Átján manns létust í umferðinni á nýliðnu ári. Aðeins einu sinni hafa jafnmargir látist á einu ári undanfarinn áratug.

Fylgi Miðflokksins minnkar um rúm sex prósentustig samkvæmt Þjóðarpúlsi Gallups. Fylgi Framsóknarflokksins eykst um tæp fjögur prósentustig.

Enn hafa kennsl ekki verið borin á alla sem létust í lestarslysi á Stórabeltisbrú í Danmörku í morgun. Íslensk kona var farþegi í lestinni. Hana sakaði ekki.

Fljótsdalshérað þarf að endurskoða aðalskipulag áður en það gefur svör um hvort vindmyllur megi rísa á Úthéraði. Svæðið er á náttúruminjaskrá.

Ný lög um skráningu lögheimilis tóku gildi um áramót. Þau kveða á um að nú verði lögheimili skráð á einstaka íbúðir í fjölbýlishúsum en ekki bara húsnúmer eins og verið hefur.

Þegar hafa verið keyptar ferðir um Vaðlaheiðargöng fyrir um 30 milljónir og um eitt þúsund manns hafa skráð sig í greiðslukerfið. Gert er ráð fyrir að farnar verði yfir 1900 ferðir um göngin á sólarhring. Arnar Páll Hauksson talar við Himar Gunnlaugsson.

Um áramótin tóku gildi breytingar á lögum um brottnám líffæra. Í breytingunum sem samþykktar voru í fyrrasumar er gengið út frá því að eðlilegra sé að fólk vilij koma náunga sínum til hjálpar með því að gefa líffæri að sér látnu en ekki. Fólki er því ætlað samþykki fyrir því frekar en að ætla neitun. Anna Kristín Jónsdóttir talar vip Jórlaugu Heimisdóttur.

Svindl Claas Relotius blaðamanns á þýska tímaritinu Der Spiegel hefur vakið umræður um þá tísku í blaðamennsku að blaðamenn leiti að sögum. Sigrún Davíðsdóttir.

Umsjón Arnar Páll Hauksson

Tæknimaður Magnús Þorsteinn Magnússon