Spegillinn 5.12.2018

Formaður stjórnskipunar- og eftirlitsnefndar Alþingis telur eðlilegt að nefndin skoði sérstaklega ummæli Gunnars Braga Sveinssonar um meintan sendiherrakapal vegna misvísandi yfirlýsinga þeirra sem koma að málinu. Höskuldur Kári Schram ræddi við Helgu Völu Helgadóttur og Guðlaug Þór Þórðarson.

Varaformaður Viðreisnar skorar á alla karla á Alþingi að stöðva og hafna þeirri orðræðu sem sexmenningarnir viðhöfðu á Klaustri. Slík kvenfyrirlitning megi ekki líðast innan veggja Alþingis. Jóhanna vigdís Hjaltadóttir tók saman frá Alþingi ummæli Þorsteins Víglundssonar.

Hart var sótt að Theresu May, forsætisráðherra Bretlands í umræðum um Brexit á breska þinginu í dag. Stjórn hennar neyddist í dag til að birta lögfræðiálit um samninginn, eftir ávítur þingheims í gær.

Tekið er á kröfum um lagfæringu á stofnæðum á höfuðborgarsvæðinu og hugmyndum um veggjöld í endurskoðaðri samgönguáætlun sem kynnt verður á næstu dögum. Kristín Sigurðardóttir ræddi við Sigurð Inga Jóhannsson.

Forsvarsmenn Isavia vilja svör við því hvað tillögur starfshóps um innanlandsflug, sem settar voru fram í skýrslu samgönguráðherra, þýða fyrir Keflavíkurflugvöll. Jón Þór Kristjánsson talaði við Guðjón Helgason.

Fáir kostir virðast til stjórnarmyndunar í Svíþjóð tæpum þremur mánuðum eftir að nýtt þing var kjörið. Fréttaskýrendur segja margir að kostirnir séu minnihlutastjórn Jafnaðarmanna undir stjórn Stefans Löfvens eða nýjar kosningar. Bogi Ágústsson tók saman

Við höldum okkur í Svíþjóð því liðið sumar var eitt það þurrasta sem vitað er um í Svíþjóð. Uppskera á kornmeti hefur ekki verið minni í nær sextíu ár og þeir sem halda búpeninga kvíða margir vetrinum enda fóður lítil og brunnar víða þurrir. Kári Gylfason í Gautaborg sagði frá.

Emmanuel Macron Frakklandsforseti ætlar að skila afrískum menningarminjum sem eru á frönskum söfnum. Vaxandi skilningur virðist á því að þjóðir eigi rétt á menningararfleifð sinni. Sigrún Davíðsdóttir tók saman