On Tottaama Konngol

Hannde e alarba, ñannde 20, 3ɓuru yewtere men no nawra en Gammbiya. Sarɗiyankooɓe ɓen fellitii newnude sunningol (haddugol) rewɓe ɓen. Ɓe taskike e altine eɓɓoore sariya yowitiinde e ittitude toŋal ko faati e haddugol rewɓe e nder leydi ndii. On sariya haɗuɗo teddingol rewɓe ko wootaaɗo to suudu sarɗinkooru Gammbiya gila e hitaande 2015. Kono ndee eɓɓoore sariya newnunde sunningol sukaaɓe rewɓe Gammbiya, addii hallulaaji ɗuuɗuɗi e mettu-ɓernde, tentini to baŋŋe pelle e mojobe daraniiɗe hakkeeji rewɓe, fii kala ko eɓɓore sariya nde wootaaka tawo.

Ko holɗum wootugol oo sariya newnuɗo haddugol rewɓe e nder Gammbiya, huunde haɗaande e nder leydi ndii toŋi gila duuɓi jeenay waawi battinde?

Hannde talaata 19 lewru 3ɓuru hitaande 2024, e taskaraam men On Tottaama Konngol, paaɗen ko Niijeer. Ɓee konunkooɓe samminɓe  laamu Mohammed Bazum gila timmoode lewru 7ɓuru hitaande faltiinde ndee, ɓami pellital aseweere ƴaɓɓiinde ndee taƴugol jokkondiral konunkowal e Dowlaaji Ndennduɗi Amerik. E bi'ol hooreeɓe nguu laamu faddewu, sabaabu oo,  ko tawde Amerik teddinaa sarɗiiji jokkondiral maɓɓe ngal.Ko holno yiiruɗon ngaal pellital ? Ko nafoore walla ko caɗeele  holɗe oo alhaali waawi jibinande Niijeer ?Koɗo men e ndee yeewtere ko Mammadu Umaar LII, ɓiɗɗo Moritani heertorɗo ndeenaagu.

Altine, ñannde 18, 3ɓuru 2024, en yewtan hannde kadi ko faati e alhaali dawro Senegaal. Ko e balɗe sakkitiiɗe orgal hooreyaaku ngal wonaa e mum.  Ko e  alat waroore woni ñalaande happande fii yuɓɓingol woote ɗen. Kandidaaɓe 19yo ƴamooɓe lefol hooreyaaku Senegaal no yiilaade, mo kala e senngo mum e nder leydi ndii. Hiɓe jokki anndinnde walla fensitugol eɓɓooje e paandaaje ɗe ɓe joganii Senegalnaaɓe si ɓe arii e laamu. Hanki Buubakaar Kamara gooto e kandidaaɓe ɓen, no wonnoo Senluwi ka  rewo leydi. O holluno faale makko ko yowitii e ndartugol (ƴeewugol) noone aadode siifaaɗe e dow awo. Aamadu BA kañum kadi ko Tammbakunda ñalli keeŋa. konko kadi o anndinno no o eɓɓi laamoraade leydi ndii si tawii o wootanaama. Usmaan SONKO kañum kadi, gilla bimmbi ñannde o accitaa, o waɗuno yewtere yeeso jaayndeyankooɓe ɓee. O holluno wonnde Basiiru Jomaay FAAY kandidaajo maɓɓe on foolan gilla ka rogere aranere suɓngooji.

Ko holno ñaawirɗon no orngal ngal woni e yaarude non gilla Usmaan SONKO e cukko makko yoppitaa?

Taw so  caɗeele dawro Senegaal heddorii caggal?

Hiɗon jogii yaakaare wonnde suɓngooji ɗin waɗan e alat e hoore deeƴere?

Ka taskaram men On Tottaama Konngol hannde e aljuma ñannde 15, lewru 3ɓuru 2024, e nder ndee yeewtere udditiinde, on haali ko faati e alhaali kabaaruuji feƴƴuɗi e ndee yontere. On addii ji’anɗe mon e toɓɓe ɗe yiɗuɗon heɓude fensitande e majje. Heɗitee jeewte waɗaaɗe ɗee.

Hannde e alkamisa ñannde 14, 3ɓuru taskaram men on Tottaama Konngol no nawra en Gine, taskoɗen yewtere nde hooreejo keso jaagorɓe ɓen waɗi RFI en ndee yontere. Ɗum ko yewtere nde Bah Wuuri holli ko faati e juutingol happu laamu hakkundewu nguu Gine. E bi’ol hooreejo guwerneman oo konunkooɓe ciwliiɓe laamu Alfa Konde e hitaande 2021, jonnitataa ngu siwilɓe ɓen e ndee hitaande 2024 wano ɓe foɗirnoo non. Himo holli wonde, ko saabii ɗum, ko tawde maa ɓe yuɓɓina taho woote referandom ɗoo e timmoode ndee hitaande. Hino tawti ɗum kadi haɓugol caɗeele dawro e fagguduyankooje wonuɗe e nder leydi ndii.   

Ko holno ñaawirɗon ngol ɓeydugol happu laamu faddewu Gine taskaaɗo? Oo alhaali ko ko juhi’on?

Ko honɗum ngol juutinngol happu laamu hakkundewu nguu waawi battinde?

Hannde e alarba, ñannde 13, 3ɓuru, en kaalan ko faati e alhaali dawro Koddiwaar. Suɓngooji hooreyaaku leydi ndii no happaa e nder leɓɓi noogay. Fewndo ɗoo yoga e iwarinaaɓe no humpaa anndude ƴamooɓe lefol laamu e wooteeji hooreyaaku waɗooji e hitaande 2025. Loran Gbagbo tawete e suɓngooji hooreyaaku Koddiwaar arooji. Fedde dawroyankoore makko PPACI suɓike mo kandidaajo maɓɓe e woote ɗen. Kono ngol jaɓugol Loran Gbagbo taweede e ƴamooɓe lefol laamu no juhi ɗuuɗuɓe e kadi waɗii haallullaaji ɗuuɗuɗi. Ɗum ko sabu ko tawi koo oo hooreejo kiɗɗo Koddiwaar no ɗawaa hakkeeji makko ɓii-leydiyaagal. O waawata wootude, o waawata kadi taweede suɓngooji hooreyaaku Koddiwaar. Siftinnde fii kala Suudu ñaawirndu mawndu CPI ñaawiino Loran Gbagbo, laɓɓinii mo e alhaali tuumanɗe war-neɗɗanke ɗe o fawanoo, Alhasaan Daramaan WAATARA hooreejo leydi ndii kadi yaafike mo e alhaali Bank santaral on. Kono ɗum montanaali mo jukkooje ɗe o fawaa ɗen.

Ko holno ñaawirɗon ngal pellital fedde dawroyankoore PPACI suɓagol Loran Gbagbo kandidaajo maɓɓe e suɓngooji hooreyaaku Koddiwaar?

Ko holno yiiruɗon janngo dawro Loran Gbagbo?

Hannde e talaata ñannde 12, 3ɓuru, en yewtan ko yowitii e alhaali dawro Caad. “Succes Masra”, hooreejo jaagorɓe laamu faddewu anndinii wonnde o tawete e suɓngooji hooreyaaku leydi saatiiɗi  ñannde 6 lewru 6ɓuru hitaande nde wonuɗen e mum ndee. Oo lunndiyankeejo kiɗo feññinii ngal pellital makko ɓawto nde hooreejo laamu faddewu nguu, Jeneral Mahammaat Idriis Debi, holliti Kanko kadi tawtoreede mo e ƴamooɓe lefol laamu leydi ndii. Succes Masra, oo limɗiyankoojo mawɗo kiɗɗo, fuɗɗiiɗo lollude e lumndiyankaangal laamu Caad e hitaande 2019, ko ñannde 1 lewru 1ɓuru hitaande 2024 toɗɗaa hooreejo jaagorɓe, ɗum non ko ɓawto nde o siifidi e Jeneral Mahammaat Idriis Debi nanondiral.

Ko holno ñaawirɗon ngal pellital Succes Masra, taweede e suɓeteeɓe ardagol Caad?

Ko holɗum ngal pellital waawi battinnde e alhaali renndo e dawro Caad?

Hannde e altine, ñannde 11, 3ɓuru, yewtere men On Tottaama Konngol no nawri en hannde kadi Senegaal, kaalen ko faati e orngal wooteeji hooreyaaku fuɗɗiingal e asewe ƴaɓɓiinde ndee nder leydi ndii. Ɓee kandidaaɓe 19yo wonuɓe e foolotirde fii lomtagol Makki SALL e ardungal Senegaal no jogii jonnte ɗiɗi fii andinngol eɓɓooje e paandaaje ɗe ɓe joganii Senegalnaaɓe si ɓe ngarii laamaade. Ɓe fuddike yaltude Dakar ngam yaade jokkitagol orgal maɓɓe. Orngal seertungal e woowaangal waɗeede Senegaal, sabu ngal hikka  hawrondirii e lewru sumaaye. Ɗum addii yoga e kandiidaaɓe waylude noone waɗugol orngal maɓɓe.

Ko holno ñaawirɗon no ngal orngal fokkitiri nii?

Hiɗon miiji wonnde caɗeele dawro Senegaal heddoorii caggal walla lannii?

Ka taskaram men On Tottaama Konngol hannde e aljuma ñannde 08, lewru 3ɓuru 2024, e nder ndee yeewtere udditiinde, on haali ko faati e alhaali kabaaruuji feƴƴuɗi e ndee yontere. On addii ji’anɗe mon e toɓɓe ɗe yiɗuɗon heɓude fensitande e majje. Heɗitee jeewte waɗaaɗe ɗee.

Hannde e alkamisa, ñannde 7, 3ɓuru ka taskaram men On Tootaama Konngol, en yewtii ko faati e alhaali dawro Senegaal. Makki Sall suɓike ñannde noogayi e nayi fii yuɓɓingol suɓngooji hooreyaaku leydi ndii. Ko hanki e alarba ka tumnbondiral jaagorɓe, hooreejo leydi ndii holliti ngal pellital. Ɗum waɗii caggal nde Suudu Reenooru Doosgal leydi ndii riwti ko haldanoo kon e ngal diisondiral dawroyankowal ngal Makki SALL noddunoo e mum. Kono Suudu reenooru doosngal Senegaal taƴii kayru kadi ñalaande sertunde e nde hooreejo leydi ndin suɓii nden. Ndu suɓike ñannde 31 lewru ndu wonuɗen e mum. Aamadu BA kadi itaama hanki e ardiigu guwerneman on, o lumtiniraama Sidiki Kaba, jaagorɗo halfinaaɗo fiyakuuji Senegaal. Suudu sarɗinkooru ndun kadi wootii hannki sariya yaaforɗo nannganooɓe e ɗii sepooji waɗuɗi gila hitaande 2021 haa hitaande 2024.

Ko holno taskorɗon ɗee ñalaaɗe ɗe Makki SALL e Suudu Reenooru Dosngal leydi ndii suɓii mo kala fii yuɓɓingol woote hooreeyaaku Senegaal?

Ko homɗum ngol fusugol oo Guwernema Aamadu BA waawi battinnde e alhaali dawro leydi ndii?

Ko honno jaɓɓorɗon oo saariya wootaaɗo hanki to suudu sarɗinkooru, fii yaafagol nannganooɓe e ɗii sepooji waɗuɗi gila hitaande 2021 haa hitaande 2024.