12.11.2018

Umsjónarmaður Spegilsins er Pálmi Jónasson.

Skógareldar í Kaliforníu breiðast út á gríðarlegum hraða yfir svæði á við 80 íþróttavelli á hverri mínútu. Þessar aðstæður eru óviðráðanlegar, segir Halldór Björnsson, sérfræðingur í loftslagsmálum hjá Veðurstofu Íslands. Vegna loftslagsbreytinga megi búast við að meira verði um skógarelda á þessu svæði á næstu áratugum

Aðstoðarmönnum þingflokka á Alþingi verður fjölgað í sautján. Aukinn rekstrarkostnaður Alþingis nemur allt að 200 milljónum króna á ári.

Katrín Jakobsdóttir forsætisráðherra hefur óskað eftir greinargerð frá bankaráði Seðlabanka Íslands vegna dóms Hæstaréttar í máli Seðlabankans gegn Samherja.

Umboðsmaður Alþingis hefur komist að þeirri niðurstöðu að ákvörðun Tryggingastofnunar um örorkulífeyri þeirra sem búið hafa í öðru EES-landi eigi sér ekki stoð í lögum. Breytingar gætu varðað hundruð öryrkja.

Formaður Neytendasamtakanna fagnar hugmyndum um að þýskur netbanki hefji starfsemi hér á landi. Það auki líkur á því að kostnaður neytenda lækki.

Lengri umfjallanir:

Halldór Björnsson, sérfræðingur í loftslagsmálum hjá Veðurstofu Íslands segir að skógareldarnir í Kaliforníu hafi brennt svæði á stærð við 80 íþróttavelli á hverri mínútu þegar verst lét og þeir séu óviðráðanlegir. Vegna loftslagsbreytinga megi gera ráð fyrir að tíðni skógarelda aukist um allt að helming á þessu svæði á næstu áratugum. Bergljót Baldursdóttir talaði við hann.

Umboðsmaður Alþingis hefur komist að þeirri niðurstöðu að ákvörðun Tryggingastofnunar um örorkulífeyri þeirra sem búið hafa í öðru EES-landi eigi ekki stoð í lögum. Breytingar gætu varðað hundruð öryrkja. Kona sem metin var með fulla örorku og hafði búið í Danmörku í fimm ár átti einingus rétt á rúmlega fjórðungi af fullum bótum. Hún leitaði til Umboðsmanns Alþingis. Arnar Páll Hauksson tók saman.

Kim Jong-un, leiðtogi Norður-Kóreu, lætur líklega aldrei undan kröfum Bandaríkjastjórnar um kjarnorkuafvopnun. Þetta er skoðun Mats Fogelmarks, sem var varnarmálafulltrúi í sænska sendiráðinu í Pyoungyang og í Kína um þriggja ára skeið. Hann ræddi samband Svía við Norður-Kóreu og Kína á fundi í Norræna húsinu, sem sænska sendiráðið og Alþjóðamálastofnun Háskóla Íslands stóðu fyrir. Bogi Ágústsson tók saman.