Öryrkjabandalagið, Þroskahjálp og fleiri samtök hafa í dag fagnað samþykkt frumvarps um þjónustu við fatlað fólk með langvarandi stuðningsþarfir, sem oftast er kallað NPA frumvarp.

Borgarstjóri þakkar góða niðurstöðu ársreiknings borgarinnar ábyrgri stjórn og mikilli uppbyggingu í borginni. Oddviti sjálfstæðismanna segir hækkun skulda í góðæri rosalega.

Stjórnarandstæðingar í Armeníu segja að flauelsbylting sé hafin í landinu. Þeir krefjast þess að öll ríkisstjórn landsins fari frá völdum. Velja á nýjan forsætisráðherra í næstu viku.

Bandaríski gamanleikarinn Bill Cosby var í dag fundinn sekur um að nauðga konu í Fíladelfíu fyrir 14 árum

Á fimmta tug stórfyrirtækja á Bretlandi stefna að því að útrýma ónauðsynlegu umbúðaplasti. Íslensk stjórnvöld boða aðgerðir til að stemma stigu við plastmengun og plastnotkun í haust.

Arnar Páll Hauksson talar við Guðmund Helga Þórarinsson Nýjan formann Félags vélstjóra og málmtæknimanna sem segir að kökunni sé ekki réttlátlega skipt. Launafólk hafi setið eftir og nú sé kominn tími til að leiðrétta það. Hann er sjötti nýi verkalýðsformaðurinn sem kjörinn er á stuttum tíma.

Brexit hefur ekki verið stærsti höfuðverkur Theresu May forsætisráðherra undanfarið heldur ásakanir um óvinveitta afstöðu stjórnarinnar til breskra ríkisborgara sem eru ættaðir frá Jamaíka. En Brexit kraumar þó undir niðri. Sigrún Davíðsdóttir segir frá.

Lára Jónasdóttir, starfsmaður Sameinuðu þjóðanna, fór með Björgu Magnúsdóttur dagskrárgerðarmanni akandi yfir landamæri Ísraels og inn í Palestínu, nánar tiltekið Í flóttamannabúðir sem eru við múrinn í Bethlehem. Þrátt fyrir mikið landamæraeftirlit á staðnum lentu þær ekki í langri röð, þökk sé diplómata-númeraplötum á bíl Láru.

Umsjón: Kristján Sigurjónsson

Tæknimaður: Magnús Þorsteinn Magnússon.