An Europa zeechent sech déi lescht Joren e kloren Trend of: déi traditionell Parteielandschaft, mat enger oder zwou grousse Volleksparteien, déi entweder zesummen oder mat engem méi klenge Partner d’Saach ënnert sech ausmaachen, gëtt et net méi.
 
Dësen Trend gëllt elo och fir Lëtzebuerg. Et brauch een sech nëmmen d’Resultater vun de leschte Chamberwalen unzekucken. Grouss Majoritéiten, déi ganz no un Verfassungsmajoritéiten erukommen – also un zwee Drëttel vun de Sëtz – gehéieren der Vergaangenheet un. Déi zwou Parteien mat de meeschte Sëtz –  d’CSV an d’DP –  géifen an enger Koalitioun haut just nach 45% vun de Wieler representéieren. Déi aktuell a wahrscheinlech zukünfteg Dräi-Parteie-Majoritéit, huet prozentual souguer dobäi gewonnen an huet quasi d’Hallschent vun de Wieler hannert sech.
 
Virun allem déi kleng Parteien, mat deels simplisteschen, jo populistesche Léisungen, rëselen d’Parteielandschaft an Europa ganz zolidd duercherneen.
 
An Däitschland ass et déi rietspopulistesch AFD, déi a verschiddene Bundeslänner weider u ganz grousser Zoustëmmung gewënnt. Et si virun allem déi sozial méi Schwaach, mä net nëmme si, déi op d’Populisten erafalen.
 
 
Dësen Trend hunn déi grouss politesch Stréimungen zum Deel awer sech selwer zouzeschreiwen. Gedriwwe vun engem Sondage zu deem nächsten versichen vill Politiker duerch ganz kuerzfristeg populär Moossnamen hiren Image ze verbesseren. Si dinn d’Leit gleewen, dass de Staat alles kann an zwar direkt . Dobäi gët deen Eenzelen aus der Eegeverantwortung entlooss. Well dat awer net fonctionnéiert an net fonctionnéiere kann, ginn d’Glafwierdegkeet an d’Vertraue verluer an d’Wieler ginn aus Entäuschung an d’Äerm vun de Populisten gedriwwen. Ganz oft baséeiren déi hir Propaganda dorop, dass anerer um perséinleche Problem vun deem Eenzelen Schold sinn : Auslänner, Mënschen mat enger anerer Relioun, enger anerer Hautfaarw, enger anerer sexueller Orientéierung, sougenannten Eliten oder och nach d’Press.
 
Déi grouss Parteien an Europa mussen sech dees bewosst sinn, wa si an Zukunft net weider wëllen un Terrain verléieren. Si dierfen dobäi awer net einfach d’Konzepter vun de Populiste kopéieren. A Bayern, wou d’CSU Jorzéngten dominéiert huet, hu mir gesinn, datt dee Modell, ech géng soën zum Gléck, schif gaangen ass.
 
D’Parteie mussen erëm op d’Leit duergoen an erausfannen, wat si wierklech beschäftegt, wat hir konkret Problemer sinn a wéi ee kann hëllefen mat kohärenten, pragmatesche an zukunftsorientéierten Léisungen, déi och muer nach gräifen ouni awer domat déi nächst Generatioun ze hypothekéieren.
Hei zu Lëtzebuerg ass et der leschter Regierung gelongen mat Reformen net nëmmen d’Erausfuerderungen vun haut unzegoën, mä och Perspektiven fir déi  nächst  Generatioun ze garantéieren an onst Land op muer virzebereeden. Dat muss och der zukünfteger Regierung geléngen am Intérêt vun ons all.
 

Et gëtt eng chronesch Krankheet, déi ganz vill Leit betrëfft, déi awer an eisem Alldag net wierklech intensiv thematiséiert gëtt – d’Einsamkeet. Hei e puer Gedanken dozou vum Josiane Hoffmann

A senger Carte blanche schwätzt de Jean Huss, President vun Akut, iwwer den Zesummenhang tëscht Kriibskrankheeten an Schuedstoffpollutioun aus der Ëmwelt an an eisem Iessen.

A senger Carte blanche schwätzt de Jean Huss, President vun Akut, iwwer den Zesummenhang tëscht Kriibskrankheeten an Schuedstoffpollutioun aus der Ëmwelt an an eisem Iessen.

Léif Nolauschterinnen an Nolauschterer,
A menger Carte blanche vun haut geet et ëm den Dossier « Kriibskrankheeten ».
Eng kuerz Fro an deem Kontext :
Wie vun iech kennt net aus Famill, Noperschaft oder Bekanntekreess Leit, deelweis och nach jonk Leit, déi vu Kriibs betraff an trotz Therapieefforten vill ze fréi aus dem Liewe gerappt goufen?
An de vergaangene 40 Joer  goufe dobäi international riseg Milliarden-Dollar-Zommen an d’Kriibsrecherche investéiert, de gros allerdéngs just an d’Entwécklung a Vermaartung vun oft deieren, fir d’Pharmaindustrie awer immens profitablen, Antikriibsmedikamenter an Therapien.
De Gesamtbilan no iwwer 40 Joer bleiwt allerdéngs, vun e puer Ausnahmen bei e puer Kriibszorten ofgesinn, relativ bescheiden, während ëmgekéiert eng Parti haaptsächlech hormonofhängeg oder neurologesch Tumeuren, Daarmkriibs an esouguer Leukämien oder Gehiertumeuren bei Kanner schläichend zouhuelen.

Léif Nolauschterinnen,
Ët gëtt natierlech national wéi international vu Säite vun Gesondheetsministèren esou genannt „Plans canceren“ : virun allem präventiv Messagen, déi haaptsächlech un d’Eegeresponsabilitéit vum Bierger a Saache Kriibspräventioun appeléieren: net fëmmen, wéineg Alkohol, gesond iessen a méi Beweegung.
Dat ass sécher richteg, et vernoléissegt awer onverständlecherweis vill aner Risikofacteuren a méiglech Ausléiser vu Kriibs: zum Beispill Diesel oder Feinstëbs an der Otemloft dobaussen, Bioziden, Léisemëttel, Phtalaten, Flammschutzmëttel oder Strahlung op der Aarbecht oder doheem, Pestiziden, Nitrater oder aner Schadstoffer virun allem a konventionnellen an industriellen Iesswueren,
Schadstoffer, déi bei praktesch jidderengem vun eis a Laborsanalyse kënnen nogewise ginn. (Neierdings och Mikroplastik)

Léif Nolauschterer
Nach e puer Informatiounen a Konklusiounen.
1.    Schon 2010 haten déi bescht onofhängeg Wëssenschaftler a Kriibsfuerscher aus den USA an engem 450-Säite staarke Rapport un den amerikanesche President virun der systematescher  Ënnerschätzung vu ville kriibsausléisende Chemikalien a Pestiziden, dorënner och de Glyphosat-Roundup vu Monsanto, gewarnt a präventiv Mesurë gefuerdert.

2.    Héich interessant ass och eng rezenz grouss epidemiologesch Etude vun Enn Oktober 2018 am medizinesche Fachjournal „JAMA Internal Medecine“. Si huet 70.000 Leit iwwer 7 Joer suivéiert an alleng de méigleche Bénéfie vu biologesche Liewensmëttel analyséiert. Resultat: 25% manner Kriibs insgesamt, 34% manner Broschtkriibs, a suguer 76% manner Lymphdrüsekriibs.
Eng Fro: wéi wieren d’Resultater, wann endlech Ëmweltpräventioun géif stattfannen a méi Alldagsproduiten manner schadstoffbelaascht a méi biologesch kompatibel wieren?
Dofir als Konklusioun:
Wien wichteg Haaptursaache vu Kriibs scheinbar net kennt oder net wëll zur Kenntnis huelen, dee kann de Kampf géint de Kriibs ni wesentlech gewannen. Dat gëllt iwwregens och fir vill aner Krankheeten.

Jean Huss
President vun AKUT

An den USA sinn no de Mid-Term Wahlen d’Checks and Balances – de Pouvoir a Géigepouvoir - rëm besse besser drun, soen Analysten. Dat ass schéin a gutt, mee dat geet net duer, mengt de François Aulner haut a sengem Commentaire

Falsch verstanenen Individualismus a Liberalismus behënneren d’Entwécklung vum Land. De Räichtum gëtt ongerecht verdeelt an den Zesummenhalt bleift op der Streck. Mir mussen aus där Fal eraus, seet de Robert Urbé vu Caritas Lëtzebuerg a senger Carte blanche.

Falsch verstanenen Individualismus a Liberalismus behënneren d’Entwécklung vum Land. De Räichtum gëtt ongerecht verdeelt an den Zesummenhalt bleift op der Streck. Mir mussen aus där Fal eraus, seet de Robert Urbé vu Caritas Lëtzebuerg a senger Carte blanche.

Zwou Beobachtungen, déi op den éischte Bléck näischt mateneen ze dinn hunn: an déi nei, de 14. Oktober gewielte Chamber, goufen nëmmen 12 Fraen direkt gewielt, méi wéi 14 wäerten et der och no der Regierungsbildung net ginn. Do huet d’Fraequot net vill gehollef!
Op der anerer Säit: bei engem lokale Fest sinn net genuch Parkplazen do, déi éischt hu sech um Rand vun der Strooss hallef op den Trottoir placéiert, sou datt kee méi mat enger Kannerkutsch laanscht kéim. Dann allerdéngs dreift een et op d’Spëtzt: hie parkt net nëmmen um Trottoir, mee hien hält och nach ganz op dem Zebrasträif! Dorop ugeschwat, sot de Chauffeur just: “Wou soll ech da parken?”
Dat ass typesch: wat mat deenen aneren ass, dat ass mir egal, Haaptsaach mir geet et gutt. Dat ass e komplett falsch verstanenen Individualismus: Ech kucken no mir, wa jidderee no sech kuckt, ass jo alles ok! Dat kënnt och vun engem falsch verstanenen Liberalismus: jidderee suergt fir sech, de Staat gëtt op seng Minimalfunktiounen zréck geschnidden, wiem et méi schlecht geet, ass selwer Schold!
Kann een dem Eenzelnen lo awer all Virwërf maachen? Wann de Staat mam schlechte Beispill virgeet? Wann ee solidaresche Sozialsystem schläichend an een iwwer gefouert gëtt, wou jidderee fir säin Erfolleg a Mësserfolleg perséinlech verantwortlech gemaach gëtt. Wou e Steiersystem ëmmer méi individuell soll zougeschnidde ginn – wat ass eigentlech sou falsch drun, datt eng Koppel gemeinsam fir hir Flichte vis-à-vis vum Staat asteet? Dach nëmmen déi Tatsaach, dass nach ëmmer vill Männer – fräi nom George Orwell senger Animal Farm - Gläichberechtegung sou laang akzeptéiere, wéi si selwer méi gläich sinn! Eng Rëtsch alleng verdéngend Männer, queesch duerch all Gesellschaftsschichten, ginn hirer Fra doheem en Haushaltsgeld, an de Rescht behalen si fir sech. Ech hunn och eng Kéier héieren, wéi een op d’Iwwerleeung vu senger Fra, si bräicht eng Botzhëllef, geäntwert huet , dat wier ok, wann si dat vun hire Sue bezuele géif.
Individualismus ass Tromp, Zesummegehéiregkeetsgefill a Solidaritéit bleiwen op der Streck!
Moral an Ethik ass awer eben net nëmme fir den Eenzelnen do, mee och beim staatlechen Handelen. De Lëtzebuerger Geschäftsmodell, mat immense Wuesstemsraten, Steieroptiméierungen an Eidelsuckele vum Reservoir vun de Salariéeën an eisen Nopeschregiounen hëlt dorop keng Récksiicht. Mee mir kréien d’Rechnung lues a lues presentéiert...
Wa mir net vun deem falsch verstanenen Liberalismus an Individualismus rofkommen, net mol rëm zesumme gesinn, wat zesumme gehéiert a Solidaritéit mat deenen héich halen, deenen et méi schlecht geet an net nëmmen eisen eegene Virdeel op Käschte vun deenen anere sichen, dann hu mir keng Zukunft! Dat Bild wat mir bidden, souwuel perséinlech wéi als Gemeinschaft, ass engem Land net wierdeg, dat sou e Potential huet. Mir sollten dee Potential zum Wuel vun alle benotzen, an net nëmme vun engem Del! Dat sief de Koalitionären, déi lo e Regierungsprogramm am Aushandele sinn, an Erënnerung geruff!

D’Uspannung kann ee bal an der Loft gräifen. Firwat géif den amerikanesch President Donald Trump soss esou kuerz virun de Kongresswalen nees op Attacke setzen, säi Liiblingsthema - illegal Migranten - opkachen... an esouguer mat Gewalt dreeën. Mee eppes huet eis geléiert: och wann den Trump eng ganz Partie ënnert eis schockéiert, a Sondagë nees hoffe loossen, dass et ee politeschen Revirement kéint ginn, misst den 8ten November 2016 eis enges bessere beléiert hunn, dat fënnt d’Nadine Gautier a sengem Commentaire.