Summarmorgun

Føroyska U20 landsliðið í manshondbólti er júst komið aftur til Føroya, eftir at hava luttikið í einari sonevndari B EM kapping í Makedonia. Hetta er ein kapping fyri smærri hondbóltstjóðir, ið ikki hava megnað at spælt seg til sjálvt EM endaspælið.

Í kappingini endaði føroyska liðið á einum fjórðaplássi, men ein av leikarunum kom heim við einum fyrstaplássi, so at siga, tí málverjin Hørður Trygvason varð kosin at vera besti málverji í kappingini.

Summarmorgun hevði eitt prát við Hørð.

- Eg haldi ikki, at Skálatrøð er sjarmerandi ella gott fyri nakran annan enn fyrireikararnar á Ólavsøku. Foreldur sita bara og trippa og telja minuttirnar til tey sleppa úr hasum óbarnavinarliga økinum við høgum prísum, longum bíðirøðum og skramblivinningum...

Millum annað soleiðis skrivar Mena Joensen á sínum facebookvanga dagin eftir ólavsøku, og eftir viðmerkingunum at døma, so var hon ikki einsamøll um at hava hesa áskoðan.

Tað er nú tú skalt tekna teg, ætlar tú tær at svimja til Nólsoyar leygardagin á Ovastevnu.

Tað segði fyriskiparin Erland Simonsen fyri Summarmorgni, beint áðrenn hann leyp á bláman saman við øðrum havsvimjarum, tí sjálvt um tað ber til at klára teinin uttan at vera svimjari, so er tað ein fyrimunur at hava roynt havsvimjing áður.

Fyri tveimum árum síðani fekk ein ær hjá Olafi Davidsen, bónda, í Æðuvík, eitt blint lamb. Hóast mamman stoytti tað frá sær, hevur tað við hjálp frá húsfólkunum, klárað seg væl.

Dóttir Olaf, Harriet Olafsdóttir av Gørðum, greiddi í útvarpinum í morgun frá, at ærin í dag klárar seg væl, og við hjálp frá lambi sínum ferðast úti uttan stórvegis trupuleikar.

H. N. Jacobsens bókhandil, sum hann kallast, helt í nógv ár til í Gongini við Kongabrúnna.

Tey hølini vórðu við árunum vorðin tronglig, og tá gamli Realskúlin var lýstur til sølu, varð avgjørt at keypa og flyta niðan á Vaglið.

Í fjør fekk navnanevdin 123 umsóknir frá foreldrum, ið fegin vildu doypa barnið annað navn enn tað, sum stendur á navnalistanum. Tær flestu umsóknirnar vóru um ættaruppkalling, meðan tað eisini vóru umsóknir um nýggj nøvn, ið ikki eru nýtt í Føroyum áður. 

Navnarákið broytist, men tað eru summi nøvn, ið ganga aftur og blíva við at vera væl umtókt. 

Hoyr Anfinn Johansen, lektara í málfrøði, greiða frá um fólkanøvn.

Í dag er loyvi at eita trý fornøvn.

Í mong ár hevur verið arbeitt fyri at gerast sjálvstøðugt limaland í Olympisku Nevndini, IOC.

Sum er, noyðast føroysk ítróttafólk at luttaka á Olympsiku Leikunum undir donskum flaggi. Tveir føroyingar hava higartil tikið lut í OL. Katrin Olsen í rógving í 2008 og Pál Joensen í svimjing í 2012 og 2016. 

Ítróttasamband Føroya fekk í síðstu viku stuðulsbræv frá Lars Løkke Rasmussen, forsætisráðharra, har hann ger greitt, at Danmark stuðlar Føroyum í stríðnum fyri at gerast sjálvstøðugt limaland í IOC.

Hoyr forsetan í ÍSF, Elin Heðinsdóttir Joensen, greiða frá.

Tørvur er á fleiri nýggjum fosturfamiljum til børn, sum av onkrari orsøk ikki kunnu búgva heima.

Hoyr Oddbjørg Balle, leiðari á barnaverdarstovuni, greiða frá.

Faroe Islands Minority Film Festival verður fyri aðru ferð hildið.

Festivalurin fer at enda við eini drag-sýning, og nú leitar Siri Sørensen, samskipari, eftir føroyskum drag queens at luttaka til sýningina.