Starfsgreinasambandið hótar að slíta samningaviðræðum við atvinnurekendur og hefja undirbúning verkfalla komi ekkert nýtt frá SA um helgina. Líklegt er að iðnaðarmenn slíti líka viðræðum.

Dómstólasýslan vill að lögum verði breytt til að hægt verði að fjölga dómurum við Landsrétt. Vegna dóms Mannréttindadómstólsins munu fjórir dómarar lands ekki taka þátt í dómsstörfum.

Ingimundur Sigurpálsson er hættur sem forstjóri Íslandspósts. Hann tilkynnti þetta á aðalfundi félagsins í dag.

Svissneskur ostagerðarmaður og nokkrir listaskólanemar hafa komist að því að bragðgæði osts breytast eftir því hvaða tónlist er leikin meðan hann þroskast. Hip hop þykir skila mjúku blómabragði.

Starfsgreinasambandið hótar að slíta samningaviðræðum við Samtök atvinnulífsins ef ekki koma fram nýjar hugmyndir eða tillögur frá samtökunum nú um helgina. Ef viðræðum verður slitið hefst undirbúningur verkfalla. Iðnaðarmenn munu að öllum líkindum feta í fótspor Starfsgreinasambandsins og slíta viðræðum ef ekkert nýtt kemur fá SA. Arnar Páll Hauksson talar við Björn Snæbjörnsson.

Ódæðismaðurinn í Christchurch á Nýja-Sjálandi vísaði í yfirlýsingu til atburða á Norðurlöndum, sem hefðu verið hvati hans að morðum í tveimur moskum. Yfirlýsingin þykir sækja mjög til skrifa Anders Behrings Breiviks. Anna Kristín Jónsdóttir segir frá.

Umhverfisþing Sameinuðu þjóðanna stendur nú yfir í Naíróbí í Kenýa og í inngangi Antóníos Guterres, aðalritara Sameinuðu þjóðanna að umhverfisskýrslu þeirra, sem kom út í vikunni, er ástand jarðarinnar sjúkdómsgert og talað um hvernig manngerðar umhverfisógnir sem ógna jörðinni ógna líka heilsu manna í auknum mæli. Skýrslan dregur upp dökka mynd af þeim fjölbreyttu umhverfisógnum sem steðja að jörðinni en í skýrslunni eru líka ræddar lausnir sem margar hafa jákvæð samlegðaráhrif og við kveður gamalkunnugt stef, það þurfi bara pólitískan vilja. Arnhildur Hálfdánardóttir segir frá og talar við Guðmund Inga Guðbrandsson.

Umsjón Arnar Páll Hauksson

Tæknimaður mark Eldred