On Tottaama Konngol

Hannde e talaata ñannde 19, lewru 11ɓuru, yewtere men no nawra en haande to banŋe coftal ɓalli. Ko fijoowo ballon Afriknaajo hommbo tottetee hikka ndee fukuure kaŋŋe? Innde dañoowo mbuuñaari ndii feeñinte hannde kiikiiɗe e mooɓondiral CAF Awards to Rabat, laamorgo Maroc. Inɗe fijooɓe tato no ɓuri lollude. Ɓen ko Mohamed Salah laatiiɗo champion d’Angleterre caggal saison makko ka Liverpool. Loggi 34 ɗi o waɗi saabike o wonude fijoowo Afriknaajo ɓurɗo e naannude loggi ka foolotiro 1ère ligue.

Kono ngaɗay hakkunde makko e ɓii Maroc fijoowo e ngal teekodal Paris Saint Germain. Achraf Hakimi wonɗo sabu PSG fooli ka ligue des Champion. O dañii ko ɓooyaa mbuuñaari noddirteendi “Marc-Vivien Foé” totteteendi fijowo ballon Afriknaajo ɓurɗo battinnde e ɗee kawrite championat France. Fijoowo tataɓo tawaaɗo e ɓe innde mun lolli ɓen, ko Victor Osimhen Nayjeriynaajo fijanoowo teekodal Galatasaray. O fiji kawrite 41, o waɗii loggi 37. O battinii sanne ka ligue Europa e ka super ligue Turquie.

Ko fijoowo ballon Afriknaajo hommbo tanƴiniɗon dañay hikka ndii mbuuñaari balonre kaŋŋe 2025, anndiraande «Ballon d'Or africain» 

 Hannde talaata 18 lewru 11ɓuru ka yewtere men hiɗen yiilora Benin, nokku to sarɗinkooɓe ɓen wooti e keewal e aset faltiinde sariya heyɗintinɗo kuule keewɗe dosngal leydi ndin. Ko adii kon happu laamu hooreejo leydi sarɗinkooɓe, wonndude e meerɓe ɓen ɓeydaama, ittaama e duuɓi 5 wattaama duuɓi 7. Oo sariya walla ndee waylitere fuɗɗaama huutoreede woo, ɓawto suɓngooji hooreyaaku arooji.

E kadi ngol artirgol happu laamu Benin e duuɓi 7 battintaa walla waylataa huunde e sariya wi’uɗo wonndema hooreejo leydi ndin ko mandaaji 2 tan waawi waɗude e nder nguurndam makko ɗam fof. Sariya wootaaɗo goɗɗo, ɓurɗo e jibinde haalullaaji e nder leydi ndin, ko oo yowitiiɗo e sincugol suudu Senat, suudu toppitotoondu njuɓɓundiiji dawro Benin. Kono e bi’ol lumndiyankooɓe ɓen, ngol sincugol suudu senat ko ngam heblanagol Patrice Talon, hooreejo leydi ndii, e mandaa mun ɗiɗaɓo e sakkitoro timmata e lewru 5ɓuru hitaande aroore, heɓlanaade mo nokku to o wona, walla o ya’a caggal nde o iwi e laamu. Tawa o waway kadi fewjande hooreejo keso Benin aroowo,

Ko holno faamirɗon oo alhaali

Yewtere men hannde altine ñannde 17, 11ɓuru no nawra en Senegaal. Lebbi 18 bawto poolgu Bassirou Diomaye FAYE e woote hooreyaaku leydi e bawto toɗɗagol Ousmane SONKO hoore jaagorɓe Senegaal, pooɗondiral fuɗɗaama taskeede hakkunde hooreeɓe ɓee ɗiɗo. Anngal pooɗondiral ɓurngal jibinde haallulaaji e nder leydi ndin, ko ngal taskaangal e dow suɓagol ardiiɗo kawtal pelle maɓɓe dawro. Jonte yawtuɗe, Ousmane SONKO heyɗintinno hoolaare makko e Ayda MBODJ, ardiiɗo ngal kawtital gila ngal sincaa.

Kono balɗe tati ɓawto mun, hooreejo leydi ndin Bassirou Diomaye FAYE, itti Ayda MBODJ e hooreeyaaku kawtital ngal lomtiniri mo Aminata TOURE.

Caggal mun e mooɓondiral mawngal PASTEF fedde nde Usmane SONKO woni hoore mun, ɓe lollini cimtol ngol ɓe holli e nder mun wonnde ɓe jaɓaa ngal pellital hooreejo leydi ndii ko faatii e toɗɗagol Aminata TOURE. E bi’ol maɓɓe, Bassirou Diamaye FAYE jogaaki darnde jippinngol Ayda MBODJ. Hiɓe ɓeydi hollude wonndema, sartiiji fedde maɓɓe PASTEF jeyda walla yaada e ɗi Aminata TOURE ɗin.

Hara anngal faamondiral taskaangal hakkunde ɓee hooreeɓe ɗiɗo Senegaal no juhi’on

Ko holno yiiruɗon janngol gollidal hakkunde Bassirou Diomaye FAYE e Ousmane SONKO?

On Tottaama Konngol Hannde e nder ndee yeewtere udditiinde, on kollii miijooji mon e ko faati e kabaaruuji ɗi njiɗɗon artude e mum e nder ndee yontere.

Yewtere men hannde alkamisa ñannde 13, 11ɓuru, en kaalan ko yowitii e alhaali dawrooji leyɗe Afrik wonndude e caɗeele ɗe lunndiyankooɓe ɓurɓe lollude ɓen fottata e mun ngam waawude ƴamude lefol laamu. Hino taskaa hannde e nder leyɗeele ɗuuɗuɗe nde suɓngooji hooreyaaku fewndii, lunndiyankooɓe mawɓe ɓurɓe ɓen ronkkay tawtoreede e woote ɗen, sabu pelle maɓɓe hino wenngaa, maaɗun ɓe winndaaki e doggol wootooɓe maa kanndidaaɓe sabu ellaaji goɗɗi e goɗɗi.

Yeru mun taskaama ko ɓooyaa Tanzanie, Cameroun, Cote d’ivoire, Guinee Bissau, hayi Guinée, Benin fewndo ɗoo wonndude e leyɗe goɗɗe. 

Ko darnde holnden ɓee lunndiyankooɓe haani jogaade ngam ɓe ronkee pottineede e ƴamooɓe lefol laamu leydi maɓɓe?

E miijo mon ko holɗum ngol haɗugol ɓe lunndiyankooɓe mawɓe ƴamude lefol laamu waawi battinde e nder leydi?

Hannde e alarba ñannde 12, 11ɓuru, yewtere men no nawra en Gine. Ko habbanoo gila duuɓi 30 laatike. Ardiiɓe laamu faddewu fampike hanki golle ndee oogirde simandu ɓurnde e mawnude e nder adunaaru nduu e oogirɗe to janɗe asetee. Sosiyeteeji Rito Tinto e Consortium Winning e nder gollidal Guinée assay hitaande kala janɗe toonuu miliyon 120. Fii adugol ɗee oogirɗe, ko timmi kilomeetre 650 raayi waɗaama itti fud-naange haa hirnaange Gine. E bi’ol hooreeɓe ɓen, Simandou saaboto sincangol ginenaaɓe ujunu ujune gollirɗe, wondude e haɓugol baasal e ɓamtugol faggudu leydi ndii.

E miijo mon ko holɗum ngoo fello Simandou anndanta Gine?

Hiɗon miijii wonndema ɓiɓɓe leydi ndii dañay nafa Simandou?

Talaata 11 lewru11ɓuru, yewtere men no nawra en hannde Balem e nder Bresil, nokku ɗo jonnde 30ɓere ONU e ko faati e taariindi udditi gila hanki e altine no wi’e COP30. Hooreeɓe leyɗe, pelle sosiyete siwil e daraniiɓe taariindi tummbondiran haa ñannde 21 lewru ndu wonuɗen e mun ngam ɓamude pehe ko faati e hiwugol weeyo ngon e ustude nguleeki wonuki e battinde sanne e nder adunaaru nduu teeŋtinii e nder leyɗe Afrik.

Hitaande kala, masiibooji keewɗi weeyo no taskee e nder leyɗe Afrik, ɗum no usta kadi PIB majje.

Ko holɗum duunde Afrik waawi ɗaminaade e ɗee jeewte?

Nde tawi Donald Trump Hooreejo Amerik tawaaka e ndee jonnde 30ɓere COP tawu si ɓe waway ɓamude pehe haɓirɗe mbayliigu weeyo?

Hannde e altine ñannde 10, 11ɓuru, yewtere men no nawra en Gine, nokku to suudu mawndu sariya leydi ndii ɓangini e aset yawtunde doggol aranol kanndidaaɓe taweteeɓe e woote hooreyaaku saatiiɗe ñannde 28 lewru 12ɓuru hitaande nde wonuɗen e mum. E nder kanndidaaɓe cappanɗe njiowo e go’o wallinnooɓe kaytaaji mun ngam taweede e ƴamooɓe lefol laamu, ko ɓee njeenayo tan inɗe mum en woni e ngol doggol aranol yaltinaangol.

Njeeɗiɗo e ɓee kandidaaɓe 9 ko jeyaaɓe e fedde dawro, ɗiɗo ɓe humondira e fedde politik.

Ɓen ko hooreejio leydi ndii Jeneral Mamady Doumbouya e Mohamed Chérif Tounkara dawroyankoojo mo andaaka fota.

Ko holno ñaawirɗon ngol doggol aranol kanndiidaaɓe ngol suudu mawndu ñaawirndu yaltini? kandidaaɓe njeenayo ɓe debbo gooto tawaa.

Ɓee dawroyankooɓe ɓe kandidaaku mun jaɓaaka wano Lansana KOUYATE, Dr Ousmane KABA, Dr Ben Youssouf KEITA no jogii balɗe tati ngam waɗude wullitannde si ɓe yiɗi, nde tawi ɓe holli wonndema ɓe haanaaka pottineede.

Hiɗon miiji wonndema wooday e maɓɓe wattoyteeɓe e ngol doggol kanndidaaɓe ado suɓngooji ɗii?

Ko holno taskorɗon arsike kandidaaɓe 8 wonuɓe e tiindondirde e Jeneral MamadI DOUMBOUYA e suɓgooji hooreyaaku Gine? ko hombo e maɓɓe miijiɗon waaway dartaade hooreejo laamu faddewu nguu?

On Tottaama Konngol Hannde e nder ndee yeewtere udditiinde, on kollii miijooji mon e ko faati e kabaaruuji ɗi njiɗɗon artude e mum.

Alkamisa, ñannde 6, 11ɓuru, hannde kadi hiɗen yewta fii ndee ŋakkere kuɓɓan taska Mali heɓii leɓɓi ɗiɗi. Ɗum ko gila fedde kuliyankoore JNIM toŋi naatugol karbiran e nder ndii leydi. Ngal anngal karburan non battinii sanne e ngurdam malinaaɓe, golle no dartii e baŋŋeeji ɗuuɗuɗi e nder leydi ndin haa hewti Bamako. Hay cuuɗi safrorɗi alaa e gollude fewndo ɗoo sabu ndee ŋakkere kuɓɓan, alhaali maapinɗo yoga e ɓiɓɓe leydi ndii.

Hay si tawii ardiiɓe laamu faddewu no darodi hannde e wallidiiɓe maɓɓe ngam naadude kuɓɓan e haɓude caɗeele wuuraaɗe ton e oo saayi, haa ni ndee ɓitteende JNIM no tiiɗi e dow Malinaaɓe.

Ko honno yiiruɗon ngurɗam Malinaaɓe hannde? 

Hara ko haa honte ɗee caɗeele ɗe malinaaɓe wuuri sabu ndee ŋakkere kuɓɓan haaɗata? Sabu ɓee kuliyankooɓe JNIM no jokki ɓittugol laamu faddewu nguu. Ñannde kala ɓe semmbina peeje battinayɗe e nguurdam malinaaɓe.

Holko saabii ardiiɓe Mali waawaali haa ni ɓamude pehe ngam falaade ɗee caɗeele?