Yfirvöld geta ekki haldið mönnum í gæsluvarðhaldi lengur en sem nemur úrskurði um slíkt, segir lektor í réttarfari. Þau geta þó handtekið menn meðan beðið er eftir ákvörðun dómara um framlengingu gæsluvarðhalds.

Formaður félags hjúkrunarfræðinga segir að íslenska heilbrigðiskerfið leki hjúkrunarfræðingum. Ástandið á Landspítala þar sem aðgerðum hefur ítrekað verið frestað lagist ekki fyrr en laun hafa verið bætt. Tólf hjúkrunarfræðinga vantar nú á gjörgæsludeildir spítalans.

Demókrataflokkurinn bandaríski höfðaði mál í dag á hendur stjórnendum kosningabaráttu Donalds Trumps forseta, rússneskum stjórnvöldum og uppljóstrunarvefnum WikiLeaks.

Kostnaður vegna sykursýkislyfja er sá næst mesti miðað við aðra sjúkdóma. Áætlað er að allt að 30 þúsund Íslendingar séu með sykursýki. Arnar Páll talar við Rafn Benediktsson yfirlækni.

Ferðaþjónustan leggur meira til þjóðarbúsins en nokkur önnur útflutningsgrein en um leið er hún stærsti áhættuþáttur þjóðarbúsins. Sigrún Davíðsdóttir segir frá.

Barnalæknir á Bugl segir löngu kominn tíma til þess að taka út spjaldtölvuvæðinguna og spyr sig hvort hún ýti undir óhóflega skjánotkun barna. Verkefnastjóri spjaldtölvuvæðingar í Kópavogi segir að það sé of snemmt að ráðast í úttekt. Arnhildur Hálfdánardóttir ræddi við Björn Hjálmarsson, barnalækni, og Björn Gunnlaugsson, verkefnastjóra.

Umsjón Arnar Páll Hauksson.

Tæknimaður Magnús Þorsteinn Magnússon.