Umsjónarmaður Bergljót Baldursdóttir.

Evrópska flugöryggisstofnunin hefur bannað notkun Boeing 737 flugvélanna í evrópskri lofthelgi. Bannið tekur gildi klukkan sjö í kvöld. Engin sambærileg ákvörðun hefur verið tekin í Bandaríkjunum og Kanada. Allar þrjár MAX 8 flugvélar Icelandair hafa verið kyrrsettar um óákveðinn tíma.

Allir 15 dómarar í Landsrétti hafa ákveðið að kveða enga dóma upp í vikunni.

Dómur Mannnréttindadómstóls Evrópu í Landsréttarmálinu eyðir ákveðinni óvissu en býr til aðra, segir formaður lögmannafélagsins. Dómurinn skilji Íslendinga eftir í tómarúmi. Formaður Dómarafélagsins telur að dómurinn sé áfall fyrir íslensk stjórnmál. Rætt verður við hana síðar í Speglinum.

Arnar Páll Hauksson, ræddi við Ingibjörgu Þorsteinsdóttur, formann Dómarafélagsins.

Félagsmenn VR samþykktu verkfallsaðgerðir með rétt rúmlega 50 prósentum atkvæða í dag. Ragnar Þór Ingólfsson formaður VR segir niðurstöðuna ekki hafa komið á óvart. Ólöf Ragnarsdóttir talaði við hann.

Um þúsund börn á grunnskólaaldri forðast að mæta í skóla vegna tilfinningalegra erfiðleika eða af öðrum ástæðum. Skólastjórnendur segja vaxandi vanda hversu mikið fólk taki börn sín úr skóla til að fara í frí. Brynjólfur Þór Guðmundsson tók saman og ræddi við Salvöru Nordal, umboðsmann barna og Þorsteinn Sæberg, formann Skólastjórafélags Íslands

Sigrún Davíðsdóttir í Lundúnum fjallaði um Brexit og stöðu Teresu May, forsætisráðherra. Theresa May forsætisráðherra gerði í gær lokatilraun til að endursemja við Evrópusambandið um írsku þrautavaralausnina í útgöngusamningi Breta við ESB. Útkoman er að þrátt fyrir nokkur viðbótarskjöl samkomulaginu til útskýringar þá fékk May engu breytt. Nú segir Evrópusambandið að ekki verði samið frekar og þingið virðist hikandi að samþykkja samning Mays.