USO NET MATLIESEN !!! ASS NEMMEN FIR DE SITE
14/11/2018 PEUGEOT RIFTER
S. PAULY
Eis Kollege vum Automag kommen am léiwsten heihinner, wann se erëm iergendeen Dramauto gefuer sinn, a wou se eis d’Zong esou richteg laang maache kënnen… Heiansdo „mussen“ se awer och ganz normal Autoen testen, Autoen déi normalerweis net op hirer Wonschlëscht stinn. Du wars mam Rifter ënnerwee?
Eigentlech op Test vum Peugeot 508 invitéiert, virum Summer, op eemol gouf och de Rifter aus dem Hutt gezaubert. Nofolger vum Partner Tippi, also eng kleng Camionette. Ganz éierlech, ech wier léiwer nach en Dag mam 508 gefuer, mä Peugeot huet wierklech insistéiert, dass mir och de Rifter probéiere missten. An ech muss soen: ech war extrem positiv iwwerrascht!
Du sees „kleng Camionette“. Ech muss soen, op de Fotoen gesäit en awer net esouuuu schlecht aus?
Effektiv, Peugeot huet sech vill Méi mam Design ginn. Et ass jo de Cousin vum Opel Combo a vum Citroën Berlingo. De Peugeot gesäit vun deenen dräi am bullegsten aus, do erënnert effektiv net méi vill un eng Mini-Camionette. De Rifter krut och Plastiksprotectioune ronderëm d’Radleef a soss ronderëm d’Karosserie spendéiert, dat gëtt em dann e klengen Offroad-Look. Och de Kühlergrill, d’Luuchten an esou wieder orientéiert sech un den normale Peugeot-Modeller wéi 308 oder 5008… De Rifter kritt een iwwregens an zwou Gréissten, 4m40 oder 4m75 laang. Egal wéi, e mécht e ganz erwuessenen Androck. Par rapport zum ale Partner wierklech e risege Sprong.
An awer: déi Zort Auto keeft een net wéinst dem Design, mä well se praktesch sinn. Wéi praktesch ass de Rifter?
Extrem… vill Leit déi mat engem stylesche SUV ënnerwee sinn, wiere mat esou engem Modell wahrscheinlech besser beroden. Schiebedieren op jiddfer Säit si wierklech praktesch. Dann extrem vill Plaz, d’Mall huet 775 Liter (+100 Liter par rapport zum Virgänger), wann een d’Sëtzer an der laanger Versioun all ëmklappt (dat ass relativ einfach) sinn et bis zu 3500 Liter! Mä donieft extrem vill Oflagen, am Bueden, an den Dieren, ënnert dem Daachhimmel, plus richteg grouss Händchekëscht…. Et kritt een definitiv jiddfer Kreemchen ënnert Daach.
Wéi ass d’Ambiance da bannendran? Camionette oder richtegen Auto?
Zwou Äntwerten: bei den Equipementer definitiv Niveau Auto. Op éischte Bléck fält groussen 8-Zoll-Infotainment-Ecran op, an der Mëtt vum Tableau. Och den Design vum Tableau ass éischter stylesch gehalen, beispillsweis mam typesche klenge Peugeot-Steierrad. Da kritt een op Wonsch e grousse Panoramadaach. Dat gesäit alles zimlech flott aus. Mä bon, wann een net nëmme mat den Aen, mä mat de Fangere kuckt, da spiert een awer déi utilitaire Wuerzelen. D’Finitioun ass ganz einfach gehalen, kann een net mat anere Peugeot-Modeller vergläichen, vill haarde Plastik. Et ass awer net esou schlëmm, dass ech als verwinnte Journalist elo Ausschlag kritt hätt, mä bei der Veraarbechtung muss een definitiv Ofstrécher maachen.
Elo si mir nach net mam Rifter gefuer. Och do meng Fro: Auto oder Camionette?
Och op der Strooss war ech wierklech iwwerrascht! Stroosselag an Ofrullconfort vill besser wéi beim ale Partner. Et ass elo méi no bei engem richtegen Auto. Natierlech net mat engem 308 ze vergläichen, awer et geet definitiv an déi richteg Richtung. De Confort ass gutt an d’Lenkung ass zimlech direkt (dat ass haut éischter sielen, dofir eng agreabel Ofwiesslung). Mir sinn duerch d’franséisch Alpen gefuer, an de Serpentinne loung de Rifter fir seng Kategorie wierklech gutt. Ech war awer frou, dass ech hanne keng Passagéier setzen hat, deene wier et schlecht ginn, well déi hënnescht Sëtzer bidden kaum Säitenhalt…
Wéi schlecht gëtt et dem Rifter-Propriétaire da beim Bezuelen?
Präisser fänke bei 18‘000 Euro un, Basisversioun, zimlech plakeg. Laangversioun, Assistenzsystemer, e bësse Schickimicki fir den Auto méi flott ze maachen (grouss Felgen), elektronesch Assistenzsystemer, eng 8-Gang-Automatik… fir en Utilitaire zimlech vill Optiounen… dann awer och 30‘000 Euro… fir e prakteschen Auto, dee guer net esou schlecht ausgesäit.
