តុលាការក្រុងភ្នំពេញ​ បន្ត​លើក​ពេល​សវនាការ​លើ​អង្គសេចក្តី​នៃ​សំណុំរឿង​លោក​ រ៉ុង ឈុន ​និង​ក្រុមសកម្មជន​សង្គម​ជិត១០ផ្សេងទៀត​ ដែលគ្រោង​ធ្វើ​នៅថ្ងៃ​ទី៨ ខែមិថុនា ​ទៅពេល​ក្រោយ​ទៀត ​ក្រោម​ហេតុផល​បង្ការ​ជំងឺកូវីដ-១៩ ​។ ទោះជាយ៉ាងណា​ តុលាការក្រុងភ្នំពេញ​ ​នឹង​​បន្ត​បើក​សវនាការ​លើ​បណ្តឹង​​សុំនៅ​ក្រៅឃុំ​បណ្តោះ​អាសន្ន​របស់​លោក​ រ៉ុង ឈុន និង​កញ្ញា ​ស កណិការ ​ដូចការគ្រោងទុកដដែល។ សាច់ញាតិ ​និង​មេធាវី​ការពារក្តី​ ​ទាមទារ​ឲ្យតុលាការ​ដោះ​លែង​សកម្មជន​សង្គម​ទាំងនោះ​ ព្រោះ​ការលើក​ពេល​បើក​សវនាការ​លើអង្គ​សេចក្តី​ម្តង​ហើយ​ម្តងទៀតនេះ ​នឹងធ្វើឲ្យ​ពួកគាត់​ បន្តជាប់​ឃុំ​ក្នុង​ពន្ធនាគារ​ដោយ​អយុត្តិធម៌។

ពលរដ្ឋ​ខ្មែរ​ក្រោម​នៅ​លើ​ទឹក​ដី​កំណើត​និង​នៅ​តាម​ប្រទេស​មួយចំនួន​​​ជុំវិញ​ពិភព​លោក​បាន​ប្រារព្ធ​ខួប​បាត់​បង់​ទឹកដី​ខ្មែរក្រោម​ កាល​ពីចុង​សប្តាហ៍​នេះ ​តាម​រូបភាព​ផ្សេងៗ​គ្នា ​ដើម្បី​ឲ្យ​ពលរដ្ឋខ្មែរជំនាន់​ក្រោយ​បាន​យល់​ដឹងពី​ប្រវត្តិ​សាស្រ្ត​ពិត ​និងសំដែងការដឹងគុណដល់​វីរបុរសខ្មែរ​ដែលបាន​បូជា​និង​លះបង់​ជីវិត​ដើម្បី​​ បុព្វ​ហេតុជាតិ ​និងមាតុ​ភូមិ​។ ​ក្នុង​ខួប​លើ​ទី​៧២​ឆ្នាំ​នៃ​ការ​បាត់​បង់​ទឹក​ដី​នៅឆ្នាំនេះ មេ​ដឹក​នាំ​អង្គការ​ខ្មែរ​ក្រោម​បាន​ប្រើប្រាស់​ពាក្យ​ស្លោក "ក្រោកឈរដើម្បីសិទ្ធិសម្រេច​វាសនា​ដោយ​ខ្លួន​ឯង"។​

ប្រពលរដ្ឋ​​ជាង១រយ(១២៨)​គ្រួសារ​​មាន​ជម្លោះដីធ្លី​ជា​មួយ​ក្រុមហ៊ុន​ចិន យូ​ញៀន​ ឌីវ៉ែលឡុបម៉ិន​គ្រុប ​ (Union​ Development​ Group​) ឬ យូ​ឌី​ជី​ (UDG) ក្នុង​ខេត្ត​កោះ​កុង​ ចោទថារដ្ឋាភិបាលថាអសត្ថភាពក្នុងការដោះស្រាយ​ជម្លោះ​ដីធ្លី​ជូនពួកគាត់ ប្រកបដោយ​យុត្តិធម៌​ ព្រោះ​រដ្ឋាភិបាលលំអៀងទៅខាង​ក្រុមហ៊ុន​ចិន។ ការអះអាង​បែប​នេះ ធ្វើឡើង​ដោយសារតែ​ពួ​កគាត់​នៅតែ​ទន្ទឹង​រង់ចាំដំណោះ​ស្រាយបញ្ហាវិវាទដីធ្លីនេះជាង ១ទស​វត្សរ៍​មកហើយ តែ​អាជ្ញាធរ​​គ្មាន​ភាព​ច្បាស់​លាស់​ក្នុង​ការ​ដោះស្រាយ​ទាល់​តែសោះ ​ហើយនៅពេលដែលពលរដ្ឋចេញតវ៉ាងម្តងៗ អាជ្ញាធរតែងតែប្រើហិង្សា និងធ្វើទុក្ខបុកម្នេញលើពលរដ្ឋជាបន្តបន្ទាប់។

ជន​ចាស់​ជរា​មួយ​ចំនួន​ត្អូញត្អែរ​ថា​ អំឡុង​ពេល​មាន​វិបត្តិ​ជំងឺ​កូវីដ​១៩​​នេះ​បាន​ប៉ះពាល់​យ៉ាង​ខ្លាំង​ដល់​ជីវភាព​រស់​នៅ​របស់​ពួកគាត់ ហើយ​រដ្ឋាភិបាល មិន​បាន​យក​ចិត្ត​ទុកដាក់ ​ចំពោះ​ពួកគាត់​នោះ​ទេ​​។​​ស្ថានភាព​បែប​នេះ​​ធ្វើ​ឱ្យ​​មនុស្ស​ចាស់​ខ្លះ​មាន​​​សុខភាព​ទ្រុឌទ្រោម​ និង​​ខ្លះ​ធ្លាក់​ខ្លួន​ឈឺ​​ដេក​នៅ​នឹង​កន្ទេល​ ដោយសារ​ដោយ​​សារ​ពួកគាត់​ហូប​អាហារ​មិន​គ្រប់​គ្រាន់​​។ មន្ត្រី​សង្គម​ស៊ីវិល​ យល់​ថា រដ្ឋាភិបាល​គួរតែ​​​​ដាក់​ចេញ​គោលនយោបាយ​​​​គាំពារ​សង្គម​ជួយ​ដល់​មនុស្ស​ចាស់ ដើម្បី​​សម្រួល​ដល់​ការ​រស់​នៅ​របស់​ពួកគាត់​​​នៅ​ក្នុង​​វ័យ​ជរា​នេះ​។

ប្រជាពលរដ្ឋមួយចំនួនរិះគន់វិធានការរបស់អាជ្ញាធររាជធានីភ្នំពេញថាខ្វះចំណាត់ការច្បាស់លាស់ក្នុងការទប់ស្កាត់ជំងឺកូវីដ១៩ ដែលបណ្តាលឱ្យករណីឆ្លងរាលដាលនៃជំងឺនេះបន្តកើនឡើង និងបង្កឱ្យប៉ះពាល់ដល់មុខរបរ ឬអាជីវកម្មរបស់ប្រជាពលរដ្ឋដែលកំពុងត្រដរខ្យល់ស្រាប់ដោយសារវិបត្តិជំងឺនេះ។ ប្រតិកម្មនេះបន្ទាប់អាជ្ញាធររាជធានីភ្នំពេញប្រកាសផ្អាក សកម្មភាពការងារ មុខរបរ ឬអាជីវកម្ម ដែលមានហានិភ័យខ្ពស់នៃការឆ្លងរាលដាលជំងឺកូវីដ១៩ រយៈពេល១៤ថ្ងៃ ។ មន្ដ្រី សង្គមស៊ីវិលជំរុញឱ្យអាជ្ញាធរពាក់ព័ន្ធបង្ហាញផែនការច្បាស់លាស់ទប់ស្កាត់ជំងឺកូវីដ១៩ និងធានានូវប្រក្រតីភាពនៃដំណើរការអាជីវកម្មរបស់ប្រជាពលរដ្ឋ។

សាច់​ញាតិសង្ឃឹម​​ថា​ អាជ្ញាធរ​​នឹង​ពន្លឿន​ការ​​​ដោះលែង​​​​អ្នក​ជាប់​ឃុំ​មួយ​ចំនួន ដើម្បី​កាត់​បន្ថយ​ភាព​ចង្អៀត​ណែន និង ​បញ្ហា​ប្រឈម​​ជំងឺ​កូវីដ​១៩​(Covid-19) ​​ក្នុង​ពន្ធនាគារ​។ ការ​រំពឹង​នេះ​ ធ្វើឡើង​​ក្រោយ​​ពី​តំណាង​អង្គការ​សហប្រជាជាតិ​ប្រចាំ​នៅ​កម្ពុជា (OHCHR) ​និង ​តំណាង​អង្គការ​យូនីសែស (UNICEF)​ បាន​​លើក​បញ្ហា​នេះ​ឡើង កាល​ពី​​ថ្ងៃ​ទី​០៣ មិថុនា ក្នុង​ជំនួប​ជាមួយ​​រដ្ឋ​មន្ត្រី​​ក្រសួង​យុត្តិធម៌​។

អាជ្ញាធរ​រាជធានី​ភ្នំពេញ​បាន​តាម​រារាំង​​ក្រុម​ស្ត្រី​ថ្ងៃសុក្រ​ មិន​ឱ្យ​ជួប​ជុំ​លើក​បដា​រក​យុត្តិធម៌​ឱ្យ​គ្រួសារ​របស់​ពួក​គាត់​ រហូត​ដល់​មុខ​ការិយាល័យ​អង្គការ​សហប្រជាជាតិ​ប្រចាំកម្ពុជា។ ក្រុម​អ្នក​តវ៉ាដោយ​សន្តិវិធី​ទាំងនោះ ថ្កោល​ទោស​ទង្វើ​រំលោភ​បំពាន​របស់​អាជ្ញាធរ ខណៈមន្ត្រី​សិទ្ធិមនុស្សទទូច​​ឱ្យ​អាជ្ញាធរ​គោរព​សិទ្ធិពលរដ្ឋដែល​ធានា​ដោយ​​ច្បាប់ជាតិ និង​អន្តរជាតិ។

ប្រពន្ធជន​រង​គ្រោះ​ដែល​ប្តី​ត្រូវ​យោធា​បាញ់​ឲ្យ​របួស​កាល​ពី​ថ្ងៃ​ទី ៣ មិថុនា បាន​ប្តេជ្ញា​ចិត្ត​ស្វែង​រក​យុត្តិធម៌​ពី​ស្ថាប័ន​ពាក់​ព័ន្ធ ។ ការ​លើក​ឡើង​នេះដោយ​សារ​តែ​សមត្ថកិច្ច មិន​ទាន់​បង្ហាញ ឬ​វែក​មុខ​ជន​ល្មើស​ដែល​បាញ់ប្រហារ​ដោយ​ហិង្សា ដើម្បី​ផ្តល់​យុត្តិធម៌​ដល់​គ្រួសារ​ជន​រង​គ្រោះ​នៅ​ឡើយ។

សហគមន៍​ខ្មែរកម្ពុជាក្រោម ប្រារព្ធ​​ខួប ៧២ឆ្នាំ នៃថ្ងៃ​បារាំង​កាត់​ទឹក​ដី​ខ្មែរ​ក្រោម​ទៅ​វៀតណាមទាំងខុសច្បាប់ ​​​ រយៈពេលវែង ចាប់​ផ្ដើម​ពី​ថ្ងៃ​​០៤​ ខែ​មិថុនា រហូតដល់ចុង ខែ​មិថុនា​។ ថ្ងៃ​ទី​១​នៃ​ការ​ប្រារព្ធ​ខួប​នៃ​ទិវា​កាន់​ទុក្ខ​ជាតិ​ខ្មែរ លើក​៧២នេះ សហគមន៍​​​ខ្មែរ​ក្រោម​ ទាមទារ​ទៅ​វៀតណាម​ត្រូវ​​ទទួល​ស្គាល់​ខ្មែរ​ក្រោម​ជា​ជន​ជាតិដើម​ម្ចាស់​ស្រុក។ អ្នក​នាំ​ពាក្យ​រដ្ឋាភិបាល​ យល់​ថា​ ​ខ្មែរ​ ក្រោម​មានសិទ្ធិទាមទារសិទ្ធិជាម្ចាស់ស្រុក ប៉ុន្តែ​ រដ្ឋាភិបាល ​មិន​អាច​ជួយ​​ឬ​លូក​ដៃ​ការ​ទាមទារនេះបានព្រោះពេលនេះកម្ពុជាក្រោមជាទឹកដីរបស់វៀតណាមហើយ។

សាច់ញាតិ​សកម្មជន​មាតាធម្មជាតិ​បួងសួង​នៅ​ព្រះ​អង្គ​ដងកើ​សុំ​ឱ្យ​ប្ដី​ កូន​ និង​បង​របស់​ពួក​គេ​ ដែល​កំពុង​ជាប់​ឃុំ​រួចផុត​ពី​ការ​ឆ្លង​ជំងឺ​កូវីដ​និង​អាច​នៅ​ក្រៅ​ឃុំ​។​ ឆ្លើយតប​ករណី​នេះ​ មន្ត្រី​ជាន់​ខ្ពស់​ពន្ធនាគារ​ថា​ សកម្មជន​ នយោបាយ​ ព្រំដែន​ និង​សកម្មជន​បរិស្ថាន​ជាដើម​នោះ​ មិន​បាន​ឆ្លង​ជំងឺកូវីដ១៩នោះទេ។