Die ouditeursfirma KPMG het nog 'n terugslag gekry. Die Instituut vir Direkteure het aangekondig dat hulle alle samewerking met die firma verbreek. Dit volg na verdoemende getuienis in die Gupta-eposse in Junie dat die firma betrokke was by die gebruik van staatsgeld om die Gupta-troue in 2013 by Sun City te betaal. Boonop was die firma glo ook betrokke by die sogenaamde klandestiene ondersoekeenheid van die Suid-Afrikaanse Inkomstediens waarby voormalige finansminister Pravin Gordhan ook geimpliseer word. Dit het daartoe gelei dat die uitvoerende hoof van Sygnia, Magda Wiercyzka, die firma die trekpas as ouditeure gegee het. Dit het tot 'n heftige gesprek oor korrupsie in Suid-Afrika gelei en ons het aan Wiercyzka gevra wat haar siening is oor korrupsie.

Die Organisasie vir Godsdienstige-Onderrig en Demokrasie teiken hoofsaaklik Christen-skole deur dreigende briewe aan hulle te rig. So sê die VF Plus se woordvoerder vir Basiese Onderwys, Anton Alberts. Hy sê verder dat skole nie deur die organisasie geintimideer moet word nie en dat godsdiens steeds in skole beoeffen mag word, mits dit niemand uitsluit of dwing om deel te neem nie. Joan-Marie Verhoef berig.

Guernsey se finansiële dienstekommissie het 'n 30 maande lange ondersoek teen die sakeman Cobus Kellerman en sy vennoot David Cosgrove gestaak. Die kommissie gaan ook nie teen hulle optree nie. Dit volg na die twee se sakebedrywighede deur die Amerikaanse blog Offshore Alert in 2015 as 'n ponzi-skema beskryf is. Alec Hogg van Biznews het die storie in Suid-Afrika gebreek. Spektrum het aan Kellerman gevra hoe hy oor die besluit van die kommissie voel.

'n Kaapse fondsbestuurder is uitgewys as die beweerde baasbrein van 'n reuse internasionale sogenaamde Ponzi-skema wat miljarde rand beloop. Cobus Kellerman is die uitvoerende hoof van Clarus Capital. Dit gons in finansiële kringe na 'n Amerikaanse maatskappy, Offshore Alert, 'n waarskuwing uitgestuur het oor wat na bewering dalk een van die grootste Ponzi-skemas nog is. So het Monitor en Spektrum, soos talle ander media-instellings in Maart 2015 berig oor Cobus Kellerman en sy vennoot David Cosgrove se sakebedrywighede. Ons het destyds met die joernalis en uitvoerende hoof van Biznews, Alec Hogg hieroor gepraat. Hogg het die storie gebreek. Intussen blyk dit dat die grootste Ponzi-skema dalk glad nie een was nie. Ons praat nou hieroor met die redakteur van Moneyweb, Ryk van Niekerk. Hogg het 'n uitnodiging om aan die gesprek deel te neem van die hand gewys.

Daar is al hoe meer druk op die politieke leier, Aung San Sui Kyi om die diskriminasie, en gepaardgaande geweld, teen die Rohingya Moslems minderheidsgroep in Mianmar te veroordeel. Minstens 30 duisend mense het al 'n internasionale petisie onderteken, dat Aung San Sui Kyi haar Nobelprys vir Vrede moet teruggee. Melissa Tighy het met Roelf Meyer van die In Transformation Initiative oor die saak gepraat. Die In Transformation Initiative help lande met konflikoplossing. Intussen het sy gesê dat haar regering almal in die Rakhine staat beskerm. Suu Kyi sê verder dat daar daar selektiewe inligting is wat versprei word, wat net seker belange uitlig.

Vandag is Internasionale Rugstringbesering Dag - en die tema vanjaar is "YES WE CAN". Raven Benny van die QuadPara Vereniging van Suid-Afrika sê die belangrikste raad wat hy het aan ander het, is om iemand met so 'n besering nie anders te behandel as die res van die samelewing nie.

Bitcoin en ander krypto-geldeenhede se waarde het dramaties gedaal sedert die afgelope Vrydag. Twee ekonome is dit eens dat dit 'n wisselvallige belegging is - veral na die 21-komma-8 persent waardeverlies.

Die Britse Vereniging vir Skakelwese en Kommunikasie, die PRCA, se skorsing van die Britse skakelmaatskappy, Bell Pottinger is die eerste van sy soort in die Vereniging se geskiedenis. Bell Pottinger se lidmaatskap is vir vyf jaar opgehef. Die hoof van etieke prosesse by die PRCA, Nichloas Dunn-McAfee sê Bell Pottinger se optrede kan beteken dat maatskappy sy deure sluit.

Die Tesourie word dalk gekaap deur diegene wat die Gupta's goedgesind is. Dit is die vrees wat die hoof ekonoom van Economist punt co punt za, Mike Schussler uitgespreek het kort na die aankondiging dat daar groot persooneel skommelinge in die tesourie plaasgevind het. Die minister van finansies, Malusi Gigaba het Schalk Human die trekpas gegee, Vrydag. Human was die hoof aankope- beampte, wat ook glo betrokke was by die ondersoek teen Tigeta en Eskom se steenkool kontrakte. Schussler sê die minister se optrede is verdag en dit gaan die markte onseker stem.

Boerbok-boerdery in Suid-Afrika is besig om te groei en 'n kenner skryf dit toe aan die gesondheidsvoordele wat die diere se vleis inhou. Die voorsitter van die Bosveldboerbok-klub, Joubert Fourie sê die vleis is nog laer in vet as volstruisvleis. Fourie het by die jaarliks Pretoria Boerbokskou gesê dat die aanvraag na die vleis van boerbokke van so aard is dat hulle dit in slaghuise kan begin bemark. Hy sê egter dat daar nog nie genoeg bokke is om aan die vraag te voorsien nie