閒置中迎來第250集，我哋正式宣布閒置中要結束啦，感謝5年嚟無論係持續收聽或者係間唔中收聽閒置中嘅聽眾，有大家嘅關注同支持令閒置中成為咗長壽節目之一~

喺最後一集，研究員同大家分享做podcast嘅種種，多謝大家嘅陪伴，我哋後會有期。

研究員：劍、Brian、Emily

近來多條市區古村被拆，見到新聞描述村民嘅處境通常都要各散東西，甚至安置未有着落已經被突襲封村，其實又可唔可以避免到暴力拆村嘅發生呢？睇返過往文獻記錄受發展影響嘅拆村故事，原來有唔少搬村嘅例子可以保留到完整嘅村落，過程中政府會考慮村民嘅意願，甚至考慮埋村民日後嘅生計。呢種種又會唔會喺將來北都發展時，安置受影響嘅新界非原居民村可以參考嘅方式？今集閒置中，同大家講搬村。

研究員：劍、Brian、Emily

地價低迷下，政府賣地滯銷、私人重建停滯，市區似乎都遍布唔少閒置緊嘅土地，但原來有唔少吉地都唔係近年先閒置，隨時凋空咗喺度十幾廿年。研究員近日就嘗試搵下有幾多呢類私人吉地，快手盤點下已經數到十幾廿塊，幾乎市區內區區都有。呢類土地除咗吉咗係度，係咪就因為屬於私人性質，就無辦法可以好好利用。定其實政府都可以透過唔同途徑，將佢哋嘅土地價值體現出嚟，例如係用嚟做公園或者市集？今集閒置中就同大家傾下如何好好運用呢啲市區吉地。

研究員：劍、Brian、Sunny

西貢橋咀喺十一假期單日4000遊人登島，有珊瑚被踩，有海星被捉，生態熱點慘遭浩劫，事後大家發現，原來橋咀部分地方竟然不屬保護區範圍。要救橋咀，或者避免下一個郊野勝景淪為第二個橋咀，仲有冇其他辦法？喺香港搞生態旅遊，如何做到長做長有？今集閒置中，研究員同大家討論，香港郊野仲有冇得救。

研究員：Brian、戴安、Cyrus

幾星期前研究員實地考察發現，香港市區竟然仲有好幾幅農地。呢啲隱藏喺城市邊緣既農地，其實對於城市人有咩價值?喺高密度發展嘅香港，市區農田又有冇發展嘅空間？今集閒置中，同大家討論香港市區農田嘅過去、現在、同未來。

研究員：Brian, Cyrus

嘉賓：Will

超強颱風樺加沙襲港，邊區受災最嚴重？喺打風期間，研究員推出咗《樺加沙災情實時地圖》，實時上網收料，同時邀請公眾報料，再將各種災情用地圖方式呈現。研究員今集節目同大家分享下，製作公眾參與嘅實時災害地圖嘅價值同作用。

研究員：劍、Brian、Emily

政府嚴打公屋濫用，天水圍兩母子因被收樓不堪壓力輕生，傳媒揭發原來事主因無辜被捲入套丁案，結果唔知情下持有土地，觸發房署收樓。而無人從事非法套丁的話，兩母子就唔會俾人利用，所以如果政府肯將打擊公屋濫用嘅心機，放喺打擊丁屋濫用度，令成條套丁產業鏈瓦解，呢件不幸事件就未必會發生。

劍、Brian、Sunny

一件物品壞咗爛咗，你有幾可攞去維修？唔貴可能你直接拋棄佢，可能係你根本冇諗過有得整，又或者唔知揾邊個整，喺呢個時候，你可以選擇打開本研嘅香港維修地圖，地圖為你搜羅過百間維修舖頭，涵蓋9大類別，包括傢俬古董、時尚配件、電器電子產品、戶外運動用品、個人用品、生活器材、鐘錶、藝術品、樂器，總有一種貼合你嘅需要。
今集閒置中，研究員分享各種維修嘅方式，再講到循環經濟同埋有關維修嘅政策，希望下次有樣野壞咗嘅時候，我地都會諗起有維修呢個選擇。

研究員：Brian, Sunny, Emily

近月雨季來臨，天文台時不時就懸掛暴雨信號，一旦外出唔記得帶遮，就真係「揦」手唔成勢，以前例如係麥當勞、7-11都有得借遮，依家都無咗，其實仲有邊啲地方可以借？今日研究員同大家分享下全港可以借遮嘅熱點，再闊啲咁去探討下喺香港推動資源共享嘅可能性。

研究員：Brian, Sunny, Emily

政府目標喺2035年前要將太陽能發電比例升至1-2%，雖然睇落好似唔多，但依家其實連0.5%都無，嚟緊私人安裝太陽能板嘅趨勢，亦可能會因「上網電價計劃」退場而急跌，究竟政府喺滿足呢個目標上有幾俾力呢？研究員請嚟自由環境記者梁錫嵐，嚟同我哋討論一番，究竟政府依家自己嘅主要建築有幾多有安裝太陽能系統，而香港要提升可再生能源又有咩障礙？今集閒置中同大家淺入深出。

研究員：Brian、Sunny

嘉賓：Selena (Freelance環保記者)