Spegillinn 9. Október 2020

Umsjón: Kristján Sigurjónsson

Tæknimaður: Ragnar Gunnarsson

Ríkissjóður greiðir allt að 120 milljónum króna í lokunarstyrki til fyrirtækja sem þurfa að loka vegna sóttvarnaaðgerða. Von er á styrkjunum á allra næstu dögum, segir forsætisráðherra.

Frumvarp umhverfisráðherra um hálendisþjóðgarð verður sent stjórnarflokkunum til afgreiðslu. Þetta var ákveðið á fundi ríkisstjórnarinnar í dag.

Viðræður eru hafnar í Moskvu um vopnahlé í Nagorno-Karabakh. Aserar gefa Armenum eitt tækifæri til viðbótar til að leysa deilurnar friðsamlega.

Sanngirnisbætur verða greiddar til barna með fötlun sem dvöldu á litlum vistheimilum og voru beitt misrétti. Ríkisstjórnarfrumvarp þess efnis verður lagt fyrir Alþingi síðar í mánuðinum.

Svo gæti farið að fjölga þurfi plássum í farsóttarhúsinu í Reykjavík á næstunni. Nú eru 56 í einangrun í farsóttarhúsinu og 32 í sóttkví.

Þetta kemur fram í stöðuskýrslu frá almannavarnadeild Ríkislögreglustjóra í dag.

Börn sem mættu meira í leikskólann í fyrstu bylgju COVID höfðu minni áhyggjur af ástandinu en þau börn sem voru aðallega heima. Þetta kemur fram í óformlegri könnun sem Jóhann Friðjónsson, leikskólakennari gerði meðal elstu barna leikskólans Lundarsels á Akureyri.

Lengri umfjallanir:

Matvælastofnun Sameinuðu þjóðanna fær friðarverðlaun Nóbels í ár. Þetta eru ein virtustu verðlaun sem veitt eru hvert ár í heiminum og val á verðlaunahafa hefur oft vakið deilur. Svo er ekki nú en hins vegar nefndi stofnandinn, Alfreð Nobel, aldrei mat í stofnskrá sinni. Gísli Kristjánssonsegir frá.

Skólabörn á Íslandi hafa ekki farið varhluta af áhrifum COVID-19 farsóttarinnar frekar en aðrir. Síðustu daga hefur hún gert enn óþyrmilega vart við sig, hundruð nemanda hafa þurft að fara í sýnatökur og sóttkví og skólastarfið allt úr skorðum. Hrefna Sigurjónsdóttir, framkvæmdastjóri Heimilis og skóla, segir margt leggjast á börn og foreldra þessa dagana, samt sé ekki útilokað að eitthvað jákvætt komi út úr þessari þolraun. Anna Kristín Jónsdóttir talar við Hrefnu.

Það er erfitt fyrir ríkisstjórnir, líkt og aðra, að skipuleggja nokkurn skapaðan hlut á Covid-19 tímum. Í Bretlandi hefur þetta verið ljóst frá því í byrjun mars, þegar fjármálaráðherra tilkynnti um veiruaðgerðir upp á 350 milljarða punda, sex dögum eftir að hann ætlaði 12 milljarða í aðgerðirnar. Nú kalla ólíkar aðstæður í einstökum landshlutum á ólíkar efnahagsaðgerðir. En veirufaraldurinn afhjúpar einnig enn frekar tekju- og aðstöðumun í norður- og suðurhluta Bretlands, sem núverandi stjórn hafði sett sér að m