Það er óhætt að fullyrða að það sé mikill titringur í Tyrklandi vegna landsleiks Tyrklands og Íslands. Kannski réttara að segja vegna móttökunnar í Leifsstöð. Lögreglan á Suðurnesjum hafnaði beiðni Tyrkja um að landsliðið fengi undanþágu frá vegabréfaskoðun við komuna til landsins. Leikur Íslands og Tyrklands hefst eftir stundarfjórðung.

Sjávarútvegsráðuneytið hefur fellt úr gildi ákvörðun Fiskistofu um að svipta Kleifaberg RE-70 veiðileyfi vegna brottkasts. Ráðuneytið felur Fiskistofu að rannsaka betur meint brot.

Franskur saksóknari fer fram á fimm ára óskilorðsbundinn dóm yfir Björgólfi Guðmundssyni fyrrum stjórnarformanni og aðaleiganda Landsbankans vegna fasteignalána sem útibú bankans í Lúxemborg veitti.

Engin niðurstaða er af fundi formanna flokkanna á Alþingi sem lauk um klukkan fimm.

Innihaldslýsingar margra orkudrykkja sem markaðsettir eru sem heilsuvara eru oft ekki ósvipaðar innihaldslýsingu á Diet Coke. Þetta segir íþróttanæringarfræðingur. Ákveðnir hópar íþróttamanna geti þó haft gagn af aukakoffíni.

Kjaradeila Starfsgreinasambandsins og sveitarfélaga er í hnút. Það gæti stefnt í hörð átök og jafnvel verkföll ef ekki tekst að höggva á hnútinn og semja. Arnar Páll talar við Flosa Eiríksson og Henný Hinz.

Innihaldslýsingar margra orkudrykkja sem markaðsettir eru sem heilsuvara er oft ekki ósvipaðar innihaldslýsingu á Diet Coke. Þetta segir íþróttanæringafræðingur. Ákveðnir hópar íþróttamanna geti þó haft gagn af koffíni. Forstöðumaður rannsóknarstofu í næringarfræði við Háskóla Íslands og Landspítala segir að amínósýrur hafi líklega lítil sem engin áhrif í því magni sem þær eru í drykkjunum. Arnhildur Hálfdánardóttir.

Franskur saksóknari telur að Landsbankinn hafi brotið lög þegar útibú bankans í Lúxemborg seldi ákveðna tegund fasteignalána til húseigenda í Frakklandi fyrir hrunið 2008. Einn níu ákærðra er Björgólfur Guðmundsson fyrrum stjórnarformaður og aðaleigandi Landsbankans. Saksóknari telur Björgólf hafa haft hag af sviksamlegum lánum og fer fram á þyngsta dóminn yfir honum, fimm ára fangelsi og háa sekt. Allir ákærðu hafna sök í þessu áfrýjunarmáli sem saksóknari tapaði á fyrsta dómsstigi.