閒置中 Liber Podcast by 本土研究社

想打波但又book唔到場相信已經係香港市民嘅日常體驗，但原來香港仲有一堆規劃中嘅體育設施，等咗好多年仲未起好。當中唔少已經拖咗20幾年，到底當中有咩原因令市民遲遲都打唔到羽毛球？今集閒置中由地區體育設施規劃出發，去到觀察啟德體育園嘅落成，分析香港體育發展到底行緊咩方向，未來體育要普及化係咪困難重重？

研究員：Cody、Brian

近年香港同其他城市一齊面對土地不足、房屋短缺、過度旅遊嘅問題。就填海議題上不時引用荷蘭例子作為辯護，究竟填海係咪靈丹妙藥？有研究員到荷蘭留學，走訪當地了解荷蘭點樣應對以上嘅問題，再反思。喺今集閒置中，分享佢嘅所見所聞。

研究員：劍、Echo、Cody

政府喺新嘅旅遊發展藍圖入邊，提到要開發海島旅遊，將呢啲隱藏喺寶盒入面嘅海島珍寶公諸於世，但究竟呢啲海島係咪真係一直遠離市民生活，尚待開發嘅土地？抑或係本身已經具備好多價值，只係從來無被政府納入發展藍圖入邊，就被判斷為無用盡呢啲生態資源嘅潛力？閒置中今集同大家一齊傾下香港二百幾個海島，分享下研究員曾經喺荒島經歷過嘅獨特體驗，並講述下個別島嶼曾經被唔同人使用過嘅故事。

研究員：劍、Brian、Sunny

政府連續三年千億財赤，究竟意味着啲乜？有人話係結構性問題，但政府仍然堅持話只係周期性，捱多一排，過多幾年就會情況逆轉。但政府唔夠錢，最首當其衝嘅似乎係一啲討論緊要削減嘅民生開支。究竟財赤對於普羅大眾有咩影響，今日閑置中研究完就同大家一齊分析一下，睇睇亞洲財赤第一嘅香港，而家處於一個乜野嘅處境？

研究員：劍、Brian、Sunny

熟食市場作為香港美食天堂嘅重要象徵，一直都係各大美食專頁嘅常客，更係唔少電影嘅取景場地，但點解近年嚟食環不斷關閉熟食市場？唔通香港人已經唔再中意美食？定原來又係地租經濟下嘅犧牲品？今集閒置中同大家深入淺出，探討下食環嘅管理思維，思考下熟食市場喺2025年嘅地區經濟仲扮演緊咩角色。

研究員：劍、Cody

嚟到閒置中喺2024年嘅最後一集，我地率先回顧過去一年研究社做過嘅大小事，究竟邊個議題係本年度最受歡迎又引起到最多嘅討論？今年研究社做咗啲咩新嘗試呢？再回顧2024年嘅香港，我地會用咗邊隻字嚟形容今年城市經歷緊嘅嘢？同埋對研究社喺2025年嘅展望。
今集閒置中同大家講2024，同埋祝大家happy new year!

研究員：劍、Cody、Emily

政府前排發基建債，竟然第一次出現認購不足嘅情況，之前話想俾公眾喺推動基建發展上有參與感，但究竟發債同投資者參與係有咩關係，如果係咁認購不足係咪即係意味大眾都唔想參與？今集閒置中，想同大家傾下呢啲借債問題，分析一下究竟政府係咪真係借債度日，普遍評論又點樣理解發債呢回事，基建債背後又有無啲鬼鼠嘢應該要知架呢？利申本研無持有任何債券。

研究完：劍、Sunny

彩虹邨重建作為今年香港城市發展最重要嘅議題之一，由公佈嘅時候就已經引起公眾關注。當新聞關心要去到2048年先完成重建，其實仲有一班人思考緊有無其他可能性。今集閒置中邀請咗Kongcept共同創辦人以及保育彩虹邨發起人—Don。深入淺出同大家講下彩虹邨獨有嘅社區面貌同對公屋保育議題嘅重要。

嘉賓：Kongcept共同創辦人&保育彩虹邨發起人 Don

研究完：劍、Cody

近年香港生育率低咗，睇落就多咗人養貓養狗，如果睇返貓狗糧入口同獸醫數量數據，會見到近十幾年都有好明顯嘅上升趨勢。但究竟有無一條實數，話俾我哋知而家我哋其實照顧緊幾多隻貓狗，而當政府依家不時都講緊要推出啲寵物友善政策時，又有無基礎去決定邊度起寵物公園，又或者邊條線要有寵物車箱呢，研究員睇返統計署數據，發現原來成6年無更新。條數似乎亦唔太可靠。究竟香港仲有幾多喺數據上睇唔見嘅貓狗？今日閒置中，同大家一齊去nan2下啲貓狗數據！

研究員：劍、Sunny、Emily

斥資上千億發展河套區計劃，近日政府亦公佈發展網要勾勒當中創科發展內容，然而香港邊陲的河套區為何空置多年至今，過往投射過多少種城市發展想像? 河套計劃又會為香港引向一個怎樣的未來?

研究員：劍青