Spegillinn 7. apríl 2022

Umsjón: Kristján Sigurjónsson

Tæknimaður: Mark Eldred

Rússland var í dag rekið úr mannréttindaráði Sameinuðu þjóðanna vegna innrásarinnar í Úkraínu. Slíkt hefur gerst aðeins einu sinni áður.

Fjármálaráðherra hefur óskað eftir því að ríkisendurskoðandi skoði og geri úttekt á ferlinu við sölu á hlut ríkisins í Íslandsbanka.

Þrjú félög sem tengjast málum sem héraðssaksóknari rannsakar eru meðal þeirra sem keyptu hlutabréf með afslætti í lokuðu útboði á tuttugu og tveggja og hálfs prósents hlut í Íslandsbanka.

Vigdís Häsler, framkvæmdastjóri Bændasamtakanna, og Sigurður Ingi Jóhannsson, formaður Framsóknarflokksins, ætla að hittast á fundi í fyrramálið, en Sigurður Ingi baðst á dögunum afsökunar á orðum sem hann viðhafði um Vigdísi.

Skæð fuglaflensa hefur fundist í haferni hjér á landi og er það í fyrsta sinn sem slík veira finnst hér.

Tíu lögreglumenn og sérfræðingar á vegum héaðssaksóknara eru við skýrslutökur og húsleit vegna Innheimtustofnunar sveitarfélaga á Ísafirði.

Fjórir hafa verið sakfelldir fyrir hrottalega frelsissviptingu á manni á Akureyri í september 2017. Héraðsdómur Norðurlands eystra dæmdi í málinu í gær.

Ísland lagði Hvíta-Rússlandi í undankeppni HM kvenna í fótbolta í dag 5-0.

Lengri umfjöllun:

Salan á Íslandsbanka hefur vakið nokkuð hörð viðbrögð, bæði úti í samfélaginu, á Alþingi og víðar. Listi yfir þá sem keyptu hlut í bankanum var gerður opinber í gær, þrátt fyrir að Bankasýsla ríkisins, sem annaðist söluna, hafi talið að slíkan lista mætti ekki birta. Bjarni Rúnarsson ræddi við Lárus Blöndal stjórnarformann bankasýslunnar í dag.

Enn einu sinni standa öll spjót á heilbrigðisyfirvöldum og yfirstjórn Landsspítalns að leysa vanda bráðmóttöku spítalans. Hjúkrunarfræðingar á móttökunni krefjast þess að stjórnvöld og Landspítali staðfesti skriflega að ábyrgðin liggi þar en ekki hjá hjúkrunarfræðingum, komi upp alvarleg atvik sem rekja megi beint eða óbeint til álags á Bráðamótttökunni. Ástandið á Bráðamóttökunni sé það versta sem komið hefur upp í rúman áratug. Ólöf Rún Skúladóttir fréttamaður ræddi í dag við Runólf Pálsson forstjóra Landspítlans um kröfur hjúkrunarfræðinga. Runólfur tók við forstjórastarfinu fyrir rúmum mánuði.