Vier jaar na die popkoning Michael Jackson se dood op 25 Junie 2009 , gaan sy oudste seun getuig oor wat daardie nag gebeur het. Prince Jackson nou sestien was 12 jaar oud in 2009 en het die ambulans gevolg wat sy pa na die hospitaal geneem het. Die familie het 'n eis ingestel teen die AEG LIVE, die promoters van sy laaste konsert toer. Die familie voer aan dat die maatskappy verantwoordelik is vir die aanstelling van dr. Conrad Murray wat vroeër aan manslag skuldig bevind is.

Die Minister van Omgewingsake, Edna Molewa, en die Mosambiekse Minister van Toerisme, Carvalho Muaria, het Vrydag hulle kommer uitgespreek oor renosterstropery in die Limpopo-oorgrenspark. Tydens die samesprekings is daar besluit dat 'n ooreenkoms deur die twee lande onderteken moet word. Suid-Afrika het ook die Mosambiekse regering gevra om die verskuiwing van gemeenskappe uit die park te versnel. Die uitvoerende hoof van die Vredesparkstigting, Werner Meyburg, sê hierdie vergadering was baie belangrik in die behoud en voortbestaan van die Vredespark soos aanvanklik beplan toe hy sy deure in 2001 oopgemaak het.

Die ANC loop deur onder kritiek oor nuwe wysigings aan die Wet op Arbeidsverhoudinge. Die wysigings dien tans voor die parlement se portefeuljekomitee vir arbeid. Een van die punte onder bespreking is die posisie van arbeidsmakelaars. Prof. Andries Bezuidenhout van die Departement Dosiologie aan die Universiteit van Pretoria verduidelik waaroor die kwessie gaan.

Wenkbroue word gelig oor 'n verslag wat bekendgestel is oor die ekonomiese impak wat 'n verbod op advertensies van alkoholprodukte sal hê. Nie net sal Suid-Afrika se ekononomie 'n knou kry en werksverliese tot gevolg hê nie, maar die SAUK sal ook benadeel word aldus die ekonomiese navorsingsmaatskappy, Econometrix. Hulle het die verslag saamgestel nadat hulle na navorsing in die buiteland gekyk het en 'n soorgelyke studie op eie bodem gedoen het.

President Jacob Zuma sê die regering staan neutraal in arbeidsgeskille, maar sal nie toelaat dat dit die land destabiliseer nie. Zuma het by 'n buitengewone mediakonferensie gesê stabiliteit in spesifiek die mynbousektor moet dringend herstel word.

Die Universiteit Johannesburg stel ondersoek in na bewerings in verband met wydverspreide plagiaat in doktorale verhandelings van die fakulteit wysbegeerte. Volgens 'n interne brief van die waarnemende vise-kanselier, prof. Angina Parekh, is daar bewerings dat verhandelings deur die senaat se komitee vir hoër grade goedgekeur word ten spyte van groot gedeeltes plagiaat daarin.

Die twee Suid-Afrikaners wat in Jemen ontvoer is, woon glo al vier jaar in daardie land. Die egpaar se identiteit is aan Spektrum bekend, maar word weerhou op versoek van die polisie. Onderhandelings vir hulle vrylating is steeds aan die gang.

Die kabinet het `n beroep op gemeenskappe gedoen om te waak teen `n herlewing van zenofobiese aanvalle op buitelandse burgers. Dit volg op die geweld en plundering van winkels vandeesweek in Diepsloot, Johannesburg. Die geweld het opgevlam nadat `n Somaliër na bewering twee Zimbabwiese burgers doodgeskiet het. Samesprekings om oplossings vir die geweld te soek, word vandag in Diepsloot gehou.

Die Vryheidsfront Plus waarsku dat 'n behoorlike oudit van die land se vervoerbehoeftes gedoen moet word vóór duur vervoerprojekte aangepak word. Advokaat Anton Alberts, die party se parlementêre woordvoerder oor vervoer, sê projekte soos Gauteng se e-tol stelsel dwing al hoe meer mense tot openbare vervoer, wat in elk geval gebrekkig is.

'n Jong polisievrou van Mpumalanga is in haar noppies nadat 'n innoverende ortopediese sjirurg, dr. Franz Birkholz, daarin geslaag het om haar been te red. Ná 'n motorongeluk in 2007, is Anschua Botha se linkerbeen so erg beseer dat menige dokter dit wou afsit. Die been wat meer as twee sentimeter korter is as haar regterbeen, word nou geleidelik gerek met behulp van 'n eksterne magneet. Die proses is minder pynlik as die konvensionele meganiese metode waartydens 'n staalraam beenstut gebruik word. Botha vertel hoe die proses haar nuwe hoop gegee het.