ក្រោយការ​ផ្ទុះសង្គ្រាមនៅអ៊ុយក្រែន ចាប់តាំងពីថ្ងៃទី​២៤កុម្ភៈមក គេបានសង្កេតឃើញ មានការផ្សព្វផ្សាយ​យ៉ាងព្រោងព្រាតតាមបណ្តាញសង្គម នូវរូបភាព ជារូបថតនិង​វីដេអូ របស់ទាហានរុស្ស៊ី ដែល​ត្រូវបាន​ភាគីអ៊ុយក្រែនចាប់ខ្លួនបាន​។ រូបភាពភាគច្រើន មិនបង្ហាញឲ្យ​ឃើញនូវការធ្វើទារុណកម្ម ឬសកម្មភាពធ្វើបាបដើម្បីសងសិក ពីសំណាក់ភាគីអ៊ុយក្រែនទៅលើទាហានរុស្ស៊ីឡើយ។ ផ្ទុយទៅវិញ វាបង្ហាញពីការយកអាសារ ពីសំណាក់ជនជាតិអ៊ុយក្រែន ចំពោះទាហានចំណាប់ខ្មាំងរុស្ស៊ី ដែលភាគច្រើន​មានវ័យក្មេងៗ ហើយដែលខ្លះបាន​អះអាងថា​ ត្រូវគេកេណ្ឌឲ្យ​មកធ្វើសង្គ្រាម ដោយ​បង្ខំថែមទៀតផង។ ទោះជាយ៉ាងនេះក្តី សួរថាតើអ៊ុយក្រែន មានសិទ្ធិផ្សព្វផ្សាយ​រូបភាពចំណាប់ខ្មាំងរុស្ស៊ី​ទាំងនោះដែរឬទេ?