On Tottaama Konngol

Hannde e nder yeewtere On Tottaama Konngol, on holli jianɗe mon ko faati e orngal wooteji horeyaaku leydi to Guinee. Ina teskaa, caggal jonte ɗiɗi pawɗe ko ngal orngal fuɗɗi, ngal hewiraani noon dille hono no woowiri. Holno ñaawirɗon ngal orngal ngal lulndiyankooɓe mawɓe tawaaka e maggal?

Hannde e talaata ñannde 16, 12ɓuru, yewtere men no yowitii e deesewal Afrik fijo balon CAN hitande 2025 yuɓɓinteengo Marok gila ñannde 21 lewru nduu wonuɗen e mum haa 18 lewru darotoondu hitaande 2026. Eltooɓe diɗɗe walla leyɗe 24 tawtorteeɗe e ngoo foolitiro lollinii doggol fijooɓe maɓɓe tawtorteeɓe e ɗee kawrite. Hay si tawii doggi ɗiɗɗe goɗɗe no weltora, hollude wonɗe eltoowo on waɗii golle moƴƴe ko faati e suɓagol fijooɓe ɓen, woodii doggi fijooɓe lollinaaɗi jibinɗi haalullaaji ɗuuɗuji, nde tawi hino woodi fijooɓe nantuɓe innde ɓe yogaaɓe fawnoo yaakaare e ɗow mum ɓe innde mum tawaaka e doggol fijooɓe leydi maɓɓe lollinaangol. Gila Koddiwaar, Mali, Senegaal Kamerun, Egipt haa e leyɗe heddiiɗe, ko honno taskorɗon loggol fijooɓe tawtorteeɓe e ngoo foolotiro CAN?

Altine 15 lewru 12ɓuru, en kaalan hannde fii banki Dawlaaji Leyɗe AES moɓe wi’i BCID-AES. Jaagorɓe halfinaaɓe faggudu leyɗe tati AES, Mali, Burkina Faso e Niger, tummbondirii yontere faltiinde nde to Bamako nokku ɗo ɓe siifi nanondiral ngam waɗude banki mo leyɗe maɓɓe ndenndi.

Faandaare nden ko ngam ɓeydude jokkondiral e ɓamtaare ngal dental AES.  Leydi kala yaltinay buuɗi walla ngalu ngam waawude wuurnude oo Bank. Ɗum hino tolnoo e miliyaar 500 kaalisi Cfa.

Ko holno yiiruɗon ngol sincugol Bank AES?

On Tottaama Konngol Hannde e nder ndee yeewtere udditiinde, on kollii miijooji mon e ko faati e kabaaruuji ɗi njiɗɗon artude e mum e nder ndee yontere...

Alkamisa ñannde 11, 12ɓuru, hiɗen taskoo hannde alhaali jibinɗo haalullaaji ɗuuɗuɗi e nder leyɗe hirnaange Afrik. Oo no yowitii e darnde CEDEAO ɓurndinndinaande e alhaaliiji ciwle laamu taskaaɗi jonnte faltiiɗe Gine Bissawo e Benin. To baŋŋe Benin CEDEAO Sembinii darnde mayre e alhaali etannde liɓal laamu Patice Talon waɗunde yontere yawtunde, fedde ndee wallitori konunkooɓe ngam artirde leydi ndii e laawol sariya. Hay si tawii yoga weltorii CEDEAO ko sembini darnde mayre e alhaaki Ɓenin, kono woodii kadi ñiñuɓe golle dental ngal, tippude e no ngal darori e alhjaali ciwlere laamu Umarou Sissiko Embalo Gine Bissawo, nde tawi ton ko diplomatie CEDEAO rewi wano waɗiri e nder leyɗe goɗɗe.

Ko holno taskorɗon ndee darnde CEDEAO ɓurndinndinaande e alhaaliiji ciwle laamu Gine Bissaawo e Benin?

Tawi si CEDEAO beyday daraade e oo alhaali Gine Bissawo wano yiɗiri lumndiyankooɓe leydi ndin?

Hannde alarba 10 lewru 12ɓuru, en kaalan ko faati e alhaali aadodal jam siifaangal e alkamisa ƴaɓɓiiɗo Dawlaaji Ndentuɗi Amerik, hakkunde RD.Congo e Rwanda. Tawu si ngal nanondiral aran jibinde jam yelaaɗo on RD.Congo? Balɗe nayi caggal nde ɓee hooreeɓe ɗiɗo Félix Tshisekedi e Paul Kagame siifi ngal nanondiral ngam lannude hare ɓooyunde fuɗnaange Congo, Félix Tshisekedi tuumii yerondiraaɗo makko mo Rawnda Paul Kagame waasude teddinde ngal aadodal maɓɓe dartingol hare.

Himo holli wonndema bimmbi siifannde nden tigi konu kisal Rwanda ardike piyanɗe muusuɗe e nder worgo Kiwu, nokku to fitinaaji jokki hakkunde Murtuɓe M23, ɓe Rwanda tammbitii e konu laamu RD.Congo. ko Ɓuri yimɓe 30.000 dogii Uvira, ɓe fattike Burundi, huunde maapinnde hannde sanne ardiɓe ɓen.

Hannde talaata, 9 lewru 12ɓuru, yeewtere men no nawra en e bannge Coftal-ɓalli. En kaalan ko faati e foolotiro fuku-koyngal winndere yuɓɓinteengo gila ñande 11 lewru 6ɓuru haa ñande 19 lawru 7ɓuru hitaande 2026 to Dawlaaji dentuɗi Amerik, Canada e Mexique. Diɗɗal kala anndii guɓɓal ngal jeyaa, e diɗɗal ngal tiindondirta, caggal nde urɓa oo waɗaa ñande aljuma jawtuɗo oo.

To bannge duunde Afrik leyɗe jeenayi walla diɗɗe jeenayi tawtorte e ngoo foolotiro adunaaru fuku-koyndal.  Holno yiiruɗon oo urɓa waɗaaɗo, wonndude e no guɓɓe ɗen jooɗori ? Holno taskorɗon arsike diɗɗe afriknaaje e ngoo foolotiro ? Senegal tiindondiray e France, Maroc fottay e Bresil, diɗɗal Cote d’ivoire e Allemagne, Algerie fijiday e Argentine.  Ko holno yiiruɗon ɗee guɓɓe ɗe kippu mon jeyaa ? Ko tama’u wonngu joganiɗon diɗɗe mon e ngoo foolotiro fuku-koyngal deesewal winndere ?

 Hannde altine 8 lewru 12ɓuru ka yeewtere men hiɗen yiilora Benin, nokku to ɓiɓɓe leydi ndin finndi hanki e kuli huli mawɗi, ɗum ko caggal nde kununkooɓe haalori tele ngenndi Benin, anndini wonndema ɓe liɓii laamu hooreejo leydi ndi Patrice Talon. Kono ɗum ɓooyaali, tawi konunkooɓe dartaniiɓe laamu ngun ɓeydii daraade, ɓe raɗiiɓe, bonnitani ɓe eɓɓoore nden, haɗi ɓe laatinde ciwlere laamu ngun.  Hannde bimbi, ardiiɓe Benin hollii wonndema alhaali on heƴii e juuɗe.

Patrice Talon kadi anndinno hanki wonndema sariya fawete e dow eɓɓuɓe liɓude laamu makko nguu. Ndee etaare liɓal laamu waɗungal Benin hanki no jibi ɗuuɗuɓe. nde tawi ɗum waɗii e saayi nde suɓngooji saatii e hitaande darotoonde nde. Suɓngooji ɗi Patrice Talon Hooreeje leydi ndii tawetaake. Holko saabi ndee etaare ciwlere laamu? Hara ko sabu rafi ndeenaagu taskaande rewo Benin, ka ko ko humondiri e caɗeele dawro, walla renndo? Ko holno faamirɗon darnde Dental CEDEAO yaawunde e oo alhaali Benin?

On Tottaama Konngol Hannde e nder ndee yeewtere udditiinde, on kollii miijooji mon e ko faati e kabaaruuji ɗi njiɗɗon artude e mum e nder ndee yontere..

Ñande alkamiisa 4 lewru 12ɓuru, hiɗen kaala hannde ko faati e pooɗondiral aafiingal hakkunde jaŋngooɓe duɗal jaaɓi‑haaɗtirde UCAD e ardiiɓe Senegaal sabu anngal yoɓude ɓee sukaaɓe bursu maɓɓe, maa mi wi’a kaalisi lebbi 13 ɗi laamu ngun joganiiɓe. Gila ñande 17 lewru faltiindu, ɓee jaŋngooɓe e ngal duɗal mawngal Cheikh Anta Diop ngal Dakar no njokki ƴamude ardiiɓe ɓen ɗii bursuuji maɓɓe.

E talaata tiindondiral muusungal waɗii hakkunde ɓee janngooɓe e konu kisal Senegaal. Polisiiɓe ɓee naati ka nder duɗal toowngal ngal, eɓe mberloo gaas lacrimogene faade e jaŋngooɓe ɓee. Ɓeen kadi no bugooɓe kaaƴe. Sukaaɓe ɗuuɗuɓe gaañike e nder ɗii fitinaaji ñalluɗi toon e oo talaata, yoga kadi yaltii duɗal ngal saɓu fitinaaji ɗin.

Ko holno taskorɗon oo alhaali?