Suid-Afrikaanse Roofdier Vereening het by monde van sy voorsitter, Carla van der Vyfer bevestig dat hy more by die soektog na leeus in Fochville gaan aansluit. Die leeus is nie deur enige iemand as vermis aangemeld nie, maar is op vrye voet op kamera vasgevang.

Die sakesektor moet verseker dat daar ekonomiese groei in die land is en Suid-Afrikaners moet aanhou om hulle belasting te betaal. Dit is die boodskap van die finansiesminister, Malusi Gigaba tydens die opening van die 2017 Belasting Indaba wat tans in Sandton gehou word. Gigaba sê fiskale en monetere beleid moet verbruikers aanmoedig om te bestee. Die ekonoom Ulrich Joubert sê verbruikers vertrou tans nie die situasie nie en bestee dus glad nie. Hy het met Suzanne Paxton gepraat.

Die voorsitter van die Wildtelers Verening van Suid Afrika, Wian Van der Linde sê die vrae rondom die oorsprong van die leeus behoort rooiligte vir die departement van omgewinsake te laat flikker. 'n Soektog is aan die gang na leeus wat in die Fochville-gebied op vrye voet gewaar is. Suzanne Paxton berig.

Beeldmateriaal wat wys hoe 'n onderwyser by die Umdlamfe Sekondêreskool in Richardsbaai in KwaZulu-Natal, twee graad nege leerlinge aanrand, word tans ondersoek. In die video kan gesien word hoe die onderwyser twee meisies met 'n rottang, ten aanskoue van hul klasmaats, slaan. Joan-Marie Verhoef berig.

Kaapstad Metro sê hy gaan strenger optree teen inwoners wat nie gehoor gee aan vlak 5 waterbeperkings nie. Die Metro sukkel om sy gesamentlike waterverbruik-mikpunt van 500 miljoen liter water per dag te bereik. Intussen beplan die Wes-Kaapse regering om strenger waterbeperkings vir munisipaliteite in die provinsie in te stel. Jean Esterhuizen berig.

Berigte dat Nkosazana Dlamini-Zuma weer 'n parlementslid gaan word, het bespiegelings laat ontstaan oor 'n grootskaalse kabinetskommeling. Spektrum het aan die politieke ontleder Coenraad Bezuidenhout gevra om die moontlikheid te ontleed.

Sestien jaar gelede is die wêreld tot stilstand geruk toe vliegtuie in die Amerikaanse Wêreld Handelsentrum vasgevlieg het. Byna drie duiend mense het in die voorval omgekom, minstens ses duisend mense is beseer en skade het sowat tien miljard Amerikaanse Dollar beloop. Intussen meen Jasmine Opperman, die Afrika direkteur van die Terreur Navorsings- en Ontledingskonsortium, Amerika het nie geleer uit die gevolge van die ramp nie. Sy het met Marlinee Fouche gepraat.

Die sogenaamde Aarto-wet is vandeesweek deur die nasionale vergadering goedgekeur. Ingevolge die wet sal verkeersoortreders punte teen hulle lisensies kry. En indien daar genoeg punte teen jou naam is, kan jou rybewys opgeskort word. Die besturende direkteur van driving.co.za, Rob Handfield-Jones sê die vraag bly: Sal dit help on padveiligheid in Suid-Afrika te verbeter?

Die Noord-Kaap en die Wes-Kaap is die twee provinsies met die meeste voorvalle van Fetale Alkohol Sindroom. Maar die omvang van die probleem in Suid-Afrika as 'n geheel, is ongeken. So sê die uitvoerende hoof van die Stigting vir Alkoholverwante Navorsing, Leana Olivier. Joan-Marie Verhoef het met die oog op Internasionale Fetale Alkohol Sindroom Dag gaan uitvind wat die stigting op fokus.

Politieke moorde is weer onder die soeklig na die dood van twee ANC-lede. Mandisi Xakaxa, 'n takleier in Port Elizabeth, is Woensdagaand in die oprit van sy huis doodgeskiet. Volgens inligting hou sy dood verband met die toekenning van tenders. In 'n ander voorval is Sindiso Magaqa, 'n wyksraadslid van Umzimkulu, Maandag dood aan beserings wat hy opgedoen het in Julie toe hy in lokval gelei en geskiet is. Intussen het die ANC twee lyfwagte van 'n amptenaar in KwaZulu-Natal afgedank na die twee 'n video gemaak het waarin hulle gedreig het om iemand soos 'n hond dood te skiet. Die DA het na aanleiding hiervan gevra dat Sihle Zikalala, ANC-voorsitter in KwaZulu-Natal, moet aandui of hy voor die Moerane-kommissie gaan verskyn wat ondersoek instel na politieke moorde in KwaZulu-Natal. Ons praat nou oor die verskynsel met die politieke ontleder, doktor Piet Croucamp, aan Noordwes-Universiteit se Mahikeng-kampus.