Út er komin bókin Heilabilun á mannamáli eftir Hönnu Láru Steinsson. Bókin er hugsuð sem kennslubók fyrir heilbrigðisstéttir, en ekki síður sem handbók fyrir aðstandendur og áhugafólk. Heilabilun er gjarnan nefnd „fjölskyldusjúkdómur 21. Aldarinnar“. Hanna Lára kom í þáttinn í dag.

Í vetur ætla Píeta-samtökin að bjóða feðrum, bræðrum og vinum þeirra sem fallið hafa fyrir eigin hendi, til fundar annan fimmtudag í hverjum mánuði kl. 16:30. Stundum er gott fyrir hrútana að vera einir saman eins og segir í tilkynningunni og það er Bjarni Karlsson prestur og Píetafélagi kom í þáttinn, en hann mun leiða þessa fundi en hann hefur áratuga reynslu af starfi með syrgjendum.

Ýmislegt er öðruvísi í gróðrinum þetta haustið, alla vega hér í höfuðborginni og sjálfsagt víðar t.d. á vesturlandi. Eftir vott og kalt sumar sjáum við lítið af berjum, svo sem rifs- sólber, krækiber o.fl. Lísa Páls hitti Þórólf Jónsson garðyrkjustjóra á Klambratúni í gær og spurði hann út í hver áhrifin af veðurfarinu í sumar hafa verið á gróðurinn.

Umsjón: Guðrún Gunnarsdóttir og Gunnar Hansson

Snorri Sturluson hefur löngum verið umdeildur maður. Þegar í miðaldaheimildum er honum lýst sem glöggum fræðimanni og snjöllum stjórnmálamanni en einnig sem föðurlandssvikara og strengjabrúðu Noregskonungs. Á morgun heldur Simon Halink, sagnfræðingur og nýdoktor við Háskóla Íslands, fyrirlestur hjá Miðaldastofu Háskóla Íslands um ímynd Snorra Sturlusonar. Simon kom í þáttinn í dag.

Embætti Landlæknis hvetur skóla til að kenna leikskólabörnum geðrækt með markvissum hætti. Það stendur um þessar mundir fyrir námskeiði í námsefni um félags- og tilfinningafærni sem nefnist Vinir Zippýs. Uppselt er á námskeiðin og þegar kominn biðlisti. Sigrún Daníelsdóttir, sálfræðingur og verkefnisstjóri geðræktar hjá embættinu, segir að þjálfun í félags - og tilfinningafærni sé jafn mikilvæg og íþróttir. Bergljót Baldursdóttir ræddi við hana á Heilsuvaktinni í dag.

Ný dögun - samtök um sorg og sorgarviðbrögð setja fókus í september á aðstandendur þeirra sem látist hafa fyrir eigin hendi. Í kvöld verður flutt erindi sem heitir: „Að missa í sjálfsvígi - tekist á við sorgina“. Það er Guðrún Jóna Guðlaugsdóttir sem sjálf hefur misst son í sjálfsvígi sem flytur erindið. Hún er jafnframt í stjórn Nýrrar dögunar og hefur stutt aðstandendur í stuðningshópum hjá samtökunum, en slíkur hópur hefur göngu sína 17. sept.

Umsjón: Guðrún Gunnarsdóttir og Gunnar Hansson

Borgarbókasafnið Kringlunni býður í fyrsta sinn upp á fjölskyldustundir fyrir foreldra með ungabörn og börn á leikskólaaldri og á föstudaginn mun Sigga Dögg, kynfræðingur, ríða á vaðið með spjalli um þau áhrif sem nýtt barn hefur á foreldrana og samband þeirra og hvernig fræða má börn frá fæðingu um líkamann, samþykki og ást. Sigga Dögg kom í þáttinn í dag.

Dansskóli Guðbjargar Björgvins var stofnaður árið 1982 og hefur síðan þá sinnt dansnámi með sérstaka áherslu á klassískan ballet og nútímadans fyrir unga dansara. Guðbjörg og skólinn standa nú á tímamótum, því hún hefur látið af störfum og komið skólanum í hendur nýrrar kynslóðar. Guðbjörg og Hrafnhildur Einarsdóttir, sem tekur við rekstri skólans, komu í þáttinn.

Kristín Einarsdóttir, okkar kona á Ströndum, fór í heimsókn í Skálholtsvík þar sem hún hitti Birnu Bjarnardóttur sem þar vinnur ásamt eiginmanni sínum og börnum að því að gera upp gamalt og reisulegt hús sem þau tengjast öll sterkum böndum, hvert með sínum hætti.

Umsjón: Guðrún Gunnarsdóttir og Gunnar Hansson

RIFF, alþjóðlega kvikmyndahátíðin í Reykjavík verður sett í 15. sinn 27.sept. Þessi hátíð hefur sett sterkan svip á menningarlíf Reykjavíkur frá árinu 2004, hingað koma árlega erlendir hátíðargestir, fjölmiðlar og heiðursgestir hátíðarinnar sem margir hafa markað djúp spor í kvikmyndasöguna. Börkur Gunnarsson, kynningarstjóri hátíðarinnnar og Guðrún Helga Jónasdóttir, dagskrárstjóri heimildarmynda á RIFF komu í þáttinn og sögðu frá hverju má eiga von á í þetta sinn, heiðursgestum hátíðarinnar og dagskránni.

Blábankinn á Þingeyri stóð fyrir vinnustofu í síðustu viku þar sem japanskir gestir sögðu frá því sem þeir hafa kallað skapandi fólksfækkun. Þetta vakti forvitni okkar. Arnar Sigurðsson, Blábankastjóri, var í símanum frá Þingeyri og sagði frá því hvaða fyrirbæri Blábankinn er og hvað kom fram í máli japönsku gestanna.

Lesandi vikunnar í þettta sinn var Halldór Bragason gítarleikari. Við heyrðum hvaða bækur eru á náttborðinu hans, hvað hann hefur verið að lesa og hvaða bækur og höfundar hafa haft áhrif á hann í gegnum tíðína.

Umsjón: Lísa Pálsdóttir og Gunnar Hansson

MANNEGI ÞÁTTURINN FÖSTUDAGUR 07.sept

Umsjón: Guðrún Gunnarsdóttir og Margrét Blöndal

Ebba Guðný Guðmundsdóttir matgæðingur, sjónvarpskokkur er matargestur okkar í dag en á föstudögum erum við venjulega með matarspjall. Sigurlaug Margrét Jónasdóttir byrjar aftur sitt matarspjall í Mannlega þættinum í næstu viku en í dag er það sum sé Ebba Guðný. Hún hefur fjallað um heilsu og næringu í rúm 20 ár en sjálf glímdi hún við fæðuóþol og magavandræði frá unga aldri og hver man ekki eftir þáttunum Eldað með Ebbu hér á RUV? Guðný Ebba vakti einnig óvænt athygli landsmanna fyrir dansfimi sína í þáttunum Allir geta dansað, sem sýndir voru á Stöð 2 í vetur.

Og svo er það föstudagsgesturinn okkar - reyndar er kannski varla hægt að segja að hann sé gestur okkar því við hjóluðum til hans í kaffi í gær. Svo við segjum bara - gestur á eigin kaffihúsi þennan föstudag er Bjarni Harðarsson bókatúgefandi og rithöfundur

MANNEGI ÞÁTTURINN FIMMTUDAGUR 06.sept

Umsjón: Guðrún Gunnarsdóttir og Margrét Blöndal

Fjölsmiðjan hefur verið rekin frá 2002. Okkur lék forvitni á að vita hvað þarna færi fram og hverjir sæktust eftir því að nýta sér þjónustuna sem þarna er boðið uppá. Þorbjörn Guðmundsson fyrrverandi landsliðsþjálfari byggði starfið upp ásamt starfsmönnum, en nú er nýr forstöðumaður tekinn við. Lísa Páls fór í heimsókn í góða veðrinu í gær..............

Bókasafnsdagurinn er á morgun. Dagurinn er haldinn á hverju ári og er slagorð dagsins í ár, Lestur er bestur - fyrir vísindin . Með þessu þema er vakin athygli á mikilvægi bókasafna í tengslum við vísindarannsóknir og störf, fræðimennsku og lærdóm.

... og við bregðum okkur líka í heimsókn til Auðar Ottesen garðyrkjufræðings og ritstjóra - sem er í þessum töluðum orðum að leggja loka hönd á 100. tölublaðið af tímaritinu Sumarhúsið og garðurinn. Það er áfangi sem örugglega enginn sá fyrir í byrjun.

MANNEGI ÞÁTTURINN MIÐVIKUDAGUR 05.sept

Umsjón: Guðrún Gunnarsdóttir og Gunnar Hansson

Á morgun verður stefnumót á Kjarvalsstöðum þar sem menningar- og fræðslustofnanir á höfuðborgarsvæðinu sem bjóða upp á endurgjaldslausa fræðslu af ýmsu tagi fyrir börn í leikskólum, grunnskólum og frístundastarfi í borginni koma saman. Lögð verður áhersla á að jafna aðgengi barna að listastarfsemi, menningu, vísindastarfi og útikennslu svo eitthvað sé nefnt. Hingað koma þær Harpa Rut Hilmarsdóttir, frá Reykjavíkurborg og Hildur Jóhannesdóttir, skólastjóri Dalskóla í Úlfarsárdal.

Hjálp, Barnið mitt er grænmetisæta! Þetta er titill á matreiðslubók sem kom út í fyrravor, matreiðslubók fyrir ráðvillta foreldra, vanafasta heimiliskokka, fátæka námsmenn og alla aðra sem ættu að borða meira grænmeti. Höfundurinn er Jón Yngvi Jóhannsson bókmenntafræðingur og í kvöld ætlar Jón að mæta í Lífsstílskaffi í Gerðubergi og spjalla um bókina, en áður mætir hann hingað til okkar.

Guðlaug María Bjarnadóttir, leikkona og kennari hefur alla ævi strítt við meðfæddan ónæmisgalla. Hún er formaður Lindar félags um meðfædda ónæmisgalla sem núna stendur fyrir vitundarvakningu um sjúkdóminn. Margir stríða við hann án þess að vita af því og einnig eru dæmi um að læknar viti ekki hvernig bregðast á við honum. Rætt verður við hana á Heilsuvaktinni í dag.

Undanfarið hafa leikhússtjórar leikhúsanna komið í Mannlega þáttinn og farið með okkur yfir leikárið sem er að hefjast. Í dag fengum við Ernu Ómarsdóttur, listdansstjóra Íslenska dansflokksins til að segja okkur hvernig dansárið verður.

Merkur fonleifauppgröftur fór fram á Ströndum í sumar þar sem hópur innlenndra og erlendra fræðimanna rannsakaði bein af ýmsu tagi og annað merkilegt sem kom upp úr jörðinni við Sandvík á Selströnd. Kristín Einarsdóttir, okkar kona á Ströndum, hitti Bergsvein Birgisson sem var upphafsmaður að þessari rannsókn.

Svo virðist sem það reynist námsmönnum hvað erfiðast að komast fram úr rúminu á morgnanna en tæplega tveir af hverjum þremur þeirra ýta að minnsta kosti einu sinni á „snús“ takkann á vekjaraklukkunni til að blunda aðeins lengur. Þetta sýna niðurstöður nýrrar könnunar MMR sem framkvæmd var dagana 25. júlí til 1. ágúst. Kváðust 48% svarenda ýta einu sinni eða oftar á takkann á morgnanna, þar af 17% yfirleitt einu sinni en 6% fimm sinnum eða oftar. Við hringdum í Ólaf Þór Gylfason, framkvæmdastjóra MMR í þættinum í dag og forvitnuðumst um þessa könnun.

Umsjón: Guðrún Gunnarsdóttir og Gunnar Hansson

MANNEGI ÞÁTTURINN MÁNUDAGUR 03.sept

Umsjón: Guðrún Gunnarsdóttir og Lísa Pálsdóttir

Laugalækjarskóli og Réttarholtsskóli standa fyrir námskeiði í lok vikunnar sem ber yfirskriftina: Viðkvæm álitamál og nemendur.Á námskeiðinu verður farið í nýja handbók fyrir kennara sem nefnist Viðkvæm álitamál og nemendur.Velt er upp ýmsum spurningum eins og: Mega kennarar fræða nemendur um hvaða málefni sem er? Hvernig á til dæmis að tala um hryðjuverk, klám og kynþáttafordóma við börn ogunglinga? Getur kennari alltaf verið hlutlaus? Meðal leiðbeinenda eru þær Guðrún Ebba Ólafsdóttir og Linda Heiðarsdóttir, þær koma hingað til okkar rétt bráðum.

Við tökum upp þráðinn frá í vor með að kafa í safn Útvarpsins og finna áhugavert útvarpsefni sem á skilið endurtekningu. Í dag heyrum við brot úr þættinum “með ellefukaffinu“sem Jökull Jakobsson hafði umsjón með í október árið 1969 en þar fjallar hann um kaffi frá ýmsum hliðum. Við heyrum um uppruna kaffis og svo heyrum við hvernig spákona spáir í bolla fyrir ungri stúlku.

Lesandi vikunnar er Halldóra Thoroddsen

Þann 31. ágúst 1978 opnaði Hlemmur formlega og fagnar því 40 ára afmæli sínu í dag. Gestum er boðið á rúntinn í gömlum strætisvagni þar sem Unnur María Bergsveinsdóttir sagnfræðingur ferðast um söguna og segir frá menningunni sem skapast hefur í kringum Hlemm. Unnur María komtil okkar ásamt Franz Gunnarssyni.

Föstudagsgesturinn okkar er landsfrægur tónlistarmaður sem mun halda ferilstónleika í Háskólabíó innan skamms og lögin hans þekkja allir, frægasta lagið hans er sennilega Draumur um Nínu. Eyjólfur Kristjánsson hefur farið marga hringi kringum landið með lögin sín og spilað og sungið.

Sprengjusérfræðingar Landhelgisgæslunnar gerðu á mánudag óvirka sprengju sem fjórir ungir drengir fundu í fjöruferð í Seyðisfirði. Sprengjan var virk og ljóst að illa hefði farið ef hún hefði sprungið í meðförum drengjanna. Við hringdum austur og heyrðum í Svandísi Egilsdóttur, móður tveggja drengjanna, og heyrðum um mikilvægi þess að láta vita í svona tilvikum.

Umsjón: Guðrún Gunnarsdóttir og Gunnar Hansson