Hæstiréttur staðfesti í dag dóm Héraðsdóms Reykjavíkur um að Seðlabankanum hefði ekki verið heimilt að leggja stjórnvaldssekt á Samherja. Samherjamenn segja að með dóminum ljúki endanlega 7 ára aðför bankans að fyrirtækinu.

Utanríkisráðherra segir að allra leiða hafi verið leitað, í samráði við tyrknesk stjórnvöld, til að komast að afdrifum Hauks Hilmarssonar sem hvarf í Sýrlandi.

Sífellt fleiri börn stunda launaða vinnu. Þetta kemur fram í úttekt Hagstofunnar. Hátt í sjötíu prósent sautján ára barna eru á vinnumarkaði.

Enn er sýking í stofni íslensku sumargotssíldarinnar. Mestöll síldin á nýhafinni vertíð hefur því farið í bræðslu.

Formaður Landssambands eldri borgara segir það falda staðreynd að hópur aldraðra eigi í miklu basli fjárhagslega. Um 2500 ellilífeyrisþegar eru að sligast undan hárri húsaleigu og vegna búsetuskerðingar fær um 100 manna hópur aðeins 37 þúsund krónur frá Tryggingarstofnun. Í þeim hópi eru útlendingar fjölmennir. Arnar Páll Hauksson talar við Þórunni Sveinbjörnsdóttur.

Ráðgert er að þúsundir íbúða af ýmsum stærðum og gerðum rísi í sveitarfélögunum umhverfis höfuðborgarsvæðið á næstu árum. Forsvarsmenn Árborgar, Voga, Akraness, Grindavíkur, Ölfuss og Reykjanesbæjar eru tilbúnir að skoða finnsku leiðina með félagsmálaráðherra. Svæðisskipulagsstjóri samtaka sveitarfélaga á höfuðborgarsvæðinu varar við mikilli uppbyggingu, markaðurinn geti snöggkólnað. Arnhildur Hálfdánardóttir segir frá og talar við Hrafnkel Proppé.