen caggal nde ɓe liɓi laamu siwil wootananooɗo, jaɓataa jonitude laamu nguu wano ɓe foddiri nde ɓe ciwlii laamu?

Alarba hannde 15 lewru 10ɓuru, njeewtaten ko e alhaali coftal-ɓalli. En kaalan ko faati e foolotiro fuku-koyngal deesewal winndere hitaande 2026. Diɗɗe jeenayi Afriknaaje, tawtorteeɗe e ngoo foolotiro deesewal adunaaru hitaande aroore ɗoo, anndaama. Ɗen ko Maroc, Tunisie, Egypte, Algerie, Ghana, Cap Vert, Afrik du Sud, Cote d’ivoire e Sénégal. Hino hasi ko ɗe wonaya 10 caggal  kawrite ‘‘barrage’’ ɗen. Ɗee diɗɗe waawi lumbude e ɗen pottite ngam tawtoreede e ngoo  foolotiro  wi’ateengo ‘‘Coupe du monde’’, ngo diɗɗe goɗɗe hoolanooɗe yiltii kanje.

Ko holno yiiruɗon ɗee kawondire waɗuɗe e nder ɗee balɗe sappo e ɗee diɗɗe Afrik tawtorteede e ngoo foolotiro fuɗɗootoongo ñannde 11 lewru hitaande 2026 feeñi walla andaa ?

Enee, woodii ko metti on e ɗe tiindondire ?

Ko hombo e fijooɓe ɗee diɗɗe ɓuri hawnude on e ɗee kawondire ?

E ndee yewtere men hannde altine ñannde 14, 10ɓuru, en kaalii ko yowiti e hare ɓooyuɗe Gaza wonndude e eɓɓore nde Donald Trump ɓami ngam artirde ɓuttu hakkunde Israyel e Hamas. Wano hooreejo Amerik hollirnoo non, toɓɓere walla rogere aranere ndee fehre makko ngam timminnde hare Gaza laatinaama e altine hannki. Hamas accitii Israyelnaaɓe wuurɓe 20yo ɓe ɓe ciwliino. Israël senngo mum yoppitii kañum kadi ko ɓadii Palestinaaɓe 2.000ɗo ɓe ɓe jaggunoo. Taw si ndee taaɓannde aranere laatinaande ɗoo e down ndee eɓɓoore Trump yonii ko artira jam hakkunde Hamas e Israel? Hanki kawral jam siifaama hakkunde Israel e Hamas to Ejipt (Misra). Siifannnde nde kanko Donald Trump weltori sanne hollude wonndema ko ñalaande mawnde wonande Moyen-Orient. Taw si ngal Kawral tabintinay ɓuttu duuniiɗo Gaza?

Altine, ñande 13 lewru 10ɓuru, yeewtere men no nawrato  Madagascar. Kaalen ko faati e caɗeele taskaaɗe e nder leydi ndii, gila ñande 25 lewru faltiindu nduu, wontuɗe hannde caɗeele dawro. Fewnɗo ɗoo hooreejo leydi ndin no wonndi e ɓitteende mawnde nde tawi konunkooɓe tawtii ɓiɓɓe leydi ndii e seppo ngon. Ɓe lamdii yo hooreejo leydi Andry Rajoelina immo ka jappeere ndee, wonndude e hooreejo suudu Senat ndun, yo onɗon kadi ɓoorto laamu nguu. Ko holno faamirɗon ko ɓee konunkooɓe tawti maajereeji ɗin Madagascar?

Hiɗen anndi non wonaa go’o on nii yo konunkooɓe wontudu e ɓiɓɓe leyɗi maɓɓe ngam liddaade hooreejo leydi yo ɓorto laamu. Yeru mun waɗi kadi Mali e hitaande 2020.  E bi’ol jaaynde RFI, Andry Rajoelina, alla Madagascar fewndo ɗoo. Laana weeyo Faransi yaltinii mo caggal aadodal hakkunde makko e Emmanuyel Makron, hooreejo Faransi.

On Tottaama Konngol Hannde e nder ndee yeewtere udditiinde, on kollii miijooji mon e ko faati e kabaaruuji ɗi njiɗɗon artude e mum e nder ndee yontere.

Alkamisa ñannde 9 lewru 10ɓuru, en kaalat hannde ko faati e udditugol duɗe jannginirɗe, wonndude e caɗeele taskaaɗe e nder leyɗeele goɗɗe. E nder yoga e leyɗeele Afrik, hitaande kala, hiɗen anndi udditugol lekkol waɗay e lewru 9ɓuru e nder leyɗeele goɗɗe, hino wooɗi non kadi leyɗeele to duɗe jannginirɗe udditata e lewru 10 ɓuru.  Ko alhaali gooto on taskaa hikka. Hay si tawii gila lewru faltiinde heɓi hannde miliyonji sukaaɓe fudditike lekkol, hino heddii non ɗuuɗuɓe ɗe udditaani tawo sabu caɗeele taskaaɗe e nder leyɗeele walla  gure maɓɓe. Hino ƴeyaa e ɗen caɗeele rafi kisal e ndeenaagu, ilameeji, anngal jannginooɓe e ɗuɗe goɗɗe, woppere golle jannginooɓe, wonndude e caɗeele goɗɗe e goɗɗe.

Enee ko holno alhaali oo fewndori e nder leyɗeele mon ?