Stjórnvöld stefna að því að lækka tekjuskatt í neðra þrepi um eitt prósentustig. Fjármálaráðherra segir að þetta geti skilað skattgreiðendum fjórtán milljörðum á ári.

Þingflokksformenn allra flokka hafa setið á fundi síðdegis til að freista þess að ná samkomulagi um afgreiðslu mála. Veiðigjaldafrumvarpið var sett á bið í dag á meðan formenn ráða ráðum sínum.

Starfshópur um peningastefnu Íslands leggur til að fjármálastöðugleiki hafi forgang á verðstöðugleika, ef þær aðstæður koma upp að ógn skapist gagnvart hinum fyrrnefnda. Hópurinn hefur lagt fram ellefu tillögur til að endurbæta peningastefnu landsins.

Bandaríski kvikmyndaframleiðandinn Harvey Weinstein lýsti í dag yfir sakleysi sínu, þegar ákæra gegn honum um nauðgun og kynferðisofbeldi var tekin fyrir dómsal í New York.

Tvítugur maður var úrskurðaður í eins mánaðar gæsluvarðhald í dag fyrir að ræna mann og berja með hjóli í Teigahverfi í Reykjavík um miðjan dag í gær.

Lungu eru nýjasta útflutningsvaran í hrossaafurðum til Japans. Þau eru notuð í alls kyns súpur, sem bragðast betur en verkefnisstjóri við útflutninginn hafði búist við.

Sjálfstæðisflokkur og Framsókn ætla að hefja formlegar viðræður um myndun meirihluta í bæjarstjórn Kópavogs.

Formaður VR vill mynda bandalag með öðrum félögum og boðar herskáa kjarabaráttu þegar gerð kjarasamninga hefst í haust. Eins og staðan er innan verkalýðshreyfingarinnar hugnast honum ekki að félagið setjist að sameininlegu samningaborði ASÍ.

Framtíð íslenskrar peningastefnu - Björn Friðrik. Viðmælendur: Katrín Jakobsdóttir forsætisráðherra og Ásgeir Jónsson hagfræðingur.

Undirbúa kröfur - Arnar Páll. Viðmælendur: Kristján Þórður Snæbjörnsson formaður Rafiðnaðarsambandsins og Ragnar Ingólfsson formaður VR

Blágrænar regnvatnslausnir - Arnhildur. Viðmælandi: Íris Þórarinsdóttir, tæknistjóri Fráveitu hjá Veitum