Forsætisráðherra segir Klausturmálið og fleiri mál hafa verið áfall og það sé verkefnið framundan að efla traust og virðingu Alþingis. Þingmenn eru komnir í jólafrí.

Sanngirnisbætur vegna vistheimila voru mikilvægt uppgjör við ofbeldi gegn börnum, segja tengiliður vistheimila og umsjónarmaður sanngirnisbóta.

Ákveðið var á formannafundi Starfsgreinasambandsins í dag að vísa kjaradeilu þeirra ekki til sáttasemjara fyrir jól. Endurmeta á stöðuna eftir áramót.

Ekki hefur náðst samstaða milli þjóða á loftslagsráðstefnunni í Katowice í Póllandi. Henni átti að ljúka í dag. Margt er ennþá uppi á borðum og óljóst um framhaldið. Þetta segir sérfræðingur í umhverfisráðuneytinu sem situr við samningaborðið fyrir Ísland.

Könnun á ferðavenjum erlendra ferðamanna á átta stöðum á landinu varpar ljósi á ólíkt hlutverk staðanna, til dæmis eru sjötíu prósent erlendra ferðamanna á Húsavík þar til að skoða hvali.

Ekki hefur náðst samstaða milli þjóða á loftslagsráðstefnunni í Katowice í Póllandi en henni átti að ljúka í dag. Margt er ennþá uppi á borðum og óljóst um framhaldið. Þetta segir sérfræðingur í umhverfisráðuneytinu sem situr við samningaborðið fyrir Ísland. Bergljót Baldursdóttir talar við Helgu Barðadóttur sem er á ráðstefnunni.

Greta Thunberg, fimmtán ára stúlka frá Svíþjóð, hefur vakið heimsathygli fyrir baráttu sína fyrir umhverfismálum. Hún er barnið sem bendir keisaranum á að hann er ekki í neinum fötum. Bandaríska tímaritið Times var að setja hana á lista yfir tuttugu og fimm áhrifustu ungmenni heims, undir tuttugu ára aldri. Pálmi Jónasson segir frá.

Starfsgreinasambandið ætlar ekki að vísa kjaradeilu sinni við atvinnurekendur fyrir jól. Þetta var samþykkt á formannafundi sambandsins í dag. Formenn 7 félaga vildu vísa strax en formenn 11 félaga vildu bíða með það fram yfir áramót. Einnig var nær einhugur um að hafna alfarið hugmyndum atvinnurekenda um breytingar á vinnutíma. Á stjórnarfundi VR á miðvikudaginn voru ekki greidd atkvæði um hvort vísa ætti deilunni til sáttasemjara. Þar var ákveðið að bíða og sjá hver niðurstaða Starsgreinasambandsins yrði. Ekki náðist formann VR . Björn Snæbjörnsson, formaður Starfsgreinasambandsins segir að fundurinn í dag hafi verið hressilegur. Hann segir að staðan verði endurskoðuð eftir áramót. Arnar Páll Hauksson talar við Björn Snæbjörnsson.