50 onns voluntari tar il Maraton da skis engiadinais – in giubileum extraordinari per Rudi Cadisch. Il maraton da skis engiadinais festivescha il giubileum da 50 onns. Ils 16 da mars dal 1969 è stada l'emprima ediziun da la cursa da passlung da Malögia a Zuoz/S-chanf. Cun il maraton festivescha era Rudi Cadisch da Malögia. Il mecanist d'autos e scolast da skis è dapi il principi voluntari tar il maraton. En il Profil raquinta Rudi Cadisch da 50 onns maraton.

Ella è cusunza ed il chau creativ dals vestgìds da gala da l'elecziun da la «Miss Svizra 2018». «Senza il sustegn da mia famiglia na vegniss jau betg da far quest spagat». Ils davos diesch onns ha Manuela Gobetti-Lutz (39) bajegià si a Weggis ses agen atelier da moda e gì il medem temp sias trais buobas.

Quest spagat tranter famiglia e fatschenta è insatge che la dunna, oriunda da Rabius, enconuscha era da si'uffanza. Ses geniturs han manà blers onns l'ospizi sin il Pass dal Lucmagn ed uschia hai gì num: lavurar e sa gidar gia da pitschna ensi.

Franco Quinter è impressari cun corp ed olma. L'innovaziun attira el, l'engaschament maina el e networking è sia fermezza. Quai di l'inschigner geometer che crai en dapli che cifras. Tge che sia tatta e ses tat barmier han da far cun sia tenuta da vita raquinta el en il Profil. Ma el raquinta er da las sfidas da las differentas incumbensas, sco per exempel president da las pendicularas Spligia, e pertge ch'el s'engascha insumma en ina branscha avant curt anc estra per el – i va per passiun.

Ils 15 da favrer ha l'enconuschent artist Not Vital da Sent cumplenì ses 70avel. Not Vital è in dals pli enconuschents artists contemporans, e quai sin livel internaziunal. Activ è Not Vital sin bunamain l'entir mund. Cumenzà ha el ils onns 80 a New York, pli tard è el lura era vegnì activ en il Chile, Niger, en la Mongolia ed a Peking, per menziunar mo in pèr staziuns da sia vita.

Dapi dus onns è el possessur dal chastè da Tarasp. Durant quels dus onns hai dà gronds midaments en il chastè. En il Profil raquinta Not Vital dal chastè da Tarasp, ma era da sias aventuras e da la carriera sco artist enconuschent sin tut il mund.

Da mastergn è la dunna da 29 onns fiduziaria, il plaschair vi da quest mastergn aveva ella gia sviluppà sco mattatscha. Uschia ha ella vulì far cun ses geniturs in contract per reglar las lavurs ch'ella e sias soras stuevan far en chasa. Sco dunna creschida ha Flurina Bundi surpiglià il presidi da la gugga Las Lieurs da Trun. I saja reussì detg bain da manar la narradira, ha ella manegià. Dapi dus onns n'è ella betg pli activa en il tschaiver, ma far tschaiver, quai fa ella vinavant cun sias duas soras.

Chavaltgar è ses passatemp numer in. Cun il chaval da siglir va ella ad occurrenzas.

La pli giuvna victura dal premi da litteratura Term Bel ed era in dals pli giuvens giasts dal Profil. Da numnar ella dunna na fiss betg dal tut correct per ella. Da numnar ella in um era betg. Ella sa sentia insaco tranteren. Quai è era la raschun, pertge ch'ella vul midar uffizialmain ses num Stina sin Asa. Quai saja pli neutral. En il Profil raquinta ella da quest premi da litteratura nunspetgà, da ses siemis da star sin gronds palcs e da sia generaziun che ha a disposiziun enorm bleras noziuns per definir lur sex ed orientaziun. Fa quai vegnir pli simpel la vita?

Professiunalmain è la Surmirana actualmain en Burkina Faso - per gievgia grassa returna ella per far tschaiver cun ses collegAs da «Emil's Gugga» da l'Appenzell. Sa gidar cun il concarstgaun è insatge che Anigna Waldegg da Savognin ha emprendì da pitschna ensi. Gia sco battasenda ha ella vivì tenor il motto «Allzeit bereit» ed er ussa sco tgirunza hai num d'esser subit pronta per pachetar las valischas per ina missiun en terras da crisa.

Co che la Surmirana ha realisà ses siemi d'in engaschi umanitar e tge plaz che Savognin e l'Appenzell han en sia vita, raquinta la dunna da 30 onns en il Profil.

«Jau sun maridà cun il hockey e cun mes auto, manegia mia dunna!» Il sport da hockey ha accumpagnà Andreas Duschletta da Samedan gia dapi sia giuventetgna. Suenter avair giugà cun il Club da hockey da San Murezzan activamain – tranter auter ès el er daventà campiun svizzer cun la squadra da juniors – ha l'um da 62 onns s'engaschà plainamain a favur da l'EHC San Murezzan. Uschia è il pastizier, che viva cun sia dunna a San Murezzan, preschent fin quatter sairas l'emna en l'arena da glatsch Ludains sco schef da material. Actualmain dovri però anc ina pli auta preschientscha – quai causa las preparativas per la festa da giubileum da 100 onns EHC San Murezzan.

Cun ses 40 onns ha Ivar Trippolini gia lavurà sin trais continents ed ha là sentì las differenzas da mentalitad e da cultura. «Per propi chapir ils problems e lura era pudair dar il dretg sustegn, ston ins esser là sin plazza e spetgar e tadlar e guardar. E lura plaunet chapesch'ins e vegn era plaunet a meglierar la situaziun».

Avant in onn è el turnà cun sia famiglia en Svizra. En il Profil dal Radio Rumantsch tradescha Ivar Trippolini pertge che ses geniturs savevan avant el ch'el vegnia ad ir in di en l'Africa, e tge ch'el ha fatg en las praschuns dal Bangladesch.

Simon Montalta ha 90 onns e fin avant tschintg onns ha el manà la fatschenta da maschinas agriculas a Glion. Emprais aveva Montalta da fravi, ma lura ha el midà cassacca ed è daventà vendider da maschinas agriculas. Ils onns 50 fin 70 èn stads ils onns nua ch'il puresser è sa midà dal tut, bler è vegnì automatisà. Cun la represchentanza da la firma AEBI han entschet buns onns per Simon Montalta. Dasperas fascheva el anc il pur da nursas cun bunamain 100 nursas.

Ina regurdientscha da buob è per Simon Montalta il di che ses bab ha stuì tutgar d'assagl, il di da la mobilisaziun da la Segunda Guerra mundiala.