Formaður stjórnskipunar- og eftirlitsnefndar segir gögn Landsréttarmálsins styðja niðurstöðu Hæstaréttar um lögbrot ráðherra við dómaraskipan. Dómsmálaráðherra segir að hún þekki það þegar hún sjái það hvenær hún þurfi að víkja úr embætti.

Framkvæmdastjóri hjá Odda segir að erlend samkeppni hafi gert það að verkum að fyrirtækið þurfti að segja næstum helmingi starfsmanna sinna upp í gær.

Stjórnarformaður Persónuverndar segir að það þurfi allt að því að fjórfalda starfsmannafjöldann hjá stofnuninni til að hún geti sinnt verkefnum vegna nýrra persónuverndarlaga sem eiga að taka gildi eftir fjóra mánuði.

Fiskeldisfrumvarpi sem nú er í umsagnarferli er ætlað að bæta umgjörð og skapa sátt um greinina. Kapphlaup um eldissvæði á að heyra sögunni til og útboðsferli kemur í staðinn. Breytingin mun þó ekki hafa áhrif á margar umsóknir á Vestfjörðum og Austfjörðum sem þegar liggja fyrir.

Ákvörðun um að nota tákn fyrir guðinn Tý á peysur norska landsliðsins í alpagreinum, hefur vakið upp deilur því nasistar og öfgahreyfingar hafa reynt að gera það að sínu tákni.

Þarf að fjórfalda starfsmannafjölda Persónuverndar. Arnar Páll Hauksson fjallar um nýja persónuverndarlöggjöf og talar við Björgu Thorarensen, Davíð Þorláksson og Sölku Sól Styrmisdóttur.

Merkur mannfræðifundur í Ísrael. Kristján Sigurjónsson segir frá.

Utanríkisverslun Íslendinga frá 900 til 2010. Bogi Ágústsson talar við Guðmund Jónsson sagnfræðing.

Umsjón: Arnar Páll Hauksson

Tæknimaður: Magnús þorsteinn Magnússon