閒置中 Liber Podcast by 本土研究社

近日申公署將3年前嘅所有報告喺網站下架，話因為報告已過時，廢時整慢部電腦，要睇就親自到相關部門借閱，荒謬到令人質疑究竟背後有咩真正原由。有記者到申公署要求閱覽報告目錄，但都被拒，喺民間協力下，研究員亦整理好政府不願公開嘅目錄，究竟當中又有啲咩有趣嘅調查報告？今集閒置中，就同大家分析一下，申公署下架報告背後其實意味著啲乜？

研究員：Brian、Sunny、Emily

近年成日聽見要「夜繽紛」，究竟依家香港夜經濟有無復甦到呢？夜媽媽走落條街度，又有幾多嘢好食？研究員今次同大家從「凌晨食肆」嘅角度，嚟探討香港夜間活力嘅議題，發現的確好多本身開得夜嘅餐廳，都已經因為唔同原因而早收咗，究竟夜經濟少咗，係社會進步嘅象徵，定意味一個城市變得無咁宜居？今集閒置中，同大家講飲講食，同時認真討論城市變化嘅議題。

研究員：劍、Brian、Sunny

五一假期，西貢東壩人山人海，萬宜水庫變身「萬人水庫」，呢種以量取勝嘅所謂「生態旅遊」／「深度遊」究竟有幾可持續？「無處不旅遊」同網絡打卡文化下，東壩被逼爆只係個開始，政府打算喺南大嶼、尖鼻咀、白泥、南丫島發展「生態旅遊」，甚至加入地產元素，徹底顛覆香港人對生態旅遊嘅想像。今集《閒置中》邀請咗綠色和平嘅代表同大家分析下當中隱憂。

研究員：Brian

嘉賓：涼 (綠色和平項目主任)

機場買貴野好似係常識，但係唔係一定係咁？

近日研究員實測左香港機管局運行左上廿年既「機場市區價價保證」機制，同大家探討，今時今日機場商鋪點樣貴法？公營機構當中又有咩角色？當旅客係水魚對未來發展「機場城市」又有咩啟示？今集閒置中同大家傾下。

研究完：劍、Brian

嘉賓：研究辛 戴安

屯門樓盤不斷落成，政府今季繼續推售屯門住宅地，勢將進一步逼爆屯門。當區交通社區配套一直都被批評跟唔上人口增長，嚟緊可見將再起多超過4萬伙住宅，即係分分鐘再多十幾萬人。究竟屯門區係咪真係能夠承載到咁多人？今集閒置中，請嚟從小就成長於屯門嘅荼毒室成員Alex，一齊分享佢觀察到嘅社區轉變，進一步探討香港規劃上嘅地區不公義問題!

研究員：Brian、Sunny

嘉賓：Alex (荼毒室成員)

驟眼睇好似每區都有圖書館，但原來仲有好多社區爭取興建同擴建多年都仲未成功。究竟香港嘅圖書館夠唔夠多，普遍分館又夠唔夠大嚟承載多元嘅社區功能？而現況又係香港人越嚟越少去圖書館，定係圖書館發展緩慢吸引唔到人呢？今集閒置中，研究員由香港唔同社區圖書館講起，再比較世界各地公共圖書館系統同制度，一齊討論要搞好圖書館、推廣閱讀風氣仲有咩可以做。

研究員：Sunny, Emily

財經資料庫網站Webb-site創辦人David Webb因病宣布結束運作Webb-site，其實呢類非官方資料庫，係香港仍然有唔少，除咗關心財經，亦有唔少關注環境、城市精神健康、交通、土地議題等嘅有心人，營運緊唔同類型嘅民間資料庫。我哋本研都係其中一份子，雖則前排因經費問題，暫時要將本研地理資訊地圖下架，但相信好快有方法重現大家眼前。而今日我哋亦請嚟咗有份製作香港工業傷亡意外資料庫，工權會《工殤地圖》嘅小飛嚟傾下計。今集閒置中，同大家一齊分享下，究竟製作一個資料庫，心路歷程會係點，同埋有咩困難同挑戰呢。

研究員：Brian、Sunny

嘉賓：小飛 (工業傷亡權益會幹事)

近年不斷有報導描述香港各級寫字樓嘅空置慘況，喺可見嘅將來似乎都難以消化過量嘅供應。但睇返政府2017年相關嘅顧問研究報告，當時竟然估算香港將會出現極大量嘅商廈短缺。或者正正係因為呢類估算，至令到今日商廈過量嘅問題。究竟香港仲有幾多可建商廈嘅商業地剩，而呢啲土地作商業用途，又會唔會可以有更多發展上嘅想像，令到未來不致於浪費大量土地？今集閒置中，同大家討論下究竟香港仲可唔可以有其他經濟商業模式。

研究員：劍、Brian、Sunny

政府提供嘅2萬個過渡屋單位，超過一半都係喺新界鄉郊地區，過去成日被批評選址偏遠，而近日更有過渡屋項目，因為位處於新發展區內，而引起隨時面臨遷拆嘅問題。研究員發現總共有4間過渡屋項目，近4千伙單位面臨相同處境。究竟呢啲過渡屋，喺房屋安置嘅政策上，有幾重要，又同時幾受忽視呢？而眾多由地產商借地而建嘅過渡屋，究竟本質上真係為咗輪候公屋嘅居民過渡，抑或係為咗地產商能夠藉地皮做過住宅用途，而方便之後改劃成私人樓而過渡呢？今集閒置中，就同大家剖析下呢類過渡屋面臨嘅災劫。

研究員：劍、Brian、Sunny

唔知大家有冇買玻璃瓶裝牛奶嘅習慣呢？喝完飲品後可以去便利店按返個瓶，攞返$1呢個做法鼓勵大家回收再用玻璃瓶，從而減少廢物。政府就膠瓶同紙包飲品都建議推行類似政策，叫「生產者責任制」，每個膠瓶同紙包飲品回贈一毫子。究竟淨係得一毫子鼓唔鼓勵到大家回收呢？今集《閒置中》同大家討論都市廢物嘅問題。

嘉賓：綠惜地球助理環境事務經理 Steven

研究員：劍、Brian