Spegillinn 30.mars 2021

Umsjón: Kristján Sigurjónsson

Tæknimaður: Ragnar Gunnarsson

Framkvæmdastjóri Samtaka ferðaþjónustunnar segir forsendur fyrir því að taka upp litakóðunarkerfi á landamærunum ekki hafa breyst. Hann telur sóttvarnayfirvöld reyna að grafa undan ákvörðun ríkisstjórnarinnar.

Ríkið þarf að hlaupa undir bagga með Strandabyggð svo að það geti haldið úti rekstri og staðið við skuldbindingar sínar. Oddviti sveitarstjórnar Strandabyggðar segir það koma til vegna skerta framlaga úr Jöfnunarsjóði.

Stuðningur við ríkisstjórnina hefur sjaldan mælst meiri samkvæmt nýrri Gallupkönnun, fylgi Samfylkingarinnar minnkar en stuðningur við Miðflokkinn eykst.

Lengri umfjöllun:

Í vinsælustu fjölskylduhverfum Reykjavíkur eru mörg dæmi um að börn fái ekki pláss á leikskóla fyrr en rúmlega tveggja ára. Staðan á biðlistum eftir leikskólaplássum í borginni er slæm í ár og Ingibjörg Brynjarsdóttir leikskólastjóri í Fossvogi minnist þess ekki að hafa þurft að neita jafn gömlum börnum um pláss. Heiða Aðalsteinsdóttir, sem býr í vesturbænum sér fram á að þurfa að keyra borgina þvera og endilanga á hverjum degi til að fara með son sinn til dagmömmu. Miðað við stöðuna nú, og svörin sem hún fær, býst hún ekki við að drengurinn komist inn á leikskóla fyrr en hann verður tveggja og hálfs árs. Þórhildur Þorkelsdóttir segir frá og talar við Ingibjörgu og Brynju.

Páll Einarsson jarðeðlisfræðingur segir að eldgosið í Geldingadölum sé ákaflega lærdómsríkt til þess að skilja eðli og umfang jarðhræringanna sem hófust með jarðskjálftunum í desember 2019. Þeirri atburðarrás sé alls ekki lokið. Við undirleik fuglasöngs, sírenuvæls og flugvélagnýs settist Spegillinn í dag niður með Páli í veðurblíðunni í Vatnsmýrinni í Reykjavík og ræddi við hann um jarðeldana og jarðhræringarnar á Reykjanesskaga á ellefta degi goss. Kristján Sigurjónsson ræðir við Pál.

Undanfarinn áratug eða svo hafa alþjóðastofnanir og samtök beint sjónum sínum að spillingu tengdri sjávarútvegi. Skýrslur og umfjöllun þeirra um þessi efni gefur Samherjamálinu samhengi. Tölurnar, sem oftast er vitnað í um nýtingu, öllu heldur ofnýtingu, komu fram 2018 í skýrslu FAO, Sjávarútvegs- og landbúnaðarstofnunar Sameinuðu þjóðanna. Samkvæmt skýrslunni var staðan sú 2015 að tæplega 60 prósent nytjastofna voru veiddir í topp og 33 prósent ofveiddir. Sigrún Davíðsdóttir segir frá.