Seðlabankastjóri segir að ekki þurfi að hafa áhyggjur af þróun gengis krónunnar að undanförnu heldur því, hvernig okkur tekst að fóta okkur í nýju jafnvægi í þjóðarbúinu.

Guðlaugur Þór Þórðarson utanríkisráðherra segir að stjórnvöld í Sádí Arabíu verði að sæta ábyrgð, komi í ljós að þau hafi staðið fyrir morðinu á sádí arabíska blaðamanninum Jamal Khashoggi.

Landsréttur staðfesti í dag þriggja og hálfs árs fangelsisdóm Héraðsdóms Reykjaness yfir karlmanni sem beitti fimm ára dóttur sína kynferðis- ofbeldi

Sonja Ýr Þorbergsdóttir var í dag kjörin nýr formaður BSRB. Tvö voru í famboði og hlaut hún nær öll atkvæðin.

Ríkisfáni Íslands var dreginn að húni á bandarísku herskipi sem liggur í höfn í Reykjavík. Það er bannað samkvæmt fánalögum.

Árum saman hafa fjárfestar með aðstoð banka og lögmanna mergsogið ríkissjóði Evrópulanda og svikið út andvirði þúsunda milljarða króna í endurgreiðslur í að minnsta kosti tíu löndum, mest í Þýskalandi, Belgíu og Frakklandi. Rúmlega helmingur þess hefur verið svikinn út í Þýskalandi samkvæmt fréttum sem birst hafa og eru afrakstur samstarfs rannsókna blaða- og fréttamanna á sautján evrópskum miðlum, samhæfing rannsóknarinnar var í höndum þýska miðilsins Correctiv. Anna Kristín Jónsdóttir segir frá.

Hundrað ár eru liðin frá því spænska veikin barst til Reykjavíkur með farþegaskipunum Botnía og Willemoes. Þremur vikum síðar var veikin í algleymingi í borginni. Spænska veikin er talin mannskæðasta farsótt sem nokkurn tíman hefur geisað, á hálfu ári dró faraldurinn á bilinu 50 til 100 milljónir manna til dauða. Þrátt nafngiftina rekur hún ekki uppruna sinn til Spánar. Arnhildur Hálfdánardóttir segir frá.

Umsjón Arnar Páll Hauksson

Tæknimaður Ragnar Gunnarsson