Kynjatvíhyggja er stórt og flókið fyrirbæri og grundvallarhugtak í okkar samfélagi. Við skilgreinum ótrúlega margt út frá karlkyni og kvenkyni án þess að átta okkur á því. Við erum alltaf að setja hvort öðru hömlur í ljósi þessara hlutverka. Hvaða tilgangi þjóna þessar hugmyndir í dag, eru þær kannski meira til trafala en annars, spyr Elías Rúni sig í spjalli sem við áttum í morgun. Elís Rúni er grafískur hönnuður, myndlýsir og myndasöguhöfundur sem gaf út myndasöguna Kvár í fyrra og fékk tilnefningu til FJöruverðlauna fyrir. Kvár seldist fljótt upp í fyrra en var að koma út í annað sinn. Hann myndlýsir einnig einni af jólabókum ársins, Frankensleikir eftir Eirík Örn Norðdahl. Við ræðum við Elías Rúna í þætti dagsins.

?Samfélagið líkist ísjaka. Aðeins 10% eru sýnileg. Annað er utan seilingar og lítt greinilegt. Tímabundinn gestur verður fljótt grunnhygginn sérfræðingur í yfirborðinu og skautar á því þegar heim er komið án þess að sjá myrkrið í djúpinu." - svo lýsa þau Rósa Sigrún Jónsdóttir, myndlistarkona og Páll Ásgeir Ásgeirsson, leiðsögumaður og skáld, upplifun sinni af listamannadvöl í Oqaatsut á vesturströnd Grænlands. Hjónin opnuðu í síðustu viku sýningu í ArTak galleri í Skipholti, þar sem þau sýna afrakstur dvalarinnar. Víðsjá leit við og forvitnaðist um sýninguna og lífið við Grænlandsstrendur í svartasta skammdeginu.

Sölvi Halldórsson rýnir í nýja ljóðabók Hjartar Magnússonar, Land til að sauma rósir í.

Umsjón: Halla Harðardóttir og Melkorka Ólafsdóttir