On Tottaama Konngol

Hannde e nder yewtere On Tottaama Konngol, on kollii mijooji mon ko faati e hare hakkunde Israayel e Hamas. Ɗum ko caggal nde ndee hawre heɓi lebbi 3 gila nde fuɗɗii. Holno ñawirɗon ndee hare?

Hannde e taskaram On Tottaama Konngol, on holli mijooji mon ko faati e ngol huutorgol doroonje werloo bommbuuje e  dow siwileeɓe e nder yoga e leyɗe Afrik Woni e leyɗe Sahel walla ko Najeriya, musiibaaji waɗii, siwilɓe waasii pittaali maɓɓe. Mbele ɗum ko tewaare walla ko ŋakkere eltagol timmungol wonande konunkooɓe ɓen?

Ka taskaram men On Tottaama Konngol hannde e aljuma ñannde 5, lewru 1ɓuru 2024, e nder ndee yeewtere udditiinde, on haali ko faati e alhaali kabaaruuji feƴƴuɗi e ndee yontere. On addii ji’anɗe mon e toɓɓe ɗe yiɗuɗon heɓude fensitande e majje. Heɗitoɗee jeewte waɗaaɗe ɗee.

Hannde e alarba, ñannde 4, 1ɓuru, en yewtii ko faati  e alhaali e ɗee diɗɗe tawtorteeɗe e ngoo foolotiro Kan saatiigo Koddiwaar e ɗee balɗe arooje. Eltooɓe diɗɗe ɓen fow feññinii innde fijooɓe tawtorteeɓe ɓen. Ko holno jaɓɓorɗon ngol  doggol fitooɓe suɓaaɓe ka leydi mon?  E miijo mon taw si ɓee taƴan kutu?

Hannde e alarba, ñannde 3, 1ɓuru, en yewtii ko faatii e alhaali dawro Caad. Hooreejo leydi ndii suɓike e altine yawtunde ndee Siksees Masra,  hooreejo jaagorɗe Caad. Oo lunndiyankoojo ɓurɗo e lollude e dartagol laamu Mahamat Idriis DEBI, joɗɗinii hanki guwerneman keso mo jaagorɓe e koolaaɓe kuuɓal laamu 41 ɓe o gollida. Kono jaagorɓe ɓurɓe ɓen e oo guwerneman makko ko hiɓɓe, jaagorɓe heyɓe ɗuuɗaali.                                                                                  

Ko holno taskorɗon ngol suɓagol Sukses Masra hooreejo jaagorɓe?

Ɗum ko huunde juhude on? Ko holɗum ɗum waawi battinde e alhaali dawro Caad

Hannde e talaata, ñannde 2, 1ɓuru 2024, ka taskaram On Tottaama Konngol, en yewtii hannde ko faatii e MINUSMA, saldu Dental Adunaaru ONI toppitiindu jam e kisal e nder Mali. Aadi ndi nguu konu MINUSMA ƴetti ko faati e yaltugol maggu e nder Mali timmi hecci hannki ñannde 31, 12ɓuru hitaande faltiinde ndee. MINUSMA timminii aadi ndii, ɓe yaltii Mali haa laaɓi poy. Ɗum ko caggal duuɓi sappo ɗi ɓe waɗi e nder leeydi ndii.

Ko holɗum maadiɗon e gonal konu MINUSMA e nder Mali? Ko holno ñaawirɗon ngol yaltugol MINUSMA Mali haa laaɓi?

Hannde e altine ñannde 1 lewru 1ɓuru 2024 ka taskaram men On Tottaama Konngol, on feññinanii men ko yelaniɗon hoore mon, ɓesngu mon walla leydi mon e ndee hitaande heyre 2024.

Hannde e aljuma, ñannde 29 lewru 12ɓuru 2023 ka Taskaram On Tottaama Konngol en yewti ko faati e  darnde rewɓe ko yowitii e ɓamtaare dowri e nder leyɗeele Afrik. Hino laaɓani mo kala wondema rewɓe ɓen, kala ka ɓe hikkori, kala ɓaŋŋe mo ɓe jeyaa, no darii darnde mawnde ko faati e ɓamtugol faggudu leyɗe maɓɓe. Hay si tawii darnde maɓɓe annditaaka walla no acciraa ɓaawo, hino laaɓani mo kala wondema leydi waawataa ɓamtaade si tawii rewɓe ɓen tawnoraaka.

  Ko honno yiiruɗon hannde darnde maɓɓe ko yowiti e ɓamtaare dowri ?

Ko caɗeele honɗe rewɓe ɓen jogii hannde e nder darndeeji maɓɓe ngam timminde paadaaje maɓɓe ko yowitii e ɓamtaare dowri ?

Hannde e alkamisa, ñannde 28, lewru 12ɓuru 2023 ka taskaram On Tottaama Konngol, on artanan en e kabaru yawtuɗo e nder ndee hitaande 2023 wonunde e waynaade, kabaaru mo maaditiɗon tawa himo o battinii e mon. Woni e nder Afrik maa e leyɗe adunayankooje goɗɗe, woni ko to baŋŋe dawro, ndeenaagu, kisal, cellal, faggudu taariindi needi, maa baŋŋeeji goɗɗe.

Hannde e alarba, ñannde 27, 12ɓuru 2023 yewtere men no nawri en Caad, kaalen ko faati e eɓɓoore dosngal kesal (dustuuru) leydi ndii, caggal nde yoga e caadnaaɓe wootani ngal “eyyo” ñannde 17 lewru ndu wonuɗen e mul nduu.  Suudu halfinaadu yuɓɓinngol suɓngooji e nder Caad no wi’ee “CONOREC ɓannginii e alat faltiinde njaltudi ɗee woote yuɓɓinaaɗe. E nder wootuɓe teemedere kala, 86 ko “eyyo” on wooti.  Ko 14yo e nder teemederewel pet wooti holli jaɓaali. Kono pelle lunndiiɗe laamu Caad hollii jabaali njaltuɗi oo referandom. Ngal doosngal Caad wootanaangal no okki hooreejo leydi ndii doole. Hino yaanani mo kadi taweede e suɓngooji hooreyaaku leydi ndii e kadi ko ɓiɓɓe leydi ndin suɓotoo hooreeɓe maɓɓe wano meer’en e perefe e guwerneerɓe maɓɓe.                                                    

Ko holno ñaawirɗon ngal dosngal kesal Caad? Holko oo sariya mawɗo waawi waylude e alhaali Caad?