Atkvæðagreiðslu á Alþingi um frumvarp um þungunarrof var í dag frestað fram yfir helgi. Lagt hefur verið til að breyta fjórðu grein þess og leyfa þungunarrof til loka 20 viku en ekki 22. Jóhanna Vigdís Hjaltadóttir ræddi við Pál Magnússon, (D) formann allsherjar og menntamálanefndar. Brot úr ræðum Óla Björns Kárasonar (D) og Bjarkeyjar Olsen Gunnarsdóttur (V).

Yfir 150 þúsund Sýrlendingar hafa flúið heimili sín í norðvesturhluta Sýrlands síðustu daga vegna árása Rússa og sýrlenska stjórnarhersins. Hundruð hafa fallið eða særst. Ásgeir Tómasson sagði frá.

Dæmi eru um að smálánaskuldarar hafi verið teknir af vanskilaskrá vegna þess að þeir mótmæltu því að krafan væri lögmæt, segir förstöðumaður lögfræðisviðs Creditinfo. Kristín Sigurðardóttir talaði við Sigríði Laufeyju Jónsdóttur, forstöðumann þjónustu- og lögfræðisviðs Creditinfo.

Malbikunarframkvæmdir sumarsins hófust í Reykjavík í dag. Valgeir Örn Ragnarsson fréttamaður hitti Ólaf Sigurmundsson yfirverkstjóra hja Malbikunarstöðinni Höfða í Bláskógum í dag.

Ein óyggjandi vísbending þess að sumarið er komið er áberandi söngur svartþrastar í mörgum húsagörðum landsins. Í garði í Reykjavík náðist á upptöku þegar svartþröstur hóf að syngja með partítónlist úr næsta húsi.

--------

Jón Kristinsson, umhverfisarkitekt og frumkvöðull á sviði sjálfbærrar byggingarlistar, leggur til að Markarfljóti verði veitt inn í Landeyjahöfn til að gera hana sjálfhreinsandi. Unnið er að endurbótum á höfninni sem eiga að gera það kleift að dæla sandi úr henni úr landi. Fjallað verður um lausn á vanda Landeyjahafnar síðar í Speglinum.

Málefni hafsins, loftslagsmál, grænar orkulausnir og fólkið og samfélög á norðurslóðum verða meginviðfangsefni Norðurskautsráðsins undir formennsku Íslands næstu tvö árin. Guðlaugur Þór Þórðarson utanríkisráðherra lagði sérstaka áherslu á sjálfbærni í Rovaniemi morgun þegar Ísland tók við formennskunni. Í fyrsta skipti í nærri aldarfjórðungs sögu ráðsins var ekki sameiginleg yfirlýsing eftir fund þess. Timo Soini utanríkisráðherra Finnlands, fráfarandi formaður vildi ekki álasa neinum fyrir það en í eigin yfirlýsingu væri rætt um loftslagsbreytingar. Mike Pompeo sagði að Trump stjórninni væri annt um vernd náttúrunnar en traust yrði að ríkja milli þjóða.

Fyrir tíu árum markaði skýrsla og tillögur Thorvalds Stoltenbergs, fyrrverandi utanríkisráðherra Noregs, um norræna samvinnu tímamót. Utanríkismálastofnanir Norðurlandanna kynntu fyrir helgi úttekt á Stoltenberg-skýrslunni og þýðingu hennar.