On Tottaama Konngol

Hannde e alarba ñannde 3, 12ɓuru, yewtere men no nawra en Kamerun. Pooɗondiral ɓooyungol hakkunde fedde tammbitiinde fuku-koyngal no wi’ee FEKAFOOT e jaagorgal halfinaanga coftal ɓanli Kamerun jibinii alhaali keso. Balɗe caggal nde o suɓitaa laawwol gonngol e hooreeyaaku fedde FEKAFOOT, Samuel Eto'o, ittii Marc Brys eltoowo diɗɗal ngenndi Kamerun Ɗum waɗii e saayi mo foolotiro CAN yuɓɓinteengo Marok habbaa e nder jonnte tati. Lurral hakkunde ɓee hooreeɓe ɗiɗo to baŋŋe fuku-koyngal no anndaa ɓooyi, gila jaagorɗo Kamerun toppitiiɗo coftal ɓalli suɓii Marc Brys ko elta diɗɗal Kamerun heɓii lebbi 18. Ko holno taskorɗon pellital Samuel Eto'o jippingol Marc Brys e hooreyaaku diɗɗal Kamerun, lomtinira mo David Pagou wonnooɗo cukku makko? Tawu si ngol toɗɗagol eltoowo keso e ɓatto foolotiro CAN Marok waɗii e saayi haanuɗo? David Pagou, eltoowo keso oo nde toɗɗaaɗo tun yaltinii doggol fijooɓe tawtorteeɓe ka CAN. Doggol ngol innde fijooɓe ɓattiiɓe eltoowo riiwaaɗo Marc Brys tawaaka. Hino jeya e maɓɓe Choupo-Moting, André Onana, e Vincent Aboubakar.

E miiji mon taw si yiltugol ɓee fijooɓe e ɗee kawondire CAN battinay e tiindondire diɗɗal Kamerun?

Ko holno njiiruɗon arsike David Pagou e waawude nawrude yeeso diɗɗal ngenndi Kamerun ?

Hannde e talaata ñannde 2, 12ɓuru, yewtere men no nawra en hannde Israel. Benyamin Netanyahu tuumaaɗo e alhaali ngeenaari bonndi e ñaawoore fuɗɗiinde gila hitaande 2020, no torii yaafeede. Oo hooreejo jaagorɓe winndanii Isaac Herzog, hooreejo Dawla Israyel ɓatakuru, ngam toraade yo o yaafo mo. Hara ko tippude e honɗum Benjamin Netanyahu yiɗi yo hooreejo leydi Isaac Herzog yaafo mo? Tawu si Isaac Herzog jaɓay yaafaade Benjamin Netanyahu nde tawi ñaawoore makko no jokki haa jooni? Jonnte yawtuɗe, hooreejo dawlaaji Ndentuɗi Amerik Donald Trump holluno miijo wooto ngon, wi’ude wonndema yo Benjamin Netanyahu yaafe o laɓɓinee e tuume ɗe o fawaa ɗee. Sariya Israyel no wi’i wonndema hooreejo leydi no waawi newnude yo neɗɗo yaafe kono tawa ko fawaaɗo kaso. Benjamin Netanyahu non fawaaka tawo kaso, ñaawoore makko no jokki e kadi himo yeddi tuume ɗe o fawaa ɗen. Hiɗon miijii wonndema ballal Donald Trump feewde e Benjamin Netanyahu no waawi battinnde e ñaawoore nden ¿

Altine, ñannde 1, lewru 12ɓuru, en kaalan ko faati e alhaali dawro fewndiiɗo Gine Bisaawo, nokku to hooreejo laamu faddewu, Jeneral Horta N'Tam joƴƴini e aset guwernema makko arano mo jaagorɓe 23 e hoolaaɓe kuuɓal njoyo, mo Ilídio Vieira Té ardii. Yoga e Jaagorɓe oo guwernama ko jeyaaɓa e laamu hinngu ngun, walla ɓaɗiiɓe maa hiɓɓiiɓe hooreejo kiɗɗo Guinee Bissau, Jeneral Umaro Sissoco Embalo wonɗo e oo saha Congo Brazaville caggal nde laamu mun liɓa.

Ciwlere laamu dartinnde suɓngooji hooreyaaku e sarɗinkooji ɗi njaltuɗi mun lollintenoo e alkamisa faltiiɗo. Ngol toɗɗagol guwernama keso Guinee Bissau jibini haalullaaji ɗuuɗuɗi e miijooji seertuɗi hakkunde fedde dawro Umaro Sissoco Embalo e PAIGC lamdiiɓe yo laamu ngu watte e juuɗe fooluɗo on ka woote.

CEDEAO hewti hannde Guinee Bissau ngam etaade no laamu ngun artira e laawol sariya.

Hannde e aljuma, ñannde 28, 11ɓuru en yewtii ko yowiti e darnde rewɓe ngam haɓugol mbayligu weeyo e nder leyɗeele men, maa wi wi’a darnde rewɓe e nder reenugol taariindi men ndin hannde. Nde tawi mbayliigu weeyo ko e rewɓe ɓen ɓurata battinnde, hiɓe haani kamɓe rewɓe ɓen daraade darnde timmude e nder haɓugol oo alhaali. E nder adunaaru nduu fof rewɓe ɓen no jogii lowre jannde ko faatii e reenugol taariindi ndin. Kono darnde maɓɓe ndee timmii wo si tawi ɓe tawnoraama e nder haɓugol oo bone.

Ko holno mbayliigu weeyo wonii e battinirde e rewɓe ɓen ?   

Ko holno rewɓe ɓen haani darorde ngam reenude tariindi ndii ?

Alkamisa, ñannde 27, 11ɓuru, en kaalan ko faati e alhaali dawro fewndiiɗo Gine-Bissaawo. Nokku to njaltundi suɓngooji habbanoo hannde alkamisa. Caggal nde pellanɗe nanaa hanki ka sera suudu laamordu, Hooreejo leydi ndin Jeneral Umaro Sissoco Embalo holli e nder yewtere daɓɓere nde o waɗi wonnde himo e joge. Ɗum jibinanii kulol mawngol e ɓerɗe ɓiɓɓe leydi ndin. Ɓawto mum konunkooɓe halfaaɓe reenugol kisal hooreejo leydi ndii holli wonnde wayliti laamu Umaru Sisiko Embalo, huunde nde lumndiyankooɓe laamu ngun holli wonnde yeddi. E bi’ol maɓɓe ɓee konunkooɓe no faamondiri walla no wonndi e Jeneral Umaro Sissoco Embalo. Waɗirɗo ɗum fii dartinngol alhaali suɓngooji ɗin sabu o foolaali e majji.

Hannde Jeneral Horta NTam ardiiɗo konu njoorndi joɗɗinaama jappeere ngam ardaade Gine Bisaawo e nder hitaande.

Ko holno yiiruɗon oo alhaali Kisal e ndeenaagu ndii leydi woowundi cammine laamu jokkondirɗe?

Ko holɗum ndee samminere laamu heyre waawi battinnde e alhaali deeƴere Gine Bisaawo?

Hannde e alarba ñannde 26, lewru 11ɓuru en yewtan ko faati e torraaji faweteeɗi e dow rewɓe, hino jeyaa e ɗin doolugol ɓe, piyugol ɓe, ɓittugol ɓe walla okkugol dewle ɗe ɓe yiɗaa.Ciimtol ngol salndu ONU daraniindu hakkeeji rewɓe lollini ñannde 19 lewru ndu no holli wonndema ko fawi rewɓe ujune cappanɗe njowo maayi hitaande ƴaɓɓiinde e nder adunaaru sabu fitinaaji fawaaɗi e dow maɓɓe.

Si en ƴettii leyɗe Afrik a tawan limoore rewɓe e sukaaɓe rewɓe hayi ɓe hellifaaka torraaɓe no ɓeyɗoo ñannde kala, tawa faweeteeɓe ɗii fitinaaji yiɗaa lollingol ɓone ɗe ɓe fawaa ɗen, ɓurɓe ɓen yiɗaa ɗum yaltini ka yaasi fii kala sariya no waɗa faweteeɗo kala waɗuɗo wano ɗee bone

Ko holno taskorɗon oo alhaali e nder leyɗeele mon ?

Holko saabii ɓeydagol ɗii fitinaaji e dow rewɓe ?

Holɗe e pehe haanaa ɓameede hannde haa sariya huutore, ɓee waɗooɓe ɗee bone fawee junngo ?

E ndee yeewtere men hannde talaata ñannde 24 mewru 11ɓuru, en kaalan ko yowitii e njillu hooreejo France Emmanuel Macron e nder duunde Afrik. O fuɗɗii nguu njillu ko ñande alkamiisa yawtuɗo to Ile Maurice. O rewii Afrique du Sud, ñande alat, o ñalli Gabon, o hommbi njillu nguu altine hanki to Angola. Faandaare nden ko ngam heyɗintingol huuwondiral/jokkondiral hakkunde leydi France e Afrik e dow gollidal e fannuuji keewɗi, tawa leydi kala yi’an hoore mun to bange ngartam, no wi’e e farayse “Partenariat gagnant-gagnant”.

Oo hooreejo France yeewtidii e yerondiraaɓe makko e ɗee leyɗe ɗe o yillii ko faati e gollidal hakkunde maɓɓe to bannge taariindi, ganndal, kuɓɓam e faggudu ….

Ko holno taskorɗon nguu njillu Emmanuel Macron e nder duunde Afrik        ?

Enee hiɗon miiji wonnde leyɗe Afrik dañay ngartam e ngal gollidal hakkunde majje e France wano holliri Emmanuel Macron?

Hannde altine ñannde 24, 11ɓuru, hiɗen yewta fii ndee jonnde 30 tataɓere e dow jewte ko faati e taariinde ɗe golle mun hombaa e aset yawtunde Bresil, wonndude e ko soñaa e ndee jonnde COP 30. Hay si hino hulanoo woto nanondiral waase dañeede e ngal tumbondiral 30 e taariindi, woodii ko leyɗeele ɗee yiltodi e muuɗun ko faatii e ko haaldaa e ndee jonnde COP nde caɗeele taskaa e mun hikka ɓuri duuɓi yawtuɗi ɗi.

Ko faati e alhaali energie fossil: yeru Gaz, Petrol e goɗɗi e goɗɗi leyɗeele alɗuɗe ɗen holluno wondema waawaa accitugol gollitirgol, kono ɗe waway ustude huutorgol ɗii sunneteeɗi wonuɗi e battinnde e taarindi ndii. Ko faati kañun kadi e wallitorgol leyɗe tampuɗe ɗee nafke ngam ɗe waawa heblanaade mbayliigu weeyo, ɗon kadi leyɗeele ɓurooje e batiinnde e taariindi ndii beydaali huunde e ko haldaanoo rowani ka Cop. Ɗe fodii hikka wallitorgol kalisi dollar miliyar 300 hitaande kala e nder duuɓi sappo, haa e hitaande 2035.

Nde tawi Amerik leydi ɓurndi e batinnde e taariindi ndii tawaaka ka jonnde, hiɗon miijii wonnde aadiiji ɓamaaɗi ɗii hunnete?

On Tottaama Konngol Hannde e nder ndee yeewtere udditiinde, on kollii miijooji mon e ko faati e kabaaruuji ɗi njiɗɗon artude e mum e nder ndee yontere.

Hannde e alkamisa 20 lewru 11ɓuru en yewtan ko faati e alhaali dawro Guinee Bissau. Ton ko e ciifol sakkitorol ngol wonaa ado suɓngooji hooreyaaku e sarɗinkooji, yuɓɓinteeɗi e alat aroore ñannde 23lewru ndu wonuɗen e mun. Ko kandidaaɓe sappo e ɗiɗo ɓe hooreejo leydi ndii Umaro Sissoco Embalo tawa tiindondirta ngam ardaade Gine Bisawo. Kono e ɓee kandidaaɓe 12 ko ɓee tato inɗe mum en ɓuri lollude.

Ɓen ko Umaro Sissoco Embalo ngam waɗude manda 2ɗaɓo, João Bernardo Vieira baadiraawo hooreejo kiɗɗo Gine Bisawo Nino Vieira waraaɗo e hitaande 2009, kañun e Fernando Dias kandidaajo mo humondiraa e fedde politik mo fedde PAIGC nde suudu mawndu ñaawirdu Gine Bisawo salii kandidaaku mun tambita. Ko holno taskorɗon ngal orngal woote Gine Bisawo timmayngal janngo aljuma?

Ko holno miijorɗon ɗii suɓngooji hooreyaaku e sarɗinkooji yuɓɓinteeɗi e alat aroore

 Ko holno taskorɗon arsike kandidaaɓe wonuɓe e tiindondirde e Umaro Sissoco Embalo e suɓngooji hooreyaaku Gine Bisawo?