On Tottaama Konngol

Hannde e talaata, ñannde 17, 10ɓuru 2023 ka taskaram On Tottaama Konngol, en yewti  ko faati e alhaali ndimaaku jaynirɗe e nder Gine. Dente bammbuɗe (senndikaaje) jaayndeyankooɓe yuɓɓinii seppo Konakiri e altine e battane uddugol lowre Guineematin.com nden. E ngoo seppo, ngo jayndeyankooɓe ɓen waɗi fii kala hooreeɓe laamu faddewu nguu newnanaaliɓe yuɓɓinngol ngo, jaayndeyankooɓe piyano, yoga e maɓɓe nanngaa si accitaa kiikiiɗe, woɓɓe kadi barmi e nder mun.             Ko holno yiiruɗon alhaali ndimaaku jaaynirɗe e nder Gine?

Ko honɗum waɗi si tawi ndimaaku jaayndeyankooɓe teddinaaka e nder yoga e leyɗeele men?

Holɗe e pehe haana ɓameede fii dartingol ɓittinanɗe wonaaɗe e waaɗeede e dow jaayndeyankooɓe ɓen ?

Hannde e altine, ñannde 16 lewru 10ɓuru 2023 taskaram On Tottaama Konngol, no nawri en to banŋe coftal ɓalli. En kaalan ko yowiti e urɓa deesewal Afrik fijo balon walla KAN 2024 waɗaaɗo e alkamisa yawtuɗo Koddiwaar. Kala diɗɗal tawaangal hikka e ngoo foolotiro KAN yuɓɓinteengo Koddiwaar anndii guɓal maa mi wi’a puul moo jeyaa e mum e tiindondiraaɗo mun on.

Ko holno ñaawirɗon oo urɓa waɗaaɗo?

Ko honno taskorɗon arsike ɗee  leyɗe 24 tawaaɗe e ngoo  foolotiro Kan 2024? .

Ka taskaram men On Tottaama Konngol hannde e aljuma ñannde 13, lewru 10 ɓuru 2023, e nder ndee yeewtere udditiinde, on haali ko faati e alhaali kabaaruuji feƴƴuɗi e ndee yontere. On addii ji’anɗe mon e toɓɓe ɗe yiɗuɗon heɓude fensitande e majje. Heɗitoɗee jeewte waɗaaɗe ɗee.

Hannde e alkamisa, ñannde 12, lewru 10ɓuru 2023 ka taskaram On Tottaama Konngol, en yewtan hannde ko faati e alhaali fijindaaruuji noddirteeɗi “pari sportif” jaaliiɗi hannde e nder yoga e leyɗeele men. Ko fijindaaruuji ɗi yimɓe ɗuuɗuɓe ɗaɓɓirta kaalisi e mum. Nduu fijindaaru no siforii yeru suɓagol wano diɗɗal fuku-koyngal, hottoo diɗɗal fooloowal ngal, si ɗum wonirii non o daña kaalisiiɗi wallinaaɗi ɗin. Nduu fijindaaru kaalisi hino waawi wonde to baŋŋe fuku-koyngal, dogudu pucci, jippiro, fuku-junngo, diwe-dare maa fubbagol…. Si tawii mo suɓiɗaa on heɓii poolngal, totteɗaa yeru kaalisiiji ɗi fodaɗaa ma mi wi’a ɗi pariyuɗaa ɗin e dow mun. Hannde kala ka yahruuɗaa a tawan sukaaɓe e mawɓe hay e rewɓe no fija ɗum.                                                                 

Ko holno taskorɗon ngol jaalagol ɗii fijinaaruuji pariyugol coftal ɓalli wano pariiji fuku-koyngal?  Holko saabii jaalaade ɗum e renndo ngon?                                

Ko holɗum "pari sportif" oo wonii e battinande fijooɓe ɓen?

Hannde e alarba, ñannde 11, 10ɓuru 2023 ka yewtere men On Tottaama Konngol en kaalii fii Niijeer, ko faati e alhaali leydi ndii gila konunkooɓe cifii laamu Mohammed Bazum ñannde 26 lewru 7ɓuru. Caggal nde ɓee konunkooɓe felliti ardagol Niijeer, joɗɗina guwerneman mum, yaggine e pellite ɗuuɗuɗe ƴettama liddu maɓɓe. CEDEAO fawii ɓe jukkooje, yoga e keeri hakkunde Niijeer e leyɗe goɗɗe uddaama, Faransi fellitii yaltinde konunkooɓe mum wonuɓe ton, Dawlaaji Ndentuɗi Amerik (USA) kadi felliti dartingol balle mum faade e leydi ndin. Aljeriya kañun kadi ƴettii pellital dartingol kaaldal ngal faandinoo waɗude hakkunde niijeernaaɓe.

 Ko holno yiiruɗon alhaali Niijeer gila ɓee konunkooɓe ardii leydi ndin?

Talaata ñannde 10, 10ɓuru, ka taskaram On Tottaama Konngol, en yewtan  ko faati e alhaali ɓornateeri nannduɗi lekkolɓe ɓen maa mi walla wi’en comci gooti ɗi sukaaɓe janngooɓe yamiraa ɓornagol e nder yoga e duɗe jannginirɗe. Hay si tawi e nder duɗe jannginirɗe goɗɗe lekkolɓe ɓen wattoto walla ɓornoto kala comci ɗi ɓe faalaa fii yahugol ka jannde, hannde duɗe jannginirɗe yogaaje e leyɗe Afrik no wajimmbini janngooɓe maɓɓe ɓornagol comci gooti, nannduɗi. Wano Togo, Benin e leyɗe goɗɗe, hikka hino farlii kala lekkoljo janngoowo e duɗe maɓɓe ɗen waɗtagol ɓornateeri nanndundi ndi hooreeɓe ɓen yamiri ka lekkolji. Hay wonuɓe ɓen ka duɗe mawɗe, ko comci nannduɗi ɓornotoo. Ko holno yiiruɗon oo alhaali wajinbingol walla farlugol ɓornagol comci gooti ka lekkolji?  Hiɗon tawti ndee feere  yaminde janngooɓe jannde leyleere ɓornagol comci gooti? Ko holɗum hono ndii ɓornateeri lekkolɓe battinta e jannde maɓɓe?

Hannde e altine, ñannde 9 lewru 10ɓuru 2023 taskaram On Tottaama Konngol, en yewtii hannde ko faati e alhaali fuɗɗitagol hare hakkunde Israyel e Palestiin, caggal nde Hamas fampii hawre liddu Israyel e asewe yawtunde ndee. E bi’ol Salndu Hamas jogiindu kaɓirɗe ɓe fuɗɗike ndee hawre nde ɓe jammi « Toɓo al-Aqsa ». Ɗum wonii sabu dartingol aadodal jam teddinanoongal gila lewru 5ɓuru hitaande 2023. Tippude e limoore nde jaagorgal Israyel halfinaangal cellal lollini, ko ɓuri yimɓe 700 waasii pittaali mum e nder Israayel. Laamu ngun hollii wonnde ko ɓuri yimɓe 100 ciwlaama e ndee hawannde. Ujune ɗiɗi yimɓe kadi barmii e nder mum. Yottagol konu Israyel ngun ɓooyaali hay seeɗa. Hella Gaza kadi ko ɓuri palestinaaɓe 560 maayii e battane ɗee fiyanɗe weeyo ɗe Israyel werlii e dow Gaza. Ujune barmii. 

Ko holno yiiruɗon alhaali fuɗɗitagol ɗee hare hakkunde Israyel e Palestiin?

Hiɗon huli wota ndee hawre hakkunde Palestiin e Israyel wa’u wano hare hakkunde Ruusiya e Ukreeniya?

Hannde e nder ndee yewtere udditiinde, heɗiyankooɓe hollii miijo maɓɓe ko faati e kabaaruuji ɗi ɓe yiɗi artude e mum e nder yontere nden.

Hannde e alkamisa, ñannde 5, lewru 10ɓuru 2023 ka taskaram On Tottaama Konngol, en yewtan ko faati e alhaali dawro Senegaal. Ko ɓuri kandidaaɓe 200ɗo no faala taweede e suɓngooji hooreyaaku Senegaal saatiiɗi waɗude ñannde 25 lewru 2ɓuru hitaande 2024. Ko holno yiiruɗon oo alhaali ɗuuɗugol kandidaaɓe faalaaɓe taweede e suɓeteeɓe ardagol Senegaal? Ko holno oo alhaali baabagol (bannbugol/paarenugol)  ɗaɓɓooɓe laamu waɗirtee? Yoga e lunndiyankooɓe ɓen no ŋiñi oo alhaali. E bi’ol maɓɓe, ndee eɓɓoore ko liddu maɓɓe ƴettanaa. Ko ngam ustuude limoore ɗaɓɓooɓe lefol laamu ɓen ndee eɓɓoore lelnaa. Onon kadi hiɗon tawti ngon miijo?

Hannde e alarba, ñannde 4, 10ɓuru 2023 ka yewtere men On Tottaama Konngol en kaali ko faatii e ahaali Gabon. Lewru caggal nde Jeneral Bris Oligi Ngema ardii leydi ndii ko mbaadi honndi yiiruɗon ɓee hooreeɓe heyɓe Gabon? Nde Oligi Ngema hooreejo laamu faddewu nguu waɗata woondoore makko, o foduno piiji ɗuuɗuɗi hino tawaa e majji jonnitugol laamu ngun siwilɓe, reenugol keɓe demokarasi ɗen e haɓugol ngeenaari bonndi, fewndo ɗoo ko timmi yimɓe noogayo tuumaaɓe wujjugol kaalisiiji laamu, hawtugol waɗa ko boni e ñemmbugol siifande hooreejo leydi no sokaa. Ko holno ñaawirɗon laamu Oligi Ngema e nder lewru walla e nder ɗee balɗe cappaɗe tati? Ko faati e pellite arane ɗe ardiiɗo laamu faddewu nguu ɓami?