desember

Innri endurskoðun Reykjavíkurborgar telur að lög um opinber skjalasöfn hafi verið brotin í braggamálinu svokallaða, þar sem meðferð gagna hafi verið ófullnægjandi og nánast engin skjöl hafi fundist um það í skjalakerfi borgarinnar. Svo virðist sem flest sem gat farið úrskeiðis við braggann hafi farið úrskeiðis.

Hjartasjúklingi voru í dag dæmdar 28 milljónir króna í bætur vegna heilsutjóns af völdum bilaðs gangráðs.

Pútín Rússlandsforseti fagnar þeirri ákvörðun Bandaríkjaforseta að kalla herlið sitt heim frá Sýrlandi. Kúrdar ætla að halda áfram að berjast gegn hryðjuverkamönnum þrátt fyrir að Bandaríkjaher hverfi á brott.

Stríð filippseyskra stjórnvalda gegn fíkniefnum hefur kostað yfir fimm þúsund mannslíf að sögn yfirvalda. Mannréttindasamtök telja hins vegar að á þriðja tug þúsunda hafi fallið.

Margir Grindvíkingar fundu fyrir jarðskjálfta í dag. Skjálftinn mælist 3,2 að stærð.

Ný staða staða sem upp er komin innan Starfsgreinasambandsins var rædd á samningafundi sambandsins og SA í dag. Ákveðið var að halda næsta fund eftir áramót. Hvorki Sólveig Anna Jónsdóttir, formaður Eflingar né Vilhjálmur Birgisson, formaður Verkalýðsfélaga Akraness mættu á fundinn í dag. Þessi félög hafa sagt skilið við Starfsgreinasambandið í bili og ætla að vísa deilunni ásamt VR til sáttasemjara. Arnar Páll Hauksson talar við Björn Snæbjörnsson.

Bæði Efling og Verkalýðsfélag Akraness hafa dregið til baka samningaumboð sitt frá Starfsgreinasambandinu. Líklegt er að þessi félög vísi deilunni til sáttasemjara á morgun ásamt VR. Stjórnarfundur í VR stendur nú yfir þar sem farið er yfir stöðuna. Hugsanlega munu fleiri félög segja sig frá samflotinu með Starfsgreinasambandinu. Verkalýðsfélag Akraness afturkallaði umboð sitt til Starfsgreinasambandsins í dag. Arnar Páll Hauksson talar við Vilhjálm Birgisson formann Verkalýðsfélags Akraness.

Charles Michel, forsætisráðherra Belgíu, tilkynnti á þriðjudagskvöldið síðasta að hann ætli að fara á fund konungs og biðjast lausnar fyrir hönd ríkisstjórnar sinnar. Ingvar Þór Björnsson segir frá.

Umsjón Arnar Páll Hauksson.

Tæknimaður Markús Hjaltason.