On Tottaama Konngol

Hannde e alarba, ñannde 3, 4ɓuru, yewtere men no nawri en hannde Gine, Cemmbe wuurɗe leydi ndii kammbanii hooreeɓe laamu faddewu ngun. Ɗee pelle lumndiiɗe laamu Jeneral Mamadi Dumbuya anndinii e nder ɗerol ngol ɓe lollini hanki e talaata wonnde si CNRD on salike yuɓɓinde woote hooreyaaku Gine, ɗoo e timmoode ndee hitaande 2024, ɓe saloto kamɓe kadi ardugal maɓɓe. Cemɓe wuurɗe Gine no holli wonde ɓe jaɓantaa laamu faddewu nguu ronkude hunnude aadi ndi ɓe ƴettani CEDEAO e hitaande 2022 ko faati jonnitugol laamu ngul siwilɓe ɓen e lewru 12ɓuru ndee hitaande. E bi’ol maɓɓe ɓurii ɗuuɓi ɗiɗi ɓee konunkooɓe no ardii leydi ndii, kono haa hannde hay toɓɓere wootere hollunde wonnde hiɓe miijii yuɓɓiinde woote ɗen ɓe laatinaali.

Ko holno taskorɗon ndee kammbande Cemmbe wuurɗe Gine fewde hooreeɓe laamu faddewu nguu?

Ko holɗum ngal pellital ɗee pelle lumndiiɗe laamu Gine ko faatii e salagol maɓɓe ardungal CNRD on battinta e alhaali dawro Gine e nder Gine?

Hannde e talaata, ñannde 2, 4ɓuru 2024, ka taskaram On Tottaama Konngol, en heddoto hannde kadi Senegaal kaalen ko faati e hooreejo keso leydi ndii Basiiru Joomay Fay e golle heñoraaɗe ɗe senegaalnaaɓe habbori mo. Oo lomtiiɗo Makki SALL e ardungal Senegaal ko hannde e talaata joɗɗinaa e jullere laamu nden. Tumbondiral mawngal, renndingal yoga e hooreeɓe e yerondiraaɓe makko  immiiɓe Afrik nootii. Basiiru Jomaay FAY laatiiɗo hooreejo njowaɓo Senegaal, hiɗen anndi nde oo yiilotoo e nder leydi ndii ngam waɗude orngal makko, o fensitanno koreeji Senegaal eɓɓooje e paadaaje ɗuuɗuɗe ɗe o laatinanta ɓe ñannde o laami. Hannde oo artii e gootum e majje. O anndinii golle ɗe o anniyii waɗande senegalnaaɓe e nder laamu makko.

E miijo mon ko holɗe woni golle teeriiɗe walla heñoraaɓe, habbiiɗe Basiiru Jomaay Faay, hooreejo keso Senegaal on ?

Ko wano waylitere (mbayliigu) honnde Senegaal hatonjini e mum  hannde?

Taw si Basiiru Jomaay Fay waawan laatinde kala ko o fodi ɓiɓɓe Senegaal?

Hannde e altine ñannde 1 lewru 4ɓuru 2024 ka taskaram men On Tottaama Konngol, en yewtii ko yowitii e alhaali laamu Makki SALL e nder ɗii duuɓi sappo e ɗiɗi ɗi o ardii Senegaal.  Ko e hitaande 2012 Makki Sall hewti ka laamu. Jooni leydi ndii heɓii hooreejo keso ardotooto ndi e nder duuɓi jowi arooji ɗin.  Janngo e talaata ñannde 2, nayaɓuru laamu makko timmay, Basiiru Jomaay FAAY, hooreejo keso joɗɗinee ka jullere laamu.

Ko holno taskorɗon golle ɗe Makki SALL laatini ɗen nder laamu makko?

Hannde e aljuma, ñannde 29 lewru 3ɓuru 2024 ka Taskaram On Tottaama Konngol en yewtii ko yowiti e alhaali dawro Senegaal. Ɓiɓɓe leydi ndii suɓike e alat faltiinde ñannde 24, 3ɓuru lomtotooɗo Makki SALL e hooreyaaku Senegaal. E hakkunde ƴamooɓe lefol laamu 19, ko Basiiru Jomaay Faay fooli e suɓngooji ɗin. Poolngu ngu oo lunndiyankoojo heɓi, ka rogere aranere. O laatike hooreejo njowaɓo Senegaal. E altine, binnbi woote ɗee, Aamadu BA tiindodiraaɗo makko e ngoo suɓngo weltanino mo e nder ɗerol ngol o janngi ka ñiɓirɗe fedde APR. Aamadu BA jaɓii poolgu oo lunndiiɗo mo e ɗii suɓngooji fii kala hari njaltudi ndin gaynaaka lollineede.

Ko holno taskorɗon nguu poolgu Basiiru Jomaay Faay ?

Ko holɗum laamu makko waylata e alhaali dawro Senegaal?

E miijo mon ko holno gollidal makko e Usmaan Sonko wa’ata ?

Hannde e alkamisa 28, 3ɓuru en kaalan ko faati e dawro Togo. Sarɗinkooɓe maɓɓe ɓen wootii e ndee yontere sariya wayluɗo dosngal leydi ndin. Si tawii o lawɗinaama, waylitere mawnde waɗan e baŋŋe ardiigu leydi ndin, wano suɓagol hooreejo leydi ndin, alhaali ko haɓɓodi e cemmbe makko e happu laamu makko. Oo sariya keso no wi’i wonnde ko sarɗiyankooɓe ɓen suɓotoo hooreejo leydi ndin, o waɗa mannda gooto mo duuɓi jeego. Ɗum no holli wonde jooni ko parleman on jogii doole. Kono yimɓe ɗuuɗuɓe no liddii oo sariya keso habbiiɗo lawɗineede ko ɓooya. E bi’ol jeyaaɓe e pelle politik e sosiyete siwil, “Faure Gnassingbé”, hooreejo Togo ko laawol no ɓooyira ka laamu woni e ɗaɓɓude.

Ko holno taskorɗon oo alhaali?

Hannde e alarba ñannde 27, 3ɓuru, en kaalan ko faati e alhaali dawro fewndiiɗo Mali. Lebbi 24 ɗi hooreeɓe laamu ƴanngal Mali sakkitii ɓeydude e happu laamu maɓɓe timmii hanki e talaata. Kono haa hannde ɓee konunkooɓe ciwliiɓe laamu e hitaande 2020 hollaali huunde ko yowitii e yuɓɓingol woote hooreyaaku leydi ndii. Nde ɓe hewti ka laamu, ɓe foduno CEDEAO e ɓiɓɓe leydi ndii wonnde ko lebbi 18 ɓe ardoto. Kono nde on happu timmi, ɓe felliti ɓeydude lebbi 24 timmuɗi hannki ɗii. Nguu happu heɓori e hoore karahan tawi ko maa kaaldal waɗa hakkunde maɓɓe e Dental Leyɗe Hirnaange Afrik CEDEAO. Ko taskaa koo e ɗii lebbi sakkitiiɗi, no holli wonnde ɓee konunkooɓe alaa anniya tottude siwilɓe ɓee laamu ngun e oo ɗoo saha.

Ko holno ñaawirɗon oo alhaali?

Holko saabii hooreeɓe laamu faddewu Mali alaa e hunnude aadi ndi ɓe ƴettani malinaaɓe e dental CEDEAO ko faati e yuɓɓingol suɓngooji hooreyaaku leydi e hitaande 2024?

E kaa taskaran men hannde talaata, ñannde 26, 3ɓuru, en heddoto fayin e yewtere alhaali dawro Senegaal. Caggal nde suɓngooji ɗin yuɓɓinaa e alat faltiinde, njaltudi araniri nokkeeli wootirɗi goɗɗi lollinaaɗi ɗin hollii ko Basiiru Jomaay Faay fooli. Aamadu BA tiindodiraaɗo makko e ɗee woote weltanike mo hanki e altine e nder ɗerol ngol o janngi ka ñiɓirɗe fedde APR. O holli wonnde o jaɓii poolgu oo kandidaajo lunndiiɗo laamu nguu. Aamadu BA non qirrike poolgu lunndiiɗo mo on e ɗii suɓngooji fii kala njaltudi ndin gaynaaka lollineede taho. Suudu halfinaandu yuɓɓingol woote Senegaal ko e aljuma lollinta njaltudi ndin.

Ko holno jaɓɓorɗon ngol qirragol Aamadu BA poolgu Bashiiru Jomaay Faay?

Ko holno taskorɗon nguu poolgu Basiiru Jomaay Faay, e laataade  mo hooreejo njowaɓo Senegaal?

Hannde e altine, ñannde 25, 3ɓuru, en yewtan ko faati e alhaali dawro Senegaal. Ɓiɓɓe leydi ndii suɓike hanki e alati ardotooɗo Senegaal e ɗii duuɓi jowi arooji. Ɗum ko caggal nde wonuɓe e ƴamude lefol laamu nguu waɗi orngal e nder balde sappo e ɗiɗi ngam fensitande senegalnaaɓe eɓɓooje e paandaaje ɗe ɓe joganii jamaa on si ɓe arii e laamaɗe leydi ndii. Kadidaajo foolayɓe e ɗee woote e ɓee ƴamooɓe lefol laamu sappo e jeenayo, laatoto hooreejo njowaɓo Senegaal wootanaaɗo ɓawto Makki SALL.

Ko holno ñaawirɗon no ɗii suɓngooji hooreyaaku Senegaal feƴƴiri hanki e alat? Ko faatii e keewal wootooɓe ɓen, timmugol alaaji wootirɗi e nokkeeli wootirɗi ɗin ?

Taw si ngol yuɓɓinol ɗii wooteeji ɗoftike sariya? Kaa woodii ko taskiɗon e alhaali oo ko juhi on  ?

Ka taskaram men On Tottaama Konngol hannde e aljuma ñannde 22, lewru 3ɓuru 2024, e nder ndee yeewtere udditiinde, on haali ko faati e alhaali kabaaruuji feƴƴuɗi e ndee yontere. On addii ji’anɗe mon e toɓɓe ɗe yiɗuɗon heɓude fensitande e majje. Heɗitee jeewte waɗaaɗe ɗee.

Ina hasi ndee hitaande 2024 laato ɓurnde wulde e taariika winndere ndee. Ko ɗuum woni ko feññini ciimtol goomu metewo winndere tawaangu e nder fedde [ONU]. Ciimtol ngol goonginii wonnde ko hitaande 2023 faltiinde nde wonii haa ɗo ɓurnde wulde. Ina jeya e sabaabuuji ɗee caɗeele, ɓurandiral leyɗe to batte ngaluuji jawle, ŋakkeende nguure kam eggirle ɗee. So ɗuum fof renndii, fawtii e ilameeje, yooro, cumuuli ladde, saabi haa nguleeki weeyo ngoo e ɗii duuɓi sappo sakkitiiɗi laatii ɓurɗi sattannde winndere nde etee so ɗuum safraaka, firtaare winndere ndee ina heƴi heen.Ko e ndee toɓɓere yeewtaten hannde 21 lewru 3ɓuru hitaande 2024 e taskaraam men On Tottaama Konngol. Koɗo men ko Abdullaay BAH mo ganndal mum yaaji e alhaali weeyo hono hertorɗo weeyo wallah [kilimatolog] e fransinkoore.