Ella ha fatg radio e televisiun, ha scrit per gasettas e magazins e lavura actualmain sco redactura regiunala tar la «Südostschweiz». «Cura ch'jeu hai entschiet cun il schurnalissem hai saviu, quei eis ei!» Ditg ha la figlia da Peter Haas – l'enconuschent dissegnader e caricaturist da Domat – tschertgà sia fortuna en la medema professiun sco ses bab. En il Profil raquinta la dunna da 54 onns da sia via professiunala che ha manà ella sur blers ziczacs tar «Radio Grischa», «Tele24», «Blick», «Schweizer Illustrierte«, «.ch» e dapi 5 onns tar la «Südostschweiz».

Redacziun: Prisca Bigliel

Il plan era da tschivlar al campiunadi mundial da ballape 2018, cura che Patric Collet ha cumenzà la via da l'arbiter da ballape. Il plan è ussa en truclet e resta là. Patric Collet ha tschivlà sis onns gieus da ballape en l'emprima liga. Il siemi da tschivlar questa stad al campiunadi mundial è stà avant 20 onns la motivaziun per cumenzar. Ussa manca sco bab da famiglia e cun agen biro da cussegliaziun da turissem il temp – e forsa er il gust.

Patric Collet ha 38 onns, è creschì si a Riom ed abita uss a Cuira.

Avant quatter onns ha Reto Cavegn (60) pers sia plazza en la fatschenta nua ch'el ha lavurà quasi 30 onns. «Cura ch'ins vegn en quella situaziun, alura han ins tschients e millis patratgs. Jau hai fatg l'entira vita tut - ed ussa es ti senza lavur e na survegns nagina schanza. Ti es memia vegl, ti es memia char, era sche ti vas enavos cun la paja. E lura èsi stà uschè lunsch che jau hai ditg: 'Na, uschia na va quai betg.'»

Nua ch'auters resigneschan e laschan pender las alas, ha el decis da metter tut sin ina carta e da fundar si'atgna interpresa da reclama. In pass ristgà, ma ch'è la finala sa pajà.

En il «Profil» dal Radio Rumantsch raquinta Reto Cavegn ch'è creschì si a Breil da sias aventuras e declera pertge ch'il pass en l'independenza n'ha betg sulet midà sia vita.

El è pli probabel l'unic directur d'ina scola da skis en Svizra che n'è betg magister da skis patentà. Cumenzà ha Bruno Marinoni sia vita professiunala dentant tar ina banca, suenter è el stà involvì en lavurs da restructuraziun e reorganisaziun tar l'anteriura PTT (Posta svizra). Ed er in engaschament tar in'interpresa da forza electrica è stà ina staziun da l'um da 54 onns.

Oz è Bruno Marinoni il directur da l'emprima e la pli gronda scola da skis en Svizra cun 350 emploiads a San Murezzan. Ed er en quest sectur duai dar novas structuras ed ina reorganisaziun.

En il Profil raquinta l'econom ch'è creschì si a Silvaplauna da muments pli dirs en sia vita, per exempel cura ch'igl è ì per relaschar glieud. Dentant er da decisiuns curaschusas nua che Bruno Marinoni era sez restà senza lavur.

Ella è scolasta cun corp ed olma cun in'affinitad per musica, cudeschs ed il durmir sut tschiel avert. Actualmain finescha Sereina Nay ses studi sco pedagoga curativa cun ina lavur davart la pedagogia d'aventura. Tge è quai exact, tgeninas aventuras passenta ella sco chantadura da l'ensemble «HeartKhor», tge aventuras sa pon zuppar tranter dus cuvertas d'in cudesch u era cun durmir sut tschiel avert? Da tut quai raquinta Sereina Nay (33), oriunda da Trun, ch'è dapi set onns da chasa ad Aarau. Accumpagnads vegnin nus da Lucio Dalla, d'in Hymnus da Gion Antoni Derungs, da la band Suma Covjek, da la chanzun «Café Caflisch» e da la vusch da Sophie Hunger.

50 onns voluntari tar il Maraton da skis engiadinais – in giubileum extraordinari per Rudi Cadisch. Il maraton da skis engiadinais festivescha il giubileum da 50 onns. Ils 16 da mars dal 1969 è stada l'emprima ediziun da la cursa da passlung da Malögia a Zuoz/S-chanf. Cun il maraton festivescha era Rudi Cadisch da Malögia. Il mecanist d'autos e scolast da skis è dapi il principi voluntari tar il maraton. En il Profil raquinta Rudi Cadisch da 50 onns maraton.

Ella è cusunza ed il chau creativ dals vestgìds da gala da l'elecziun da la «Miss Svizra 2018». «Senza il sustegn da mia famiglia na vegniss jau betg da far quest spagat». Ils davos diesch onns ha Manuela Gobetti-Lutz (39) bajegià si a Weggis ses agen atelier da moda e gì il medem temp sias trais buobas.

Quest spagat tranter famiglia e fatschenta è insatge che la dunna, oriunda da Rabius, enconuscha era da si'uffanza. Ses geniturs han manà blers onns l'ospizi sin il Pass dal Lucmagn ed uschia hai gì num: lavurar e sa gidar gia da pitschna ensi.

Franco Quinter è impressari cun corp ed olma. L'innovaziun attira el, l'engaschament maina el e networking è sia fermezza. Quai di l'inschigner geometer che crai en dapli che cifras. Tge che sia tatta e ses tat barmier han da far cun sia tenuta da vita raquinta el en il Profil. Ma el raquinta er da las sfidas da las differentas incumbensas, sco per exempel president da las pendicularas Spligia, e pertge ch'el s'engascha insumma en ina branscha avant curt anc estra per el – i va per passiun.

Ils 15 da favrer ha l'enconuschent artist Not Vital da Sent cumplenì ses 70avel. Not Vital è in dals pli enconuschents artists contemporans, e quai sin livel internaziunal. Activ è Not Vital sin bunamain l'entir mund. Cumenzà ha el ils onns 80 a New York, pli tard è el lura era vegnì activ en il Chile, Niger, en la Mongolia ed a Peking, per menziunar mo in pèr staziuns da sia vita.

Dapi dus onns è el possessur dal chastè da Tarasp. Durant quels dus onns hai dà gronds midaments en il chastè. En il Profil raquinta Not Vital dal chastè da Tarasp, ma era da sias aventuras e da la carriera sco artist enconuschent sin tut il mund.

Da mastergn è la dunna da 29 onns fiduziaria, il plaschair vi da quest mastergn aveva ella gia sviluppà sco mattatscha. Uschia ha ella vulì far cun ses geniturs in contract per reglar las lavurs ch'ella e sias soras stuevan far en chasa. Sco dunna creschida ha Flurina Bundi surpiglià il presidi da la gugga Las Lieurs da Trun. I saja reussì detg bain da manar la narradira, ha ella manegià. Dapi dus onns n'è ella betg pli activa en il tschaiver, ma far tschaiver, quai fa ella vinavant cun sias duas soras.

Chavaltgar è ses passatemp numer in. Cun il chaval da siglir va ella ad occurrenzas.